خیبرپختونخوا پولیس ءَ سوات دمگ دیریں کوھی ھندانی تہ ءَ ناشرکارانی ھستی ءِ گپ راست کُتگ۔
ڈان روتاک ءِ رپورٹ ءِ رد ءَ سینٹرل پولیس کارگِس ءِ نیمگ ءَ شنگ کُتگیں یک گونڈیں درشانے ءِ تہ ءَ گُشگ بیتگ کہ پولیس چہ راستی ءَ شر آشنا اِنت کہ سوات ءِ لھتیں مردم کہ پیسر ءَ اوگانستان ءَ جھمنند بیتگ اَنت سوات ءِ تہ ءُ توکی کوھی ھنداں ھست اَنت۔
بلے پولیس ءِ رد ءَ جاورھال سرجمیں پئیمءَ ‘سول واکدارانی دست ءَ اِنت’ اور درستیں قانود برجاہ داروکیں ادارگ کجام ھم پئیمیں جاورانی پسہ دیگ ءَ ساڑی اَنت۔
اے درشان سر وزیر محمود خان کے بُنکی شہر ھنکین مٹہ ءِ یک دیریں ھندے ءَ پولیس ءُ تالبان ءِ نیام جنگ ءِ سرءَ پرگینگی سرکار ءِ بازیں روچانی ھاموشی ءَ پد دیمءَ اتکگ۔
گمانی پئیم ءَ میڑءَ پد یک ڈی ایس پی ءُ لھتیں پھازگی کارمند ناشرکاراں دزگیر کُتگ اَنت کہ رندءَ آہ جرگہ ءِ نیام ءَ کپگ ءَ پد یل کنگ بیتگ اَنت۔
دومی نیمگ ءَ ٹی ٹی پی ءَ وتی یک درشانی ءِ تہءَ گُشتگ کہ ما اے گپ ءَ پدر کنگ لوٹ اِنت کہ تحریک طالبان پاکستان ءِ مجاھداں کدی ھم وتی ھند سرجمی ءَ یل نہ کُتگ اَنت بلکینہ مدام وزیرستان ءَ بگر داں سوات ءَ کجام نہ کجام دروشم ءَ وتی سلاہ بندیں ھستی داشتگ۔
جارکش ءَ گُشتگ کہ مجاھد چہ دہ ءُ دوازدہ سالاں چہ سوات ءَ ھست اَنت اگاں مہ بیت ایں گُڑا ھمک سال آھانی دزگیری ءُ نمیرانی ءِ ھال چہ کج ءَ اتکگ اَنت؟
جارکش ءَ دیمترءَ گُشتگ ما پدر کنگ لوٹیں کہ ھندی نیکراھیں مسلمانیں لس مھلوک ءُ کمک ءُ ھمراھداری ءَ چہ اے ھندانی تہءَ مئے مردمی تاگتءِ گیشی کئیت اِنت ڈیھہ دژمنیں سیکولر لابی ءِ اے پروپیگنڈہ دروگ اِنت کہ تالبان آرگ بئیگ ءَ اَنت، تالبان پہ اِشی ءَ لاچار نہ اَنت کہ کس آیاں بیاریت۔