بلوچ راجی زْرمبشت ( بی این ایم) ءِ جارکش ءَ وتی درشان ءَ گْوشتگ پاکستانی لشکر ءِ تچکیں چیردستی ءَ کارکنوکیں تْرامگیج ایپ سی ، پولیس ءِ ناشرکاری ءِ گر ءُ دار ءِ ادارہ (سی ٹی ڈی) ، بلوچستان لیویز ءُ مردم کشانی رمب بلوچستان ءَ چہ درسیں راھبنداں آجو اَنت ءُ پاکستانی لشکر ءِ بلوچانی چکچینی، مچی سزا ، پہ زوریں بیگواھی ءُ دزگیریں جاھاں کوش رنگیں کارپداں بائیواری کنگ ءَ اَنت۔
آئی ءَ گْوشتگ ھاران ءَ ھاجی سناء اللہ شاھوانی ءِ لوگ ءِ سر ءَ ایپ سی ءِ ارش ، آئی ءِ دو چکانی کوش ءُ یکے ءِ پہ زوریں بیگواھی، شال ءَ بی ایس او آزات ءِ شھیدیں راھشون رزا جھانگیر ءِ جنوزام ءِ سر ءَ کوشی ارش ءُ سنی ھزدار ءَ لیویز کارمندے ءِ جنینے ءَ گوں میداں گرگ ءُ گرینگ چہ ریاستی ادارھانی نیمگ ءَ مردمی اگبالانی لپاشگ ءِ مزنیں درور اَنت۔بلوچستان ءِ سر ءَ وتی زورگری ءِ روچانی گیش کنگ ءَ پاکستانی لشکر تْرام اتگیں وڑے ءَ پولیس ءِ پجیگ ءَ درسیں ادارھاں وتی بلوچ دژمیں شور ءِ سرجم کنگ ءَ کارمرد کنگ ءَ اِنت۔
’شھید رزا جھانگیر ءِ جنوزام ءِ سر ءَ کوشی ارش پاکستانی ستم ءِ تانسری اِنت‘
’’ 14 اگست 2013 ءِ سھب ءَ بی این ایم کیچ ءِ راھشون شھید امداد بجیر ءِ لوگ ءِ سر ءَ پاکستانی لشکر ءَ بیڑ برتگ ءُ آ گوں آئی ءِ مھمان بی ایس او آزات ءِ مزن کارگشاد رزا جھانگیر ءَ شھید کرتگ۔رزا جھانگیر ءِ شھیدی ءِ سالے ءَ پد 28 اگست 2014 ءَ ماں آواران ءَ زگرھانھے ءِ سر ءَ پاکستانی لشکر ءِ ناشرکاراں ارش کرتگ ءُ آئی ءِ پت بھتیار کشتگ، اے ارش ءَ دگہ 6 زگر کنوکیں مردم ھم کشتگ اَنت۔ءُ نی یک رندے پد ءَ اگست ءِ ماہ گچین کرتگ ءُ پاکستانی لشکر ءِ چریکاں شال ءَ بلوچستان زانشتجاہ ءِ دیم ءَ رزا جھانگیر ءِ جنوزام زھرہ ءِ سر ءَ کوشی ارش کرتگ اے ارش ءَ آ ٹپی اِنت۔پاکستانی لشکر ءَ یکشل ءَ اے کھول نشانگ کرتگ ءُ چہ وتی بیھی ھند ءَ لڈگ ءَ لاچار کرتگ۔کھول ءِ مردین پاکستانی لشکر ءَ کشتگ ءُ نی اد ءَ سر بیتگ کہ شھید رزا جھانگیر ءِ جنوزام ءِ سر ءَ ھم کوشی ارش کنگ بیتگ۔ اے پاکستانی لشکر ءِ ستم ءِ تانسری اِنت ایشی ءِ سر ءَ میان استمانی واک وتی بے تواری ءَ بہ پْروش اَنت ءُ زیت وتی کرد ءَ پیلو بہ کن اَنت۔‘‘
’پاکستانی لشکر ءَ ھاجی سناء اللہ سرجمیں کھول بیران کرتگ‘
جارکش ءَ گْوشتگ ھاران ءَ ھاجی سناء اللہ شاھوانی ءِ کھول ھم پاکستانی مھترھند ءِ ستم ءِ آماچ اِنت۔جنگل دگ ءَ آئی ءِ لوگ ءِ سر ءَ 2 اگست 2022 ءِ شپ ءَ ادار 2 ءُ 3 ءِ میان ءَ ایپ سی ءُ پاکستانی لشکر ءَ ارش کرتگ۔ھاجی سناء اللہ ءِ رد ءَ ایپ سی ءُ پاکستانی لشکر ءِ کارمنداں جنین ءُ چکانی پجیگ ءَ لوگ ءَ ساڑی ئیں درسیں مردم لٹ داتگ اَنت۔