جرمنی : زیارت وئیل سر ءَ امریکہ ءُ فرانس ءِ سفارت خاناھانی دیم ءَ زھرشانی کنگ بوتگ-

یکشمبے روچ ءَ جرمنی ءِ بُنجاھی شھر برلن ءَ امریکہ ءُ فرانس ءِ سپارتھانانی دیم ءَ برلن گیٹ ھند سر ءَ زیارت ءَ لشکر کشی ءُ دروگیں میڑ ءَ بلوچ بیگواھیں مردمانی کُشگ ءِ بگیری ءَ یک زھرشانی یے کتگ ءُ اے درگت ءَ سرپدی مھم برجم داشتگ-

برلن ءَ ھستیں بلوچ ایکٹویٹس اے زھرشانی ءُ سرپدی مھم ءَ بھر زرتگ ءُ دستاں زیارت وئیل ءَ کُشگ بوتگیں بیگواھیں مردمانی اکس ءُ پاکستانی آزارجاھاں بندیگیں مردمانی اکس چست کتگ اَنت ءُ زھرشانی کنوکاں بلوچستان ءَ پاکستانی ریاست زوراکی ءِ سر ءَ اکوام متھدہ ءُ دگہ ادارھانی بے تواری دلپدردناکی درشان کتگ-

ھمے درگت ءَ جرمن ءُ انگلش زبان ءَ پتانک بھر ءُ بانگ کتگ کہ آئی ءِ تہ ءَ زیارت وئیل ءُ بلوچستان ءَ پاکستانی ریاستی زوراکی ءِ درگت ءَ مھلوک سرپدی دارتگ-

ھمے درگت ءَ تران کاراں ترانکناناں گْوشتگ کہ زیارت ءَ بلوچ لبریشن آرمی ءِ دست ءَ دزگیر کنگ بوتگیں وتی یک کرنلے ءِ دزگیری ءِ پُشدر ءَ پاکستانی پوج وتی دستگیں بوتگیں بیگواہ یازدہ بلوچ کُشتگ ءُ میڑ نام داتگ-

آیاں گْوشتگ کہ اے وئیل ءَ پد ھزارانی بلوچ بیگواھیں مردمانی کھول تُرس آماچ ءُ پریشان اَنت کہ پوج ءِ دستیگ آیانی دوستناکاں تاوان مدنت-