جسٹس قاضی فائز عیسیٰ بلوچ ءِ بگیری داروک یے، آئی ءِ سر ءَ اوست دارگ نہ بیت – جمیل بگٹی

نواب اکبر خان بگٹی ءِ زھگ نمیرانیں جمیل اکبر بگٹی ءَ چاگردی ترامجاہ ٹویٹر ءَ بی این پی ءِ درشان ءِ پژدر ءَ ٹویٹ کتگ ءُ گوشتگ کہ جسٹس قاضی فائز عیسیٰ سر ءَ ھچ اوست مہ داریت آئی ءَ وتی سرجمیں زند ءَ بلوچ ءِ بگیری کتگ –

بلوچستان نیشنل پاٹی مینگل ءِ بنجاھی رھشوناں زیارت وئیل ءِ درگت ءَ چہ سرکار ءَ لوٹ کتگ کہ کمیشن ءِ جوڈ بہ کنت اھاں کمیشن ءِ سرکماش جسٹس قاضی فائز عیسیٰ کنگے لوٹ ھم کتگ –

نیشنل پاٹی مینگل ءِ اے لوٹانی پژدر ءَ جمیل بگٹی ءَ گوشتگ کہ جسٹس قاضی فائز عیسیٰ ھما وھد ءَ وت ءَ پدر کتگ کہ وھدیکہ مشرف ءِ بگیری ءَ منی پت ءِ کوش ءِ کیس ءِ پیشی بوتگ –

زانگ بہ بیت چیزے روچ ساری زیارت ءَپاکستانی پوج ءِ کرنل ءِ آوارجنی ءُ کوش ءَ پد پاکستانی پوج ءَ لشکر کشی ءِ میان ءَ نُھ اوار جنوکانی کوش ءِ ٹاہ داتگ ات بلے دومی نیمگ ءَ بلوچستان ءِ راجدوستیں پاٹی اے لشکر کشی پٹ پول ءِ لوٹ کنگ ءَ انت –

اے پاٹیانی گوشگ انت کہ زیارت ءَ جنگ بوتگین مردم پیش ءَ زورانسری آوار جنگ ءُ بیگواہ کنگ بوتگ انت – کہ آھانی پجار کھولاں کُتگ انت –

زیارت ءِ لشکر کشی ءِ بگیری ءَ بی این پی مینگل ءِ نیمگ ءَ بلوچستان ءِ بازیں دمگاں زھرشانی برجاہ انت پاٹی ےِ بنجاھی جار ءِ پد ءَ مروچی بلوچستان ءِ بازیں دمگاں زھرشانی کنگ بوتگ –