ھاران: بیگواھیں اسلم ءِ کھول ءَ زھرشانی کتگ

ھاران ءَ سی ٹی ڈی ءِ دست ءَ زورانسری آوار جنگ بوتگیں ورنایے بیگواھی ءِ بگیری ءَ آئی ءِ کھول ءَ زھرشانی کتگ –

ھاران ءَ آوار جنی ءَ پد بیگواہ کنگ بوتگیں اسلم مینگل ءِ کھول ءَ ورنایے یل نہ کنگ ءِ بگیری ءَ مروچی ھاران پریس کلب ءِ دیم ءَ وتی زھرشانی نبشتہ کنائینتگ، کھول ءَ لوٹ کتگ کہ اسلم یل کنگ بہ بیت –

اھوالکارانی رِد ءَ اسلم مینگل ء ابراہیم مینگل ھمے سال ءِ ھژدہ جولائی ءِ شپ ءَ سی ٹی ڈی ءَ چہ ھاران ءِ دمگ کلان ءَ آوار جتگ ءُ بیگواہ کتگ، ورنایے یل کنائینگے ھاتر ءَ مروچی ھاران پریس کلب ءِ دیم ءَ زھرشانی روانک ءِ کشگ بوتگ – روانک ءَ بیگواھیں ورنایے کھول، سول سوسائٹی ءُ نودربراں مزنیں کچ ءَ بھر زرتگ –

درنگاز کنوکاں لوٹ کتگ کہ اسلم مینگل ءَ ھوار ایندگہ بیگواھیں مردم یل کنگ بہ بنت ءُ سی ٹی ڈی ءِ اے وڑیں درکانودی کار گرءُدار کنگ بہ بنت –

درنگاز کنوکانی گوشگ ات کہ ھاران ءِ سی ٹی ڈی ءَ گوستگیں روچاں ھاران ءُ چپ چاگردی دمگاں بازیں ورنایے آوار جتگ ءُ درکانودی گوں وت برتگ انت وھدیکہ آوار جنگ بوتگیں مردم دیم ءَ ھم آرگ بوگ ءَ نہ انت – چہ ھاران ءَ بازیں مردمے تنی وھدی سی ٹی ڈی ءِ بندیگ جاھاں بند انت –

درنگاز کنوکانی گوشگ ات کہ اگاں سی ٹی ڈی ءَ ھاران ءِ تہ ءَ وتی اے کار بند نہ کُتاں ءُ بیگواھیں مردم یل کنگ نہ بوتاں گڈا دمگی ءُ بیگواھیں مردمانی کھول لاچار بنت کہ ترندیں زھرشانی بہ کن انت –

بیگواھیں اسلم مینگل ءِ کھول ءَ واکداریں ادارگ ءُ انسانی ھکانی گلاں گوں دزبندی کتگ کہ اسلم یل کنائینگ ءَ آھانی ھمراہ داری ءَ بہ کن انت –