سربوتگیں ھالانی رِد ءَ سند ءِ مزن شھر کراچی ءُ بلوچستان ءِ دمگ کیچ مند ءَ پاکستانی پوج ءِ دست ءَ زورانسری آوار جنگ بوتگیں دو مردم یل کنگ بوتگ انت –
گیشیں ھالانی رِد ءَ کیچ ءِ دمگ مند بلوچ آباد ءُ کراچی ءِ دمگ ملیر ءَ پاکستانی پوج ءِ دست ءَ زورانسری آوار جنگ بوتگیں بلوچ ھان ء یاسین جھمنند مھیر ءُ سعید عمر ء محمد عمر یل کنگ بوتگ انت –
اھوالکار ءِ رِد بلوچ ھان سَے سال ءُ شش ماہ ءَ ساری پاکستانی پوج ءَ مند ءِ دمگ بلوچ آباد ءَ چہ گِس ءَ آوار جتگ ءُ بیگواہ کتگ بوتگ کہ مروچی بلوچستان ءِ باپاری شھر ھب ءَ یل کنگ بوتگ – وھدیکہ سعید عمر ھمے سال ءِ بیست ءُ نھ اپریل ءَ کراچی ءِ دمگ ملیر ءَ سی ٹی ڈی ءُ چیریں ادارھانی کارمنداں آوار جتگ ءُ بیگواہ کتگ بوتگ –
زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءَ لشکر کشی ءِ میان ءَ مزنین کچ ءَ مردم آوار جتگ ءُ بیگواہ کتگ انت کہ آھانی تہ ءَ وھد وھد سر ءَ لھتے مردم یل کنگ بوتگ انت بلے بازینی ءَ دہ دہ سال انت کہ گار ءُ بیگواہ انت کہ آھانی تہ ءَ بازیں بیگواھیں مردمانی زانگولیں جون دست کپتگ-بیگواھیں مردمانی پانکجنیں گل وی بی ایم پی ءِ رِد ءَ مئے یکجاہ کتگیں ناسرجمیں لڑ ءِ رِد ءَ تنی وھدی پنجاہ ھزار ءَ گیش مردم زورانسری آوار جنگ ءُ بیگواہ کنگ بوتگ انت ءُ اے زورانسری آوار جنیانی درچ یکشل ءَ برجاہ انت لھتے مردم یل کنگ بنت وھدیکہ دومی نیمگ ءَ دوسری آوار جنگ ءُ بیگواہ کنگ بوگ ءَ انت –