جنگ – سراج نور

نبشتانک: جنگ

نبشتہ کار: سراج نور

دی بلوچستان پوسٹ

ھانل ءَ پوروئیں شپ پہ جیڑگ گوازینت، کہ اے جَنگی میتگے اِد ءَ نندگ نہ بیت، بَلئے تو زان ئے مردم ءَ را وتی میتگ سَک باز دوست بیت زان ئے چیا مردم ءَ را وتی ھنکیں دوست بیت؟ ھمے واستا اِنسان ءِ روہ گوں میتگ ءِ دُرستیں چیزاں بَندوک اِنت۔

اِنسان ءَ گوں میتگ ءَ یک ھونی ءُ لیکھی رشتگے تو گُشت کَن ئے ھست ، مردم ءَ انچو دوست بیت انچو کہ یک مردمے ءَ وتی لیکہ دوست بیت، بچار کارل مارکس ءَ گوں گریب ءُ لاچار ءُ بَزگیں مردماں چوں مھر بوتگ، ھمے داب ءَ اِنسان ءَ وتی ھنکین دوست بیت، بَلئے تو زان ئے کہ جَنگ دُرست چیزاں تباہ کنت ءُ ھلاس کنت، جنگ ھما میتگ ءُ ھما جاگھانی ڈولداری ءَ ھم تباہ کنت، جنگ وت یک دُنیایے آئی ءِ تَہ ءَ تبائی ءَ اَبید دگہ ھچ نیست ،تو زان ئے جنگی میتگ ءَ جنگی مردم ءَ اَبید دگہ کَس نِشت نَہ کنت-

ھانی ءَ شپ پہ جیڑگ گوازینت سُھب ءِ سَر ءَ پاد اَتک ءُ وتی بیگے زُرت دیم پہ شھر ءَ پہ وتا یک کوٹی یے زُرت ئِے ،مزن شاھدربر جاہ ءَ داکلہ زُرت ئِے وانگ ئِے بندات کُت آئی ءَ یک مزنیں مُدتے بوتگ کہ آ میتگ ءَ نَہ شُتگ اَت۔۔۔ بَلئے آئی ءَ میتگ ءِ یاتاں واب ءَ نہ اِشت، آئی ءَ مُدام پہ مھرل ءُ شارل ءَ جیڑ اِت کہ آئی ءِ کَسانی ءِ دزگُوھار بوتگ اَنت۔ دومی آئی ءَ پہ زمان ءَ سک جیڑ ات کہ زمان آئی ءَ مھبت اَت
بَلئے ھانل پہ زمان ءَ سک پریشان اَت چیاکہ زمان جنگ جاھانی جنگی سپائی یے اَت زمان ءُ ھانی ءِ مھر ءُ مھبت اسکول ءِ وھد ءَ چے بندات بوتگ اَت آ دوئیں اسکول ءَ ھم تبک بوتگ اَنت-

وھدے کہ جاور نگیگ بوتاں گُڑا زمان ءَ لوگ یلہ کُت شُت بَلئے روچ ءِ مروچی تک واتر نَہ یتکگ، گڈی وھد ءَ زمان ھانل ءَ گِندیت بس چار کتاب ئِے دنت پد ءَ روت، ءُ پد ءَ واتر نہ کنت ھانُل ھمے یاتانی تَہ ءَ باریں چُنت سال گوازین ایت-

ھانُل یک مزنیں مُدتے ءَ پَد واتر کنت دیم پہ وتی میتگ ءَ وھدے کہ آ وتی میتگ ءَ سر بیت چاریت ھچ نیست دُرستیں میتگ ھالی اِنت ھانل سَک باز کْوکار کنت بَلئے آئیءِ توار کَسی گوشاں نَہ کپیت آ کمے دیم ءَ شُت وتی لوگانی نیمگءَ چاراِیت کہ لوگءِ دپ پچ اِنت چاہ دانی چُل ءِ سرَا کپتگ ءُ چوڑیانی ٹُکراں چلیم ءِ ٹوپی ایر اِنت لھتیں پیالہ پُرشتگ لوگءِ دومی کَش ءَ چلیم ءِ ٹُکراں بان ءِ دروازگ پُرشتگ دَپ ئِے پچ اِنت پَرکُٹی ءِ سر ءَ مَشک ھُشک اِنت ءُ ایر اَنت دگہ ھچ نیست بس تھنائی اِنت، ایوکی اِنت بَس آئی ءَ تھنا ھمے گُشت کہ جَنگ تبائی ءِ نام اِنت جنگ دُرستاں تباہ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