11جون
نبشتہ کار: شھید سلمان ھمل
دی بلوچستان پوسٹ
بلوچ راج دپتر ءِ ھمُک روچ ھونین اِنت اے گُلامیں راج ءِ بچّاں ھمُک روچ پہ وتی زمین ءُ پہ وتی راج ءَ ھون ءُ ھید ریتکگ انت من ءَ لھتے وھد بیت کہ من تھنا آں ءُ منی تھنائی ءِ کسہ چی اِنت بلے آ انوں گُشگ نہ بیت یا نبیسّگ نہ بیت البت مروچی کہ یازدہ جُون اِنت دل ءَ اَت کہ چیزے بہ نویس آں چیزے درانگاز بہ کناں بلے درانگاز ءَ پہ روچ دگہ ھم باز اَت گُڑا یازدہ جُون پرچا؟ اے جُست پیسر کہ شمے وانوکانی دل ءَ بئیت منی جند ءِ دل ءَ اتکگ گڑا ھمے ھاتر ءَ من جیڑ ات کہ اے نویسگ ءُ ھیالانی درشان کنگ ءِ سکین من ءَ اے روچ ءَ پرچا دل ءَ اتکگ دل ءَ پرچا گُشتگ مرچی وتی دل ءِ ھبراں درانگاز کن سال ءُ سیم ماہ ءُ روچ گوز اَنت تو وتی دل ءِ زنگاں ریتک کن ئے برے برے تو وتی دل ءِ ھبر کاگدانی میار کُتگ اَنت یا وتی موبائل ءِ نوٹس ءَ نویستگ ءُ ایر کُتگ اَنت ھمے جُست کہ شمے دل ءَ اِنت ایشی ءِ شوھازگ ءَ من راج دپتر ءِ تاکاں لیٹینان ءَ بوت ءُ لھتے سال پُشت ءَ شُت آں۔
جون ءِ ماہ ءِ بازیں کسہ دست کپتگ یک کسہ ءِ سباء دشتیاری اَت۔ آ بلوچ جنز ءِ کارستانی تہ ءَ ھوار اَت بلے اد ءَ نہ ات! ھو اد ءَ نہ ات من وتی کش ءُ کرّ ءَ چار اِت کسّے ءَ جُست بہ کناں سباء کج ءَ اِنت؟بلے منی کوٹی ءَ چہ من ءَ ابید دگہ کس نیست اَت ۔پد ءَ دل ءَ جَت کہ سبا ءِ شوھاز تئی وس ءِ کارے نہ اِنت تو سبا ءَ بِل وتی سرھال ءِ سر ءَ بہ نویس ، یازدہ جون ءِ سر ءَ بہ نویس۔ بلے یازدہ جُون گوں گْوست ءَ بندوک اَت من ءَ گوست شوھازگی اَت گڑا راہ ءِ دیم ءَ من ءَ سبا دست کپت بلے سبا اد ءَ نہ ات۔ سبا شال ءِ دمکاں نوہ سال پیسر تیراں سُپتگ اَت ءُ ابدمان بوتگ اَت۔ بلے انگت ھمود ءَ اَت ھمے کہ شال ءَ مُچی یے در کیت پہ بیگواھیں بلوچاں سبا ماما ءِ کَش ءَ اوشتوک اَت ماما ءَ ھم سما نہ ات کہ سبا گوں منی کَش ءَ اوشتاتگ پرچا کہ ماما ءَ سبا ءِ اکسے وتی اوتاک ءَ جتگ کہ سبا شھید بوتگ بلے سبا مُچی ءِ بْرات ءُ گْوھاراں گُشگ ءَ ات کہ زورآور ءِ دیم ءَ اوشتگ ءَ امینچو دیت کن اِت زوراک گیشتر توان مند ءُ زورآور بیت پرواہ نیست شما یک ءُ دو اِت بلے وتی کار ءَ برجم اِت وتی جھد ءَ دیم ءَ بران کن اِت گُڑا شما وت کاروان جوڑ بَہ اِت۔ وھدے کہ ھمے شوھاز ءِ تہ ءَ من یازدہ جُون ءَ در بہ گیج آں من ءَ سبا پد ءَ کراچی ءَ دپ کپت کہ پریس کلب ءِ دیم ءَ ھانی بلوچ ءَ گُشگ ءَ ات شاباش منی زھگ من زانتگ شما بے توار نہ بِہ اِت، شما گُنگ نہ بِہ اِت، شما ریفرنس لائبریری ءِ کوٹی ءَ ایریں منی پُچانی ھوناں شموشکار نہ بِہ اِت شما اُوشت اِت شما زورآور ءُ زوراکانی دیم ءَ توار چست کن اِت۔
