من گنوک ءُ سف – مھرانی چِراگ

نبشتانک :من گنوک ءُ سفر

نبشتہ کار:مھرانی چِراگ

دی بلوچستان پوسٹ

ِسَپر سک وش اِنت پد ءَ سَپر ءِ میان ءَ گند ئے گنوکے گون بہ بِیت گڑا گیشتر وش اِنت گُڑا ما راون کُت دیم پہ سَپر ءِ نیمگ ءَ سنگت کَندان ءُ مسکرا کنان اِت اَنت ہر کس گوں وت دلگوش اَت بلے گنوک گوں من اَت گنوک جنگ ءِ کِسھاں کنگ ءَ اَت گُڑا سَپر دراج اَت بیگاہ ءِ وھد اَت ما نِشت ایں سنگتاں گُشت دمے بالا کن ایں گُڑا گنوک انگت گوں من جنگ ءِ کِسھاؐں کنگ ءَ اَت گڑا سنگتے ءَ توار کُت کہ پادا اِت سَپر دراج اِنت انگت ءَ گُڑا پد ءَ سَپر بِندات بوت. ما راون اِت ایں روچ ایر شُت مئے سر کپت یک ھلکے ءَ هود ءَ سے یا کہ چار لوگ اِت انت لین ھم نیست اَت سنگت ءَ گُشت مئے آپ کُٹ اِتگ اَنت گنوک ءَ بچکندگے جت ءُ گُشت اے ھلک ءَ تو گِندگ ءَ نہ ئے مارا وَ پَٹے آپ دے اَنت گُڑا گنوک ءَ توار ئِے جت بَلے کن کَلیگ ءَ زور من ءُ تو رو ایں آپ کار ایں سنگت نِشت اَنت من ءُ گنوک رھادگ بیت ایں دیم پہ کُڈکے ءَ گنوک ءَ توار جت-

کسے ھست اِد ءَ ؟ کسے ھست اِد ءَ ؟ گونڈل: ھَو ھست اِنت گنوک:بیا ڈن ءَ گونڈل درآتک ڈن ءَ مات ئِے ھم گون اَت مات:منی چُک شُما چونین اِت.؟ گنوک:اماں ماں سرمچار ایں آ سک گَل بوت انت اے نام اِش اِشکُت کہ ما گُشت ما سرمچار ایں مات:شُمارا پہ مارا چے کار کَپتگ؟ گنوک:اما مے آپ کٹ اِتگ اَنت ما بازار دیست گُڑا دیم پہ بازار ءَ اتک اِیں مات:منی چک بیا اِت لوگ ءَ پہ شُما ورگ اڈ کن آں شُما دیر ءَ چے پیداک اِت بلکیں گنوک:اما ما ترا تکانسُر (تکلیپ) کُت نہ کن ایں مارا بس آپ بدے مے بوتل ءَ آپ مان نیست مات بیا اِت لوگ ءِ توک ءَ من ءُ گنوک شُت ایں لوگ ءَ نِشت اِیں اما ءَ مارا آپ آؤرت دات-

