انگلینڈ ءِ زالبولیں فٹبال ٹیم ءَ اولی بَر ءَ یو ای ایف اے یورو کپ جرمنی ءِ دیم ءَ بُرتگ، ءُ یوروپین کپ وتی نام ءَ کُتگ۔
گوستگیں روچ ءَ بزاں 31 جولائی 2022 ءَ انگلینڈ ءِ مزن شھر لندن ءِ ویمبلی لیب جاہ ءَ فائنل گوازی ءَ انگلینڈ ءُ ھشت رند ءَ یو ای ایف اے یورو کپ ءِ باج بروک جرمنی ءِ ٹیم دیم پہ دیم بیتگ اَنت۔
زیکیں گوازی ءَ انگلینڈ ءَ جرمنی ءِ سرءَ دو گول آورتگ ءُ وھدیکہ جرمنی ءَ تھنا یک گول ءِ آورت کُتگ ءُ چریشی ءَ انگلینڈ ءَ اولی رند ءَ اے داد وتی نام ءَ کُتگ۔
چہ انگلینڈ ءِ نیمگ ءَ اولی گول ای. ٹون ءَ اولی گول شست ءُ دومی دمان ءَ کُتگ وھدیکہ اِشی پسہ ءَ جرمنی ءِ ایل. ماگُل ءَ ھپتاد ءُ نھمی دمان ءَ پسھی گول داتگ۔ لیب دوھیں نیمگ ءَ چہ یک یک دیگ ءِ گولانی سوب ءَ گیشیں دماناں شُتگ۔
گیشیں دمانانی تہءَ انگلینڈ ءِ نیمگ ءَ سی. کیلی ءَ یک سد ءُ دھمی دمان ءَ پہ انگلینڈ باج بریں گول آورتگ، ءُ انگلینڈ اولی بر ءَ یو ای ایف اے یوروپین کپ ءَ وتی نام ءَ کنگ ءَ سوبمند بیتگ۔
چاگردی رسانکدر کارکنوکیں انگلش فٹبال دوستداراں وتی راجی ٹیم ساڑاتگ ءُ پہ آھاں #Lioness ءِ ھیشٹیگ ھم کارمرز کنگ بئیگ ءَ اِنت۔