بلوچستان ءَ بشامی ھورانی یکشلی برجاہ اِنت، گوستگیں سئے روچاں چہ برجاھیں ھورانی سوب ءَ بلوچستان ءَ ھمک روچی زندمان ترندیں وڑے ءَ سانمند بیتگ۔
جتاھیں ھنداں مزن دگ بند بیتگ اَنت ءُ پُل پُرشتگ اَنت چریشی سوب ءَ مکران کوسٹر ہائی وے ءُ لسبیلہ، شال شاہ دگ ءِ سرءَ ھزارانی کچ ءَ مساپر مانگیشیتگ اَنت۔
لسبیلہ دمگ ءَ ھوار بازیں دمگاں ھوراں تاوانباری کُتگ، لوگ آپ ءَ بُرتگ اَنت، میتگانی زمینی رھوت سِستگ اَنت۔
نوکتریں اھوالانی ردءَ داں انگت مزنیں کساس ءَ مردم جتاھیں ھنداں پس اِتگ اَنت ءُ کمک ءِ وداریگ اَنت۔
آر سی ڈی شاہ دگ بازیں جاھاں بُڈ اِتگ شال کراچی شاہ دگ ءِ سرءَ تریفک اوشت آماچ اِنت ءُ مساپر پس اِتگ اَنت۔
وردنی سامانانی نہ بیگ ءِ سوب ءَ زھگ، کماشیں مرد ءُ نادراھانی جاور نگیگ اَنت۔
کراچی ءَ نزیکیں بلوچستان ءِ باپاری شھر ھب ءَ گوں کراچی ءَ ھوار کنوکیں پُل ءِ یک بھرے گوستگیں شپ ءَ کپتگ اَت کہ اِشی سوب ءَ بلوچستان ءِ گوں کراچی ءَ ھم زمینی رھوت پُرشتگ۔
دی بلوچستان پوسٹ نیوز پتر ءَ سربیتگیں اھوالانی ردءَ چہ لسبیلہ ءَ گیشتر تاوانانی اھوال پیداک اَنت۔ ھزارانی کچ ءَ مھلوک بیلہ ءِ ھندءَ پس اِتگ اَنت۔ لسبیلہ ءَ کساس ھپت جاہ ءَ آپ میان اُستمانی شاہ دگ آر سی ڈی ءِ سرءَ اتکگ ءُ دگ آپ ءَ بُرتگ۔ بلوچستان ءَ سند گوں ھوار کنوکیں ھب ریور پُل ھم بے کار بیتگ۔
کراچی الیکٹرک ءِ بنجاھی لین ءِ پول ءِ ھب کئور ءَ کپتگ کہ اِشی سوب ءَ ھب ءَ ھوار سرجمیں دمگ ءَ بجلی بند اِنت۔