بژن بیت کہ بلوچستان ءَ ھمینچو باز وئیل بوتگ بلے اشی ءِ سر ءَ ھچ وڑیں سرھال ایر کنگ نہ بوتگ وھدے کہ یاسین ملک سزا سر ءَ سرجمیں بنگپاں یک نیمگے ایر کنگ ءَ گپ کنگ بیت – بلوچستان ءَ سیلاب تباھی، پھازوکی درگت ءَ گپ کنگ نہ بیت – گپ کنوکاں علی وزیر وڑ ءَ بندایگجاہ ءَ بند کنگ بنت-
اے ھیال ءُ لیکہ عوامی نیشنل پارٹی ءِ سینٹیر نوابزادہ ارباب عمر فاروق کاسی ءَ مروچی پاکستان ءِ سینٹ دیوان ءَ کتگ –
ارباب عمر فاروق ءِ گْوشگ اِنت کہ بلوچستان ءَ سیلاب ءَ چہ چُشیں دمگی نہ اِنت کہ اود ءَ جانی ءُ مالی تاوان نہ بوتگ، اود ءَ مال ءُ دلوت مرتگ اَنت – اے درگت ءَ این ڈی ایم یا پی ڈیم ایم ءَ چی چست ءُ ایر کتگ- بلوچستان ءَ وھدے زمین چنڈ یا سیلاب کاینت گُڑا پی ڈی ایم وظیفہ کنت کہ دگہ سیلاب بیت تاں آ گیش کرپش بہ کن اَنت- مروچی ھم کروڑانی کلدار ءِ نام نبشتہ کنگ بوتگ اَنت بلے دمگاں کمک سر نہ بوتگ اَنت-
آئی ءَ گْوشتگ کہ زیارت وئیل ءَ کہ مئے یک اپسیرے ءَ چست کنگ ءَ پد شھید کنگ بوتگ بلے اشی ءَ پد دروگیں میڑ ءَ مردم کُشتگ اَنت- اشی ءِ واستا جوڈیشل کمیشن لوٹ کنگ بوگ ءَ اِنت بلے مئے مردم اد ءَ ردیں درشانی کنگ ءَ اَنت کہ ناشرکارانی واستا جوڈیشل کمیشن جوڑ کنگ مہ بیت-
ارباب عمر ءَ اکس پیش داشتگ ءُ چیئرمین سینٹ ءَ گوں تران کنان ءَ گْوشتگ کہ تو چارت کن ئے ھمینچو مردم کُشگ بوتگ اَنت آیانی چھرگ تو اندازہ جت کن ئے کہ اشاں سالانی سال روچ ندیستگ-
آئی ءَ گْوشتگ کہ اے اگاں کوھاں نندوکیں جنگول اَنت گُڑا آیانی کار گوں روچ ءَ اِنت بلے اشانی چھرگ ءَ زانگ بوگ ءَ اِنت اشاں ھچبر روچ ندیستگ، بندیگجاہ ءَ چست کنگ ءُ بالگرداں چہ دور دیگ آ کُشتگ اَنت بلے اشی سر ءَ کسے یک گپے بہ کنت گُڑا آئی ءُ فورم دیگ نہ بیت-
آئی ءَ گْوشتگ کہ بلوچستان ءَ پھازوکی ءِ ھمینچو جیڑہ اِنت بلے اشی ءِ سر ءَ گپ کنگ نہ بیت- ما یاسین ملک ھاتر ءَ پارلیمنٹ ءَ گپ کُت کن ایں بلے بلوچستان جیڑاھانی سر ءَ کسے گپ نہ کنت گُڑا علی وزیر ءِ وڑ ءَ بندیگ بند کنگ ءُ ھمود ءَ بندیگجاہ ءَ ھم آئی ءِ کُشگ شوربندی کنگ بیت-
آئی ءَ جُست ایر کتگ کہ اے کجام رنگ ءَ بلوچستان چلائینگ ءَ اَنت- مروچی ھما مردم شال ءَ زھرشانی ءَ نشتگ اَنت ھمے وڑیں کارانی سبب اِنت – گپ اد ءَ اَتکگ ءُ سر اِنت کہ دو ماہ ءَ ساری وانندھیں مات ءُ یک وانندھیں کھول ءَ چہ سیادی داروکیں شاری بلوچ ءَ آیانی لیکہ ءُ پالیسیانی سبب ءَ وتکش تراکے کتگ-
ارباب عمر ءَ دیمتر ءَ گْوشتگ کہ من اے پارلیمان ءُ سینیٹراں جُست کن آں کہ اے یک تُرسناکیں گپے نہ اِنت زالبول وتکُش تراک کنگ ءَ اَنت وھدے کہ اشی ءِ رد کنگ ھاتر ءَ گوشگ بیت کہ بلوچ زالبولاں کارمرز کنگ ءَ اَنت بلے ما اشی ءِ سر ءَ پرچا گپ نہ کن ایں کہ زالبول پرچا اد ءَ اَتکگ ءُ سر بوتگ اَنت – آ کجام زُلم اِنت کہ بوتگ مئے زالبول مروچی اے ھدّ ءَ اَتکگ ءُ سر بوتگ اَنت-
آئی ءَ گْوشتگ کہ اد ءَ کسے ءِ مستری پچگرگ ءِ ھاتر ءُ کسے مستری چلائینگ ھاتر ءَ دَور کنگ ءَ اِنت بلے من بلوچستان سر ءَ گپ کن آں – سرجمیں بلوچستان چہ آپ ڈُب اِتگ اود ءَ سرکار گندگ بوگ ءَ نہ اِنت، اود ءَ پھازوکی جاور روچ پہ روچ گنتر بوان اَنت نزاناں چی بوگ ءَ اِنت کے کے ءَ جنگ ءَ اِنت-
آئی ءَ لوٹ کتگ کہ بلوچستان سر ءَ گپ کنگ ھاتر ءَ پارلیمنٹ ءَ یک روچے بنگپ ایر کنگ بہ بیت – مارا اشی ءِ سر ءَ گپ کنگ لوٹ اِیت کہ زالبول پرچا وتکش اُرش کنگ ءَ اَنت – اے کجام جاور اَنت ءُ کے ءَ اے جاور جوڑ کتگ اَنت وھدے ناشرکار انڈیا ءُ ٹی ٹی پی اَنت آیانی گوم ءَ سر زاھر دگ سر ءَ دیوان بوگ ءَ اَنت مئے دمگی مردماں ناشرکار گْوشگ ءَ اَنت-