بلوچستان ءِ دمگ کیچ ءَ پاکستانی پوج آدینگ ءِ روچ ءِ ساھت دو ءَ سَے مردم دزگیر کرتگ ءُ برتگ اَنت ءُ چریشی ءَ پد آیانی ھچ ھال نہ بوتگ-
بیگواہ کنگ بیتگیں مردمانی پجار نادل ء دلمراد، قدیر جان ء علی بخش ءُ محمد حاصل ء محمد ءِ ناماں زانگ بیتگ اَنت-
دمگی مردمانی رد ءَ نادل ءُ قدیر بالگتر ءِ جھمنند اَنت ءُ آ وتی سیادانی چارگ ءَ شاپُک ءَ اتکگ بیتگ اَنت ءُ بیگواھی ءِ آماچ کنگ بیتگ اَنت-
دومی نیمگ ءَ کیچ ءِ دمگ تمپ کونشکلات ءَ پاکستانی لشکر ءَ بیڑ برتگ ءُ پَٹ ءُ پول بندات کتگ-
ھالانی تہ ءَ گوشگ بیتگ کہ کونشکلات ءِ جنگل ءَ پوجی بیڑ برجاہ اِنت اود ءَ لشکر مچگدگ ءَ مانرتکگ ءُ لشکر کشی کنگ ءَ اِنت – تنی وھدی دگہ دزگیریانی ھال سر نہ بوتگ اَنت-
زانگ بہ بیت بلوچستان ءَ یک دھکے ءَ مردمانی بیگواھی یکشل ءَ برجاہ اَنت ءُ دومی نیمگ ءَ بلوچانی یل کنائینگ ءِ ھاتر ءَ وائس فار بلوچ مسنگ پرسنز یک دھکے ءَ چہ زھرشانی کنگ ءَ اِنت-