ھاران ءَ لشکریاں لوگے سرءَ بیڑ یے نیام ءَ سئے برات دزگیر کنگ ءَ پد گوں وت بُرتگ بیتگ اَنت۔ لشکریانی دستءَ دزگیری ءَ پد بیگواہ بیتگیں سئے براتانی تہءَ دو برات بازیں ٹپانی سوب ءَ بیران بیتگ اَنت۔
گوستگیں شپ ءَ بلوچستان ءِ دمگ ھاران ءِ ھند جنگل روڈ ءَ پھازگی لشکریاں حاجی ثناء اللہ شاہوانی نامی مردمی یے لوگے سرءَ بیڑ بُرتگ ءُ حاجی ثناء اللہ شاہوانی سئے بَچ گوں وت بُرتگ اَنت، کہ اشانی تہءَ دو ٹپی ایں جاورانی تہءَ برگ بیتگ اَنت۔
ھندی اھولانی گُشگ اِنت کہ وئیل دوشمبے ءِ شپ ءَ دیما اَتکگ۔ لشکریاں بیڑءِ وھدءَ لوگے زالبول ءُ زھگانی سرءَ ھم لٹ کُٹ کُتگ وھدیکہ ھمے نیام ءَ دو مردماں تیر ھم وارتگ کہ آ پدءَ ٹپی ایں جاورانی تہءَ دزگیر کنگ بیتگ اَنت۔
اھوالانی ردءَ لشکریانی دستءَ دزگیری ءَ پد بیگواہ بیتگیں سئیں براتانی تہءَ عمران شاہوانی ءُ عامر شاہوانی سک نگیگیں جاورانی تہءَ شال ءَ چہ دزکپتگ اَنت کہ ٹراما سینٹر شالءَ برگ بیتگ اَنت۔
اھوالانی ردءَ دوھیں مردماں لاپ ءُ دگہ جاھاں تیر جنگ بیتگ اَنت وھدیکہ دوھیں برات ٹپانی سوب ءَ بیران بیتگ اَنت۔
لشکریانی دستءَ بیگواہ بیتگیں سئمی برات داں انگت دیما آرگ نہ بیتگ۔
یات بہ بیت کہ گوستگیں لھتیں روچاں ھاران ءُ کش ءُ کری دمگانی تہءَ لشکریانی دستءَ بیگواھیانی وئیلانی اھوال یکشلی ءَ گوں پیداک اَنت وھدیکہ ھندی مردمانی ردءَ اے وئیلانی تہءَ سی ٹی ڈی ءُ دگہ چیریں گل ءُ ھندی ڈیتھ اسکواڈ ھوار اَنت۔
گوستگیں جولائی ءِ ماہ ءَ ھاران ءَ چہ سی ٹی ڈی ءِ دست ءَ سئے مردمانی بیگواھی ءِ اھوال دی بلوچستان پوسٹ ءَ سربیتگ اَت کہ اشانی تہءَ محمد اسلم ء جاجی محمد ابراھیم مینگل، غلام جیلانی ء محمد امین، خلیل احمد ء رحم اللہ ھوار اَنت۔
سانمندیں مردمانی گُشگ اِنت کہ سی ٹی ڈی ءُ دگہ پھازگی ادارگ ھاران ءُ نزیکیں دمگاں چہ بازیں بے میاریں مردماں ابید رھبند ءُ کانود زورانسری دزگیر کُتگ ءُ گوں وت بُرتگ اَنت وھدیکہ دزگیریاں پد بیگواھیں مردم دیما آرگ نہ بنت، چہ ھاران ءَ بازیں مردم داں انگت ھم سی ٹی ڈی ءِ دزگیری ءَ اَنت۔
واکدارانی نیمگ ءَ داں انگت اے وئیل ءِ سرءَ ھچ وڑیں لیکہ ءُ درشان شنگ نہ کُتگ۔