لٹ ءُ آزار دھی ءِ میان ءَ ھاجی سناء اللہ ءِ مردین زھگ آمر ءُ امران ءَ تیر جتگ ءُ آئی ءِ سیمی چک ارپان شاھوانی گوں لگت ءُ کنداکاں مان بستگ ءُ سئے ئیں چک کہ آیانی تہ ءَ دو ناگیں وڑے ءَ ٹپی اَت آوار جتگ ءُ گوں وت برتگ اَنت۔ دوئیں برات آمر ءُ امران ایپ سی ءُ گوں پاکستانی لشکر ءَ ھمگرنچیں چیریں واکانی دست ءَ شھید بوت اَنت آیانی کنٹ نام گیپتگیں پاکستانی ریاستی واکاں سول نادْراھجاہ ءَ چگل دات اَنت۔وھدے کہ ھاجی سناء اللہ ءِ سیمی چک ارپان شاھوانی دنیگت پاکستانی لشکر ءِ گْور ءَ بندیگ ءُ پہ زور بیگواہ اِنت۔
بی این ایم ءِ جارکش ءَ گْوشتگ ھاجی سناء اللہ ءِ کھول پاکستانی لشکر ءَ بیرگری ءِ نشانگ کرتگ ءُ سرجم ءَ بیران کرتگ ماھے پیش آئی ءِ زھگ اشپاک شاھوانی ھم ریاستی واکاں آئی ءِ لوگ ءِ تہ ءَ کشتگ اَت ءُ نی آئی ءِ سئے زھگ نشانگ کنگ بیتگ چہ ایشاں دو چہ آمیدگس ءِ پرمان ءَ ڈن کشگ بیتگ وھدے کہ یکے دزگیری ءَ پد پہ زور بیگواہ کنگ بیتگ۔اے چہ پاکستانی ریاست ءِ نیمگ ءَ ماں بلوچستان ءَ مردمگری ءِ بگیری ءَ انچیں میار اَنت کہ اے بھ پھل کنگ نہ بہ اَنت۔پہ وتی چاگرد ءُ راجی مانشت ءَ بلوچ راج ءَ ھم سنت بیگ ءُ بلوچ راجی زْرمبشت توانمند کنگی اِنت ابید چہ بلوچستان ءِ آجوئی ءَ ما چہ اے ستم ءُ زوراکیاں درکپت نہ کن ایں۔
’سنی ھزدار ءَ لیویز کارمندے ءِ کرد مردمی منگہ ءِ چپگان اِنت‘
گڈ سر ءَ جارکش ءَ ھزدار ءِ ھند سنی ءَ ’اسداللہ‘ نامیں لیویز ءِ کارمندے ءِ چاگردی رسانکدر ءَ شنگیں اکسے ءِ سر ءَ کہ آئی ءَ تہ ءَ آ جنینے ءَ چہ میداں گرگ ءَ کشگ ءَ اِنت گْوشتگ کہ چہ بلوچ پولیس گچینی لیویز ءِ کارمنداں بلوچ راج ءَ گھتریں روشتے ءِ اوست اِنت کہ اے ادارھانی گیشتریں کارمند بلوچ اَنت پمیشکا اے ادارہ چاگردی ھرابیانی آسر کنگ ءَ وتی زمہ واریاں پیلو کن اَنت ءُ بلوچ بگیریں سرگرمیانی بھر بیگ ءَ پھریز کن اَنت بلے گْوستگیں لھتے سالاں ٹپ ماں ٹپ انچیں کار بیتگ کہ بلوچ راج ءِ چہ ھندی واک لیویز ءُ پولیس ءِ سر ءَ ھم اوست آسر بیتگ۔راج ءِ گیشتریں مردمانی ھمے گْوشگ اِنت کہ نی اے ادارہ پاکستانی لشکر ءِ کاسگ چٹ جوڑ بیتگ اَنت۔اسد اللہ نامیں کارمندے ءِگْوشگ بیتگیں کرد مردمی منگہ ءِ چپگان اِنت، ایشی ءِ موکل ءَ بلوچ راج بھ نہ دنت۔ما پولیس ءُ لیویز ءِ بلوچ سروکاں گْوشگ لوٹ ایں کہ آ وتی ادارہ ءُ کارمنداں ادب بہ کن اَنت۔ چہ ایشی ءَ پیش کہ بلوچ راج آیاں ھم دژمن سرپد بہ بیت ءُ چہ آیاں آیانی نابکاریانی جست ءَ بہ کنت ، آیاں وتی کرد شر کنگ لوٹ ایت۔ دژمن لوٹ ایت بلوچاں گوں بلوچاں دیم پہ دیم بہ کنت بلے مارا سرپد بیگی اِنت کہ اے مئے راجی سیتانی بگیری اِنت ءُ بلوچ راج ایشی ءَ سگ اِت نہ کنت۔