ظہیر ءِ درگت ءَ سردار نور احمد بنگلزئی ءِ ٹاھاں رد کن ایں – نصراللہ بلوچ

زیارت ءَ کُشگ بوتگیں پیش ءَ آوار جنگ بوتگیں مردم بوتگ انت، وئیل ءِ پٹ ءُ پول کنگ بہ بیت – وی بی ایم پی

وائس فار بلوچ مسنگ پرسنز ءِ سرکماش نصراللہ بلوچ، کمک سرکماش ماما قدیر بلوچ شال ءَ اھوالکاراں گوں تران کنان ءَ گوشتگ کہ زیارت وئیل ءِ درگت ءَ جوڈیشل کمیشن اڈ دیگ ءِ لوٹ انگت ھست انت، زیارت ءِ وئیل ءِ درگت ءَ زوتاں زوت سرجمیں راستی دیم ءَ آرگ بہ بنت –

اھوالکاراں گوں تران کنان ءَ وی بی ایم پی ءِ رھشونانی گوشگ ات کہ زیارت ءِ وئیل ءِ درگت ءَ مئے لوٹ لوٹ جوڈیشل کمیشن اڈ دیگ بوتگ، انجینئیر ظہیر ءِ کھول ءَ دگہ مردمے ءِ جون دست گپتگ ءُ کل ءُ کسارت کتگ کہ آئی ءِ دوبر چار ءُ ٹپاس ءِ کنگے لوٹ ءَ کن ایں –

نصراللہ ءَ بلوچ ءَ گوشتگ کہ سرکار ءُ انتزامیہ ءَ زیارت ءِ جونانی ڈی این اے ءَ بہ کنت ءُ کھول ءِ دست ءَ بہ دنت –

زانگ بہ بیت زیارت ءَ دست کپتگیں جونانی تہ ءَ یک جون ءِ پجار ظہیر بلوچ ءِ نام ءَ کنگ بوتگ، ظہیر ءِ کھول ءَ آئی ءِ پجار کتگ ءُ نادراھجاہ ءَ جون دست گپتگ ءُ کل کسارت کتگ بلے پدا ھم ظہیر بلوچ مروچی دیم ءَ آرگ بوتگ –

انجینئیر ظہیر بلوچ دیم ءَ آرگ بوتگ ھمے ٹاہ دیگ بوگ ءَ انت کہ ایران ءَ گرگ بوتگ – ظہیر ءِ ھمراھی ءَ پریس کانفرنس کنان ءَ پیپلز پاٹی سردار نور احمد بنگلزئی ءَ ٹاہ داتگ ءُ گوشتگ کہ ظہیر ایران ءِ واکدارانی دست ءَ بوتگ –

نور احمد بنگلزئی ءِ بیٹک ءَ پریس کانفرنس کنگے وھد ءَ انجینئیر ظہیر ھم ھمودا ساڑی بوتگ کہ آئی ءَ گوشتگ کہ آ دہ ماہ انت ایران پوج ءِ بندیگ ءَ بوتگ کہ گوستگیں روچ ءَ آئی چم بندگ ءُ پدا تپتان ءَ یل دیگ بوتگ کہ آئی ءَ پدا وتی وارس ءِ ھال کتگ ءُ مستونگ ءَ سربوتگ –

بلے بازیں مردمے ءَ ظہیر بلوچ ءِ پریس کانفرنس دروگ گوشتگ ءُ بازینے ھمے گوشگ انت کہ اے پریس کانفرنس شور بندی ءِ رِد ءَ ٹھینگ بوتگ سوال چست کنگ بوگ ءَ انت وھدیکہ چاگردی ترامجاھاں تامر ءِ ھم شنگ انت کہ تامر ءِ تہ ءَ ھمے گندگ بیت کہ نور احمد بنگلزئی ناشناسیں مردمے ءَ گوں گپ جنگ انت ءُ آ سرپد کنگ بوگ ءَ انت –

زانگ بہ بیت ظہیر بلوچ ءِ زورانسری آوار جنی ءِ ارزی آئی ءِ کھول ءَ شال ءَ نبشتہ کنائینتگ وھدیکہ آئی ءِ وکیل ءِ گوشگ انت انجینیر ظہیر ھما وھد ءَ کہ پوج ءَ آوار جتگ آئی ءِ سی ٹی ڈی ءِ تامر ھم ھست انت –

نصراللہ بلوچ ءَ دیمتر ءَ گوشتگ کہ زیارت ءَ جنگ بوتگیں مردم زورانسری آوار جنگ بوتگیں مردم بوتگ انت ءُ مئے گور ءَ اے بیگواھیں مردمانی کیس ھست انت – آئی ءَ گوشتگ کہ سردار نوراحمد بنگلزئی ءِ گپ رد کتگ انت ءُ گوشتگ کہ ظہیر زورانسری آوار جنگ ءُ بیگواہ کنگ بوتگ ءُ ظہیر زورانسری پریس کانفرنس ءَ پرماتگ ءُ راستی ءِ چیر ترینگے جھد بوگ ءَ انت –

وائس فار بلوچ مسنگ پرسنز ءِ رھشوناں گوشتگ کہ انتزامیہ ءُ ادارہ جیڑھے گیشگیوار کنگ ءَ بدل ءَ گیش مانگیشنگے جھد کنگ ءَ انت –