بلوچ نیشنل مومنٹ ءَ وتی شنگ کتگیں درشان ءِ تہ ءَ گوشتگ 23 جولائی ءَ بلوچ راجی زْرمبشت (بی این ایم) جرمنی ءِ نیمگ ءَ بون شھر ءَ پاکستانی لشکر ءِ دست ءَ بلوچستان ءَ دروگیں میڑانی تہ ءَ زورانسری بیگواھیں مردمانی کوش ءِ ویلانی تہ ءَ گیشی ءِ بگیری ءَ زھرشانی کنگ بیتگ۔زھرشانی کنوکاں بلوچستان ءَ زورانسری بیگواھی ءُ زورانسری بیگواھیں مردمانی دروگیں میڑانی تہ ءَ دزگیری کوش ءِ بگیری ءَ اوگام جتگ۔
گوں زھرشانی کنوکاں گپ جنان بی این ایم جرمنی تک ءِ کمک کارگشاد ءَ گْوشتگ پاکستان ءَ 11 بے میاریں مردم دروگیں میڑاں کشتگ ءُ رند ءَ ٹاپار جتگ کہ اے بی ایل اے ءِ باسک بیتگ اَنت بلے راستی ایش اِنت کہ آ زورانسری بیگواھیں بلوچ بیتگ اَنت کہ چد ءُ پیش پاکستانی لشکر ءَ آوار جتگ ءُ وتی آزارجاھاں بند کرتگ اَت اَنت۔
آئی ءَ دیمتر ءَ گْوشتگ کہ جھان پاکستانی لشکر ءِ اے کارپداں جنگی میارے بہ زانت ءُ اے میان استمانی تْرامگیج ءُ ڈیھانی زمہ واری اِنت کہ بلوچستان ءَ اے سنگینیں میارانی سر ءَ پاکستان ءَ جست بہ کن اَنت۔
بی این ایم نیدرلینڈز تک ءِ کارگشاد امران ھکیم ءَ ھم زھرشانی ءَ بھر زرتگ، آئی ءَ گْوشتگ کہ پاکستانی لشکر بلوچستان ءَ بلوچاں چکچین کنگ ءَ اِنت۔آ بلوچ شپانک،نودربر،ڈاکٹر ءُ انجنیراں کشگ ءَ اِنت۔ مروچی ھما ڈیھ ءُ تْرامگیج کہ پاکستان ءَ گزرانکی کمک کنگ ءَ اَنت آ باید پاکستان ءِ بارہ ءَ وتی شونداتانی سر ءَ چار ءُ بچار بہ کن اَنت پرچا کہ پاکستان اے کمکاں بلوچستان ءَ بے میاریں مردمانی کوش ءَ کارمرد کنگ ءَ اِنت۔
بی این ایم ءِ باسک اھمد ءَ گْوشتگ بلوچ ابید ء آمیدگس ءِ پرماناں آوار جنگ بیگ ءَ اَنت ، آ در مردمی آزار دیگ بیگ ءَ اَنت ءُ زورانسری بیگواھیں مردم دروگیں میڑانی تہ ءَ کشگ بیگ ءُ آ ناشرکار لیکگ بیگ ءَ اَنت ، نی اے نوکیں ربیتے جوڑ بیتگ۔
بدل ، بی این ایم۔ این آر ڈبلیو بنزہ ءِ کارگشاد ءَ اے دم ءُ درگت ءَ گْوشتگ پاکستان ناشرکاریں ریاستے کہ بے میاریں مردماں دروگیں میڑاں کشگ ءَ اِنت ءُ چہ مردماں زھرشانی ءِ اگبال ءَ پچ گرگ ءَ اِنت۔
بی آر پی ءِ رسانکدری تْرامکار جلیل ءَ گوں زھرشانی کنوکاں گْوشتگ پاکستانی لشکر وتی چیریں واکانی دست ءَ پنچ یا چہ دس سال ءَ گیش زورانسری بیگواھیں مردماں کشگ ءَ اِنت۔اے میان استمانی تْرامگیجانی زمہ واری اِنت کہ پاکستان ءَ کمک مہ دئے اَنت ءُ یورپی سنت پاکستان ءِ جی پلس اسٹیٹس ءَ آسر بہ کنت۔
بلوچ نیشنل موومنٹ جرمنی ءِ باسک امجد ءَ گْوشتگ کہ جھان پاکستانی لشکر ءِ دست ءَ بلوچانی چکچینی ءِ نیمگ ءَ دلگوش بہ کنت۔
سادک ءَ گْوشتگ زورانسری بیگواھیں بلوچانی پاکستانی لشکر ءِ دست ءَ کشگ بلوچانی چکچینی ءِ دْرچ اِنت۔ اے میان استمانی ادارھانی زمہ واری اِنت کہ پاکستان ءَ کمک مہ دئے اَنت۔