من مات جُست کُت کہ اما شُمارا دیر انت شما اد ءَ نشتگ اِت مات:منی چُک مارا دیر اِنت کہ شھر یل داتگ ھمد ءَ نِشتگ ایں زندگی کنگ ءَ اِیں من:اما شُما شھر پرچا یلہ داتگ؟ بہ گند ئے اے گپ ءَ گوں اما ءَ ھچ نہ گُشت کمو رند ءَ من ءَ پسو دات ئِے مات:مارا چُشیں زَرے نیست کہ ما شھر ءَ بہ نند ایں ءُ زندگی بِہ کن ایں من:اما اِد ءَ زندگی کَنگ گران اِنت ناں دُکانے ھست نیکہ نادراھجاھے نیکہ وانگجاھے کہ تئی چُک بوان اَنت مات:چے کن ایں منی چُک مجبوری اِنت اگاں منی چُک پہ وانگ ءَ بہ رُوت گُڑا مارا لاپ کے دنت مارا لاپ دیوک نیست اِنت بہ گند ئے اے گپ ءَ گوں من سک جیڑگ ءَ اِت آں یا اللّٰہ تو پرچا اے چوش بے وس ءُ بزگ کُتگ اَنت اِشاں ھم زندگی ءِ ھک ھست اِنت من:گونڈل تو چے کار کن ئے اِد ءَ گونڈل:من پسان آں مارا پس ھست 11 دانگ من رو آں چارین آن اِش پد ءَ کایاں من: تئی دل شھر ءَ لوٹ ایت کہ اود ءَ تو برو ئے ءُ بوان ئے؟ اے گپ ءَ گوں گونڈل ءِ ارس درآتک اَنت من پشومان بیت آں کہ اے جُست پرچا کُت من گونڈل ءَ را من داں دیراں نِشت ءُ جیڑگ ءَ اِت آں ھدا او ھدا تو کُجا ئے تو پرچا اے بزگاں نہ گند ئے اے گونڈل ءِ اُمر وانگ ،لیب ءُ گوازی ءِ ئیگ انت اے گونڈل اِد ءَ ایوک انت ھدا اے بزگی ءَ بِمار بلوچ راج ءِ بلے پد ءَ منی ھیال شُت گُلامی ءِ نیمگ ءَ ما گلام ایں داں ما وتی زمین ءِ واجہ وت نہ بہ ایں گڑا ما ھمے وڑ ءَ بَزگ بہ ایں گنوک: نود او نود من: هاں ھال کن گنوک کُجا ئے تو رو ایں کہ سنگت نِشتگ اَنت دیر بوگ ءَ اِنت اے شپ مارا روچ کنگی اِنت من شر رو ایں گُڑا ما پاد آتک ایں مات: منی چُک بہ نند اِت پہ شما ورگ ءِ اڈ کن آں شُما ھچ نہ وارت پاد اَتک اِت-

من: نہ اما ما رو ایں کہ مئے مردم نِشتگ اَنت دیر بوگ ءَ اِنت مات آتک نزیک ءَ دست ئِے چُک اِت اَنت مئے مارا اجازت ئِے کُت ءُ نیک دُوا دات ئے اللّٰہ ءِ میار اِت اللّٰہ شُمارا مدت بات-

من:گونڈل دیم ءِ رند ءَ اگاں سر کپت پہ تو الم چیزے کار ایں گوں بہ گند ئے گونڈل سک گَل بوت گوں اے گپ ءَ ما رھادگ بوت ایں دیم پہ سَپر ءَ سَپر انگت سک دراج اَت مارا نان ھم گوں نیست اَت پہ ورگ ءَ ما دُرست گژنگ ات ایں سنگت ھلاس اِت اَنت بلے مارا جُنزگی اَت گُڑا سنگت نِشت اَنت دم ءِ بال ءَ کنگ ءَ منی چمانی دیم ءَ گونڈل ءُ گونڈل ءِ مات اَت انت یک پیم ءَ من سک جیڑگ ءَ ات آں گڑا پد ءَ رھادگ بوت ایں ما منزل ءَ سر بیت ایں وتی۔

2 سال ءَ پد پد ءَ سر کپت ھمے جاہ ءَ کُڈک کرتگ اَت ابیتکی ات من تہ ءَ شُت اں بہ گند ئے تہ ءَ نِشت آں بلے مات ءُ گونڈل هود ءَ نہ اِت انت من سک جیڑگ ءَ اِت آں بلکیں شھر ءَ شتگ اَنت اگاں شھر ءَ شتگ اَنت گڑا شریں بلے ھر چیزے بہ بیت چم ءِ وت مہ گند ئے ترا جیڈگ پرما ایتت بلے گونڈل ءِ واست ءَ چیزے گون اَت من ءَ پہ دیگ ءَ من چیز گِپت ھمے کُڈک ءِ توک ءَ ایر کُت شریں جاگھے ءَ بلکیں گونڈل بئیت بہ گند ایت ئِے-

برے برے سپر ءِ میان ءَ انچیں کِسہ تئی دیم ءَ کپ ایت تو اجب هیران بہ ئے ءُجیڑ ئے وڑ وڑیں کسہ تی دیم ءَ کیت اِنت بلے سپر وش اِنت من ءَ گوں سپر ءَ مھر اِنت پرچا کہ من وتی زندگی گیشتر گوں سپر ءَ گوازینتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