پھازگی لشکر گِس ءِ تہ ءَ پُترتگ ءُ دو برات اش کُشتگ انت – ثنا بلوچ

شمبے ءِ روچ ءَ بلوچستان اسمبلی ءِ دیوان ءِ میان ءَ بی این پی مینگل ءِ اسمبلی باسک ثنا ء بلوچ ءَ سرکار ءِ دلگوش زیارت ءِ وئیل ءِ بگیری ءَ بیگواھیں مردمانی کھولانی ریڈ زون ءَ زھرشانی، ھاران ءَ حاجی ثناء اللہ ءِ گِس ءَ بیڑ برگ ءُ آئی دو زھگانی کوش، اُستادانی زھرشانی، فزیوتھراپسٹ ءِ زھرشانی ءُ شال ءَ تیرگواری ءَ ورنا ءِکوش ءِ پٹ ءُ پولانی نیمگ ءَ ترینتگ ءُ گوشتگ کہ راجی جیڑھانی گیش ءُ گیوار ءَ ترندیں گامگیج زورگ بہ بیت –

ثناء بلوچ ءَ پوئنٹ آف آرڈر ءِ سر ءَ وتی ھیال درشانتگ ءُ گوشتگ کہ زیارت ءِ وئیل ءِ بگیری ءَ زھرشانی کنوکانی کسانیں لوٹ یے کہ وئیل ءِ بگیری ءَ جوڈیشل کمیشن ءِ اڈ دیگ بہ بیت –

آئی ءَ گوشتگ کہ ھاران ءَ حاجی ثناء اللہ ءِ گِس ءَ بیڑ برگ بوتگ ءُ آئی ءِ دو ورنائیں زھگ کُُشگ ءُ یکے بیگواہ کنگ بوتگ – اگاں کسی ءِ درگت ءَ پٹ ءُ پول ءُ جست پرس کنگی انت گڑا مارا گوشگ بہ بیت گڑا ما آھان وت ادارھانی گور ءَ دیم دئیں اے کجام کانود انت کہ گس ءِ تہ ءَ پُتر وپتگیں زھگاں نشانگ کن –

آئی ءَ گوشتگ کہ ھژدہ جولائیگ انت کہ شال ءِ پریس کلب ءِ دیم ءَ ماسٹر زھرشانی ءَ نشتگ انت دگہ سوبھانی تہ ءَ جے وی ٹی ماسٹر اپگریڈ کنگ بوتگ انت بلے بلوچستان ءِ ماسٹر اپگریڈیشن ءِ ھاتر ءَ شدکشیں ھرتال ءَ نشتگ انت آھانی لوٹ منّگ بوگ ءَ نہ انت –

آئی ءَ گوشتگ کہ من پولیس ءِ تنخواہ ءِ ھاتر ءَ سال ءَ پیسر ھم گپ جتگ بلے آئی ءِ سر ءَ ھچ وڑیں گامگیج زورگ نہ بوتگ – آئی ءَ گوشتگ کہ شال پریس کلب ءِ دیم ءَ نشتگیں فزیوتھراپسٹانی جیڑہ گیش ءُ گیوار کنگ بہ بیت –