بلوچستان: بشی ھوراں بیران بوتگیں مردمانی کچ سد ءَ سر بوتگ انت

بلوچستان ءَ بازیں ھورانی سوب ءَ کورانی ھار بازارانی تہ ءَ پُترتگ ءُ سرجمیں دگ بند بوتگ انت –

گوستگیں بازیں روچاں برجاھیں بازیں ھورانی ھار ھب ڈیم ءَ سربوتگ ءُ ھب ڈیم اسپیل وے ءَ آپ دارکنگ بوگ ءَ انت – دمگی مردماں وتی جاہ یل داتگ ءُ اودا چہ دراتکگ انت – ھارانی سوب ءَ ھب کور گوزوکیں شھدگ بند کنگ بوتگ –

پی ڈی ایم اے ءِ رپورٹ ءِ رد ءَ ھور ھاراں بیران بوتگیں مردمانی کچ نود ءُ نُھ ءَ سربوتگ انت – بلوچستان ءَ ھور ءُ ھاراں بیران بوتگیں مردمانی تہ ءَ سِی ءُ دو زھگ ءُ بیست ءُ ھشت زالبول ھم ھوار انت – بلوچستان ءَ بازیں ھورانی سوب ءَ بازیں مردمے بےگس بوتگ انت –

رپورٹ ءِ رِد ءَ بازیں ھور ءُ ھارانی سوب ءَ بیران بوتگیں مردمانی کچ گیش بوت کنت –

بلوچستان ءِ بازیں دمگاں ھورانی درچ برجاہ انت وھدیکہ بازیں دمگاں ڈیمانی بندانی پرشگے سوب ءَ بازین دمگے آپ ءَ بُرتگ ھاکی بان پُرشتگ انت – رپورٹ ءِ رِد ےَ بازیں مردمے چہ گسانی لُمبگ ءَ چیر تر اتگ ءُ بیران بوتگ انت –

دومی نیمگ ءَ سوبائی ءُ وفاقی سرکار ءَ وئیلانی آماچ بوتگیں مردماں دہ دہ لک ءِ کمک دیگے جار جتگ –

ھور ءُ ھاراں بازیں کچے ءَ مردم زدگ ھم بوتگ انت زدگ بوتگیں مردمانی تہ ءَ گیشتر سول ھسپتال شال ءَ برگ بوتگ انت – بشی ھوراں بازیں کشار ھم تباہ بوتگ انت –

رپورٹ ءِ رِد ءَ گوستگیں دو ھپتگاں برجاھیں ھورانی سوب ءَ سرجمیں بلوچستان ءَ 78910 نودربر چہ وتی وانگ ءَ زبھر بوتگ انت – بشی ھوراں بلوچستان ءِ دوازدہ دمگان تباھی کتگ – ھارانی سوب ءَ بازیں وانگجاھے ءَ ھم تاوان بوتگ چریشی ءَ نودربر وتی وانگ ءَ زبھر بوتگ انت –

سوبائی سرکار ءَ بشّی ھوراں جانی ءُ مالی تاوان ءَ رکگے ھاتر ءَ سرجمیں بلوچستان ءَ 144 جتگ ءُ صحبت پور، پشین، گوادر، آواران، واشک، بارکھان، پنجگور، لسبیلہ ءُ قلعہ سیف اللہ آفت زدہ گوشتگ انت –

تنی وھدی بازیں دمگی ءَ ھورانی درچ برجاہ انت پی ڈی ایم اے ءِ رِد ءَ ھورانی سوب ءَ گیشتر تاوان بوت کنت-