شال ءَ کھولانی نندانک: زھرہ بلوچ ءِ سر ءَ اُرش ءِ بگیری ءَ زھرشانی

شال ءَ زورانسری آوار جنیانی بگیری ءَ بیگواھیں مردمانی کھولانی نندانک برجاہ، بلوچ زالبول ءِ سر ءَ اُرش ءِ بگیری ءَ مروچی سروزیر کارگس ءِ دیم ءَ زھرشانی کنگ بوتگ –

بیگواھیں مردمانی کھولاں مروچی پانزدہ روچ سرجم انت کہ بلوچستان گورنر کارگس ءِ دیم ءَ نندانک ءِ جتگ ءُ نشتگ انت – بیگواھیں مردمانی کھول زیارت وئیل ءِ بگیری ءَ پٹ پول، بیگواھیں مردمانی یل کنگ ءُ دروگیں میڑ ءِ گرءُ دار ءِ لوٹ ءَ کنگ ءَ انت –

شال ءَ درنگاز کنوکاں نمیرانیں بلوچ نودربر رھشون رزا جھانگیر ءِ چکانی مات ءِ سر ءَ بوتگیں اُرش ءِ بگیری ءَ سروزیر کارگس ءِ دیم ءَ زھرشانی کتگ وھدیکہ وئیل ءِ بگیری ءَ بلوچ یکجھتی کمیٹی ءَ پریس کانفرنس کتگ –

اھوالکاراں گوں تران کنان ءَ درنگاز کنوکانی گوشگ ات کہ بلوچستان ءِ تہ ءَ دو دھک ءَ گیش انت ھون ءُ آس ءِ گوازی کنگ بوگ ءَ انت چریشی ءَ تنی وھدی ھچ گِس نہ رک اِتگ – ھئور ھاراں بلوچستان وت زدگ کُتگ، زیارت وئیل ءِ بگیری ءَ کھول انساپ ءِ لوٹوک انت بلے آئی ءِ گیش گیوار کنگ ءِ بدل ءَ گوستگیں روچ ءَ زھرہ بلوچ ءِ سر ءَ اُرش کنگ بوتگ وش بھتی ءَ آ رک اِتگ بلے اُرش ءَ چہ اے پدر بوتگ کہ یکجاھیں سزایے رِد ءَ کھول نشانگ کنگ بوھگ انت کہ پدردی ءُ ایرجنگی انت –

بلوچ یکجھتی کمیٹی ءِ رھشونانی گوشگ ات کہ بلوچستان ءَ یکجاھیں سزایے دیگ ءَ بازیں کھول ءِ نشانگ کنگ بوتگ گوستگیں روچ ءَ زھرہ ءِ سر ءَ بوتگیں اُرش ھم ھمے درچ ءِ کڑی یے –

نندانک ءَ اھوالکاراں گوں تران کنان ءَ درنگاز کنوکانی گوشگ ات کہ زھرہ بلوچ ءِ کھول بازیں سال ءِ بیت کہ یکجاھیں سزایے دیمپانی ءَ کنگ ءَ انت کہ آئی ءِ کھول ءَ بازیں جانی ءُ مالی تاوان ءِ دیمپانی کتگ ءُ ھنگت آھانی گوم ءَ ھمے وڈ کنگ بوگ ءَ انت – یکجاھیں سزا جنگی جُرمے اے وڈیں کارانی گر ءُ دار المی انت بلے پھازگی لشکر ءِ نام ءَ سلاہ بندیں ٹولی جوڈ کنگ ءُ مھار گٹ ءَ دیگ بوتگ انت بلوچستان ءِ تہ ءَ انسانی ھکانی لگتمالی ءِ ھواری ءَ ادا سیاسی ءُ چاگردی روایات ھم لگتمال کنگ بوگ ءَ انت –

آئی ءَ گوشتگ کہ زھرہ ءِ سر ءَ اُرش ءَ یکجاھیں سزائے درچ ءِ بندات بوت کنت بلے درسیں ادارہ سرپد بہ بنت ءُ بہ زان انت اے وڈیں بزدلی ءِ گامگیج ءَ ھچ وڈا سوبین بوت نہ کناں بلکنہ اے وڈیں کاراں مردمانی تہ ءَ زھر گیش پاد کئیت –

درنگاز کنوکانی گوشگ ات کہ اُرش کار زاناں نہ زان انت کہ بلوچ چاگرد زالبولانی درگت ءَ ترند انت بلوچ زالبولانی سر ءَ اے وڈیں اُرش ءَ بلوچ راج وتی ھستی ءِ سر ءِ اُرش لیکیت بلوچ زالبولانی سر ءَ اُرش ءَ بلوچستان ءَ روکیں آس پٹرول پر ریچگ انت اشی ءِ رزلٹ سک باز ھراب بیت اِنت – شھید کریمہ بلوچ ءِ کنیڈا ءَ شھید کنگ ءَ ھما وڈ کہ بلوچستان ءِ تہ ءَ گندگ بوتگ اشی ءَ ھاکماں گوش گرگی ات –

آھانی گوشگ ات کہ چہ اے پریس کانفرنس ءَ سرجمیں بلوچستان سیاسی پاٹی چاگردی گل، وکیل نودربر گل ءُ ھر تک ءُ پھناتاں سیادی داروکیں مردماں کلوہ ءَ سر کن ایں کہ اے مردم ھنگت اے وئیل ءِ درگت ءَ ھچ نگوشاں یا ایرجنی ءِ درشان ءَ ابید دگہ گامگیج چست کن انت –

بلوچ یکجھتی کمیٹی ءِ رھشونانی گوشگ ات کہ مروچی سیاست ءَ ھمگرنچیں مردمانی کھول نشانگ کنگ بوگ ءَ انت اگاں اشی ءِ بگیری ءَ ترندی ءَ توار چست کنگ نہ بوت گڈا آ وھد دیر نہ انت کہ سیاست ھمگرنچیں مردمانی کھول ءَ ھوار لس مھلوک نشانگ کنگ بنت –