بولان ءَ ٹیل ءُ گیس کشوکیں کمپنی ءِ گاڑی ءِ سر ءَ اُرش

سربوتگیں ھالانی رِد ءَ ناشناسیں مردماں بولان ءِ دمگ مچ ءَ ٹیل ءُ گیس درکنوکیں کمپنی ءِ گاڑی ءِ سر ءَ تراکناکیں شوروانی نشانگ جوڈ کتگ، چریشی ءَ آھاں جانی ءُ مالی تاوان بوتگ –

ھالانی رِد ءَ مورو مغل کوٹ ءُ چلتن فارمیشن بلاک ءَ سامان سرکنوکیں گاڑی ءِ بمب اُرش ءِ نشانگ کنگ بوتگ – بلے تنی وھدی واکدارانی نیمگ ءَ اے درگت ءَ ھچ وڑیں درشان دیگ نہ بوتگ –

اے جاہ ءَ سال دوھزار ءُ ھژدہ ءَ ٹیل ءُ گیس ءِ مزنیں ءِ زیر زمین ءَ شوھاز کنگ بوتگ – اے گیس ءِ مُچی ءِ ماڑی پیٹرولیم کمپنی لمیٹڈ ءُ پاکستان پیٹرولیم لیمٹڈ ءَ ھواری ءَ در گپتگ – اے مچیں گیس ءَ بلوچستان ءِ رودراتکی دمگ کچی بولان ءِ ھند مچ ءَ شوھاز کنگ بوتگ کہ اودا ھمک روچ ٹیل درکنگ بوگ ءَ انت –

ماڑی پٹرولیم کمپنی لمیٹڈ ھستیں وھدے جارکش اسد ربانی ءِ گوشگ انت کہ بندات ءَ اے سائٹ ءِ سر ءَ دو ٹیوب وئیل جنگ بوتگ کہ آھانی تہ ءَ یکے ءَ 810 بیرل ءُ دومی 690 بیرل ٹیل درآھگ ءَ انت – اسد ربانی رِد ءَ 1500 بیرل ٹیل ءِ درآھگ مزنیں سوبمندی یے چریشی ءَ زانگ بیت کہ زمین ءِ چیر ءَ ٹیل ءِ بازیں چمگ ھست انت –

اھوالکار ءِ رِد ءَ ماڑء پٹرولیم کمپنی لمیٹڈ ءِ ھمراھی ءَ ڈنی ملکانی کمپنی ھم سائٹ سر ءَ کار کنگ ءَ انت بلے اے درگت ءَ کمپنی ءِ نیمگ ءَ ھچ وڈیں سرپدی دیما آرگ نبوتگ –

گوست ءَ ٹیلءُ گیس کمپنیاں ھوار سی پیک ءِ سر ءَ بلوچ آجوئی لوٹوکیں سلاہ بندیں گلاں اُرش کُتگ ءُ بی ایل اے مجید برگیڈ ھم اشانی سر ءَ ترندیں اُرش کتگ بوتگ بلے تنی وھدی اے اُرش ءِ زمّہ واری ھچ گل ءَ نہ منّ اِتگ –