وائس فار بلوچ مسنگ پرسنز ءِ چیرمین نصراللہ بلوچ ءَ چاگردی رسانکدر ءِ تندجاہ ٹوئیٹر ءَ شنگ کُتگیں درشانی ءِ تہءَ گُشتگ کہ زیارت وئیل ءِ سرءَ جوڈیشنل کمیشن اڈ دیگ ءِ ھاترءَ، ءُ بیگواھیں مردمانی یل کنائنگ ءِ ھاترءَ وی بی ایم پی ءُ ھواریں گلانی زھرشانی نندانک سر وزیر ءُ گورنر بلوچستان ءِ کارگسانی دیما ششمی روچ ءَ ھم برجاہ۔
ھمے درگت ءَ بیگواھیں بلوچ نودربر رھشون شبیر بلوچ ءِ گھار سیما بلوچ ءَ وتی چاگردی رسانکدرءِ تندجاہ ٹوئیٹر ءَ شنگ کُتگیں درشان ءِ تہءَ گُشتگ کہ من ھما ادارگاں گوں ھم جنگ کُت کناں کہ آھانی ھچ کس گمان ھم کُت نہ کنت۔
یات بہ بیت کہ 4 اکتوبر 2016 ءَ بلوچستان ءِ دمگ کیچ ءَ چہ زورانسری بیگواھی ءِ آماچ بیتگیں نودربریں رھشون شبیر بلوچ ءِ گھار ءُ لوگیگ آئی آجوئی ءِ ھاترءَ زھرشانی کنگ ءَ اَنت۔
سیما بلوچ زیارت ءَ بیوکیں زھرشانی ءَ ھوار اِنت ءُ آ چاگردی رسانکدر ءَ ھم پہ بیگواھیں مردماں توار چِست کنت، مروچی آئی ٹوئیٹ کنان ءَ گُشتگ کہ من چہ کسانی ءَ یک تُرسوکیں جنکے بیتگ اَنت، پہ وتءَ جنگ کنگ چی اِنت، وتی ھقانی ھاترءَ من کدی ھچ نزانتگ بلے شبیر ءِ بیگواھی ءَ من ءَ سرجم ءَ مٹ کُتگ، درد ءُ اندوھاں منءَ جنگ کنگ سوج داتگ نوں من گوں ادارگاں ھم جنگ کُت کناں کہ کَس آئی گمان ءَ ھم کُت نہ کنت۔