بلوچ راجی زْرمبشت (بی این ایم) ءِ جارکش ءَ 11 اگست بلوچستان ءِ آجوئی ءِ روچ ءِ بارہ ءَ درشانے ءَ گْوشتگ کہ 11 اگست سوگندسرسبزی روچ اِنت۔پرچا کہ اے روچ ءَ شول کشیں جھد ءُ دیمونیانی برورد ءَ مارا آجوئیں ڈیھے رس اتگ اَت۔ مئے آجوئی باز روچ ءَ برجاہ نہ بوت بلے 11 اگست ءَ مارا اے کلوہ داتگ کہ گوں جھد ءُ گھگیری ءَ جھان ءِ ھمک واک پْروش دیگ بیت۔مروچی چہ برتانیا ءَ نزور تریں ریاستے ءَ مئے گلزمین دستیگ کرتگ بلے ما چہ وتی گھگیری ءَ پاکستان رنگیں زوراکاں ھم چہ وتی گلزمین ءَ در کنگ ءَ الم سوبمند بہ ایں۔
جارکش ءَ یازدہ اگست ءِ پژدر ءَ گپ جنان ءَ گْوشتگ بلوچ کْوھن تریں ربیدگ ءُ دودمان ءِ بیرک دار ءُ واھند اِنت پمیشکا آئی ءَ وتی پت ءُ پیرکانی گھگیری ربیت برجاہ داشت ءُ انگریزانی زورگری ءِ بگیری ءَ جنگ کرت۔ انگریزاں بھر کنگ ءُ واکداری بہ کن ءِ شوندات ءُ سنڈیمن تْرام ءِ پارست ءَ بلوچ چاگرد ءِ مھکمیں بنیادانی ولگوج کنگ ءِ کوشست کرت۔ بلوچ گلزمین ھمے شونداتانی پارست ءَ بھر کنگ بوت بلے بلوچ راج ءِ گھگیری دم توس نہ بوت بلکیں ھزاراں نزرویاں پد ھم وتی منزل ءِ نیمگ ءَ روان اِنت۔
’بیستمی سدھک ءِ دومی دھک ءَ سائنسی راہ ءُ راھبنداں زْرمبشت ءِ بنیاد ایر کنگ بوت ءُ سیمی دھک ءَ جْوانیں رنگے ءَ سیاسی گلے ءِ سروگانی ءَ زْرمبشت ءِ تْرامگ ءُ مھکم کنگ کوشست کنگ بوت۔مچی ءُ دگہ سیاسی مراگشاں بلوچ راج تچکیں رنگے ءَ آجوئی ءِ کلوہ دات ءُ آسر ءَ یادزہ اگست ءَ بلوچستان آجوئیں ڈیھے ءِ رنگ ءَ جھان ءِ سیم ءُ مرزانی تہ ءَ ھوار بوت۔بلے یازدہ اگست ءِ آجوئی ءِ نو ماہ ءَ پد یک رندے پد ءَ گوں برتانیا ءِ توان ءُ زور ءَ پاکستان ءَ بلوچ گلزمین دستیگ کرت ءُ داں مروچی بلوچستان ءِ سر ءَ پاکستان ءِ زورگری برجاہ اِنت۔‘
جارکش ءَ وتی درشان ءِ گڈی ءَ گْوشتگ کہ پہ بلوچ راج ءِ آجوئی ءَ پشت کپتگیں راہ گھگیری اِنت ءُ ما دْروآپانی آماچ بیگ ءِ جاہ ءَ دْروآپ ءُ راستی ءِ میان ءَ پیر ءِ زانگ ءَ پد نی وتی آجوئی ءَ گیپت کن ایں۔باید اِنت بلوچ زانتکار، استاد ءُ سرپدیں مردم بلوچ آجوئی ءِ زْرمبشت ءِ بھر بہ بہ اَنت ءُ انیگیں جاوراں پہ آجوئی ءَ جھد کنوکیں گلانی ھمراھداری بہ کن اَنت ءُ مردماں گمراہ کنوکیں واکانی ولگوج کنگ ءَ وتی پرارزشتیں کرد ءَ پیلو بہ کن اَنت داں آجوئی ءِ واب یک رندے پد ءَ راست جوڑ بہ بیت۔