تربت: بلوچ نودربرانی زورانسری آوار جنی ءِ بگیری ءَ زھرشانی

کیچ ءَ سیادی داروکیں تربت شھدربرجاہ ءِ نودربر نعیم رحمت، کلیم اللہ، حفیظ بشیر، ایئرڈ شھدربرجاہ روالپنڈی ءِ نودربر فیروز بلوچ، شفیع بلوچ، ڈاکٹر جمیل بلوچ ءُ دگہ بیگواھیں ورنایانی زورانسری آوار جنی ءُ یل نہ کنگے بگیری ءَ مروچی بزاں شمبے ءِ روچ ءَ کیچ ءِ بنجاھی شھر تربت ءَ زھرشانی کنگ بوتگ –

گیشیں ھالانی رِد ءَ چہ پریس کلب ءِ دگ ءَ بیگواھیں مردمانی کھول ءُ سول سوسائٹی ءِ نیمگ ءَ روانک ءِ کشگ بوتگ کہ آئی تہ ءَ بی ایس او ءِ جتا جتائیں ٹولیانی باسک، حق دو تحریک ءِ رھشوناں ھوار زالبولاں بھر زرتگ –

زھرشانی کنوکانی دست ءَ پلے کارڈ ءُ بیگواھیں مردمانی اکس بوتگ انت ءُ آھاں شھر ءِ دگانی سرا اوگام جتگ ءُ زورانسری آوار جنی ءِ بگیری ءَ نارہ ھم جتگ ءُ پدا شھید فدا احمد ءِ چار راہ ءَ اتکگ ءُ زھرشانی ءِ کتگ –

ھمے وھد ءَ بختاور بلوچ، بی ایس او پجار تربت ھنکین ءِ سرکماش باہوٹ چنگیز ، بی ایس او ءِ بنجاھی پتر ءِ باسک کریم شمبے، ھق دو تحریک ءِ وسیم سفر دگہ مردماں تران کتگ ءُ گوشتگ کہ بلوچ جاھل انت آھاں وانگ ءِ شوق نیست بلے مروچی کہ بلوچ ورنا کتاب گوم ءَ مھر کنگ ءَ انت گڈا پہ آھاں زانت ءِ دروازگ بند کنگ بوگ ءَ انت ءُ زندانانی دروازگ پچ کنگ بوگ ءَ انت ءُ دگہ ورنا زانت ءَ دور دارگ بوگ ءَ انت تانکہ بلوچ ورنا کتاب ءِ جاہ ءَ توپک ءَ دست ءَ بہ کن انت –

آھاں گوشتگ کہ مارا زانت لوٹیت توپک ناں پہ مئے ھاتر ءَ زانت ءِ دروازگانی بند کنگے بدل ءَ پچ کنگ بہ بنت –

آھاں گوشتگ کہ ملک ءَ ھما تاکتور اقتدار ءِ سرا انت کہ آ بید زوراکی ءَ دگہ ھچ نہ زان انت – بلوچ زالبول آوار جنگ بوتگ انت، مھلوک دگانی سرا دراتکگ، شھدگ بند بہ کتگ انت – ھنگت ھم وھد ھست کہ بلوچانی سرا زوراکی بند کنگ بہ بیت، آوار جنگ بوتگیں نودربراں ھوار درسیں مردم یل کنگ بہ بنت ءُ آمیدگساں آرگ بہ بنت –

زھرشانی ءَ ھواریں بیگواھیں مردمانی کھول ءُ زالبولاں وتی ھیال درشان کتگ ءُ لوٹ کتگ کہ آھانی دوستیگیں مردم یل کنگ بہ بنت –