بلوچستان ءِ وزیر داخلہ ءَ من ءَ گوشتگ کہ تو پرچا آوار جنگ نہ بہ ئے – ماھرنگ بلوچ

بلوچ یکجھتی کمیٹی ءِ رھشون ءُ ایکٹوسٹ ڈاکٹر مھرنگ بلوچ ءَ گوستگیں روچ ءَ بیگواھیں مردمانی کھول ءُ ایکٹوسٹانی دزگیری ءِ درگت ءَ بوتگیں ٹویٹر اسپیس ءِ تہ ءَ گوشتگ کہ ما شال ءِ ریڈ زون ءَ زالبولانی یل کنائینگے ھاتر ءَ زھرشانی کنگ ءَ بوتگیں گڑا گپ ءُ تران ءَ اتکگیں مردمانی تہ ءَ بلوچستان مشیر داخلہ میر ضیا لانگو ھم ھوار بوتگ – 

 اود ءَ ضیاء لانگو ءَ ھمے گوشتگ کہ سرکار ھما مردماں آوار جنت کہ چہ آئی ءَ سرکار ءَ ھترہ بہ بیت – ماھرنگ بلوچ ءَ گوشت کہ بلوچستان ءِ وزیر داخلہ ضیا لانگو ءَ دیم گوں من ءَ کتگ ءُ گوشتگ کہ تو ہرچا تنی وھدی آوار جنگ ءُ بیگواہ کنگ نہ بوتگے؟  

آئی ءَ وتی ھیال درشان اتگ ءُ گوشتگ کہ من ھمے واست ءَ تنی وھدی  پھریزاں کہ منی باریگ نہ اتکگ – 

ماھرنگ بلوچ ءَ گوشتگ کہ مروچی بلوچستان ءِ تہ ءَ بلوچ مزنیں کچ ءَ ھمے ھاتر ءَ زھرشانی کنگایاں کہ پیسر ءَ لس مھلوک ءَ ھمے سما کتگ کہ بلوچستان ءِ ھاتر ءَ توار چست کنوکاں سرکار آوار جنت بلے نوں ھچ کس پھریز نہ انت کہ آئی ءِ پدریں درور حبیبہ بلوچ ءُ نورجان بلوچ ءِ انت کہ آھانی ھاتر ءَ مزنیں کچ ءَ مھلوک ءَ نندانک جتگ ءُ زھرشانی کنگائیں – 

زانگ بہ بیت گوستگیں روچاں بلوچ زالبولانی زورانسری آوار جنی ءِ ھوار دگہ مردمانی آوار جنی ءِ بگیری ءَ تمپ،  تربت،  پنجگور،  شال ءُ کراچی ءَ نندانک ءُزھرشانی کنگ بوتگ- بلوچ زالبول نور جان ءُ حبیبہ بلوچ ءِ یل بوھگ ءَ تاں اے زھرشانی ھلاس بوتگ انت –