بلے من انگت یازدہ جُون ءَ سر نہ بوتگ اِت آں کہ راہ ءِ دیم ءَ من ءَ ھیر بکش دست کپت ءُ واجہ گٗشگ ءَ ات کہ منی اے کلوہ ءَ بے ھال مہ بہ ات کہ گوں نزور ءُ کم دستی زورآور ءُ زوراکاں سُھل ءُ تران نہ بیت سُھل ءُ تران دو ھم کدّیں راجانی میان ءَ بیت۔ من ھاموشی ءَ ھیربکش ءَ گْوشدارگ ءَ اِت آں کہ من ءَ ھیر بکش ءَ نرم نرم ءَ پہ ھلوت گُشت کہ اے جنگ ءَ مدار اِت اے جنگ بِلے روان اِنت اے بری اے جنگ اگاں اوشت ءِ آماچ بوت یا اگاں ایشی ءِ روانی پْرشت گڑا زوراک شمارا انچش کنت کہ شما پد ءَ سر چِست کُت نہ کن اِت ھیربکش من ءَ گُشگ ءَ اَت کہ برو مردماں ھال دئے کہ چہ اے جنگ ءَ ما پْروش نہ وارتگ۔ اے جنگ انگت دیم ءَ جنزگ ءَ اِنت م۔ما یک روانیں جنگ ءِ کنگ ءَ اِیں، دل پروش مہ بَہ اِت جنگ ءَ دیم ءَ بر اِت ھیر بکش انگت ھبر ءَ اَت کہ ورناھاں بُگش اے جنگ شمے کوپگان اِنت تپنگاں کَپگ ءَ مئیل اِت یکے شھید بوت گڑا دگہ یکے آئی توپک ءَ بڈّ ءَ کن اِت چوناھا ھیر بکش ءِ ھبر باز اِت اَنت بلے من ءَ روگی اَت انگت دیم ءَ یازدہ جون شوھازگی اَت اے میان ءَ اتکگیں آ دگہ ماہ من سرگوز کُت اَنت ءُ جون بس چاران کُت۔ منی سر یازدہ جُون نوزدہ سد ءُ ھشتاد ءُ یک ءَ کپت(1981) اد ءَ منی مجلس گوں شھید ھمید ءَ بوت۔ شھید ھمید گُشگ ءَ ات کہ اے وھد ءَ منی مرگ ءَ ھشت ساھت پش کپتگ بلے من انگت اے کلوہ پہ وتی راج ءَ نویسگ ءِ جھد کُتگ۔من لوٹ اِتگ منی راج بزانت کہ من پرچا مِرگ ءَ آں۔
من ءَ گُشت ئِے کہ اے ساھت ءَ من اے کلوہ ءِ نبیسگ بندات کُتگ منی چپ ءُ چاگرد ءَ تُپنگی ئیں مردم پانگ بوتگ اَنت پہ من چہ آجوئی ءَ مِرگ ھزار سری شرتر اِنت من وتی راج ءَ پہ نبشتگ کہ آجوئی ءِ سُھب پہ شما بے دیم ھونی ءَ نئیت آجوئی ءِ ھاتر ءَ شمارا دیم ھونی دیگ لوٹ ایت ۔من پہ گل جان ءَ کاگدے نبشتگ اَت ءُ چہ سلام ءَ پد من گُشتگ اَت کہ امیت اِنت تو ءُ ناکو وش ءُ جوڑ بہ اِت مروچی من نشتگ اِتاں شما یات اتک اِت گُشت پہ شما کاگے بہ نبیس آں پہ شما کاگد ءِ سیاه کنگ ءَ کاگد ءُ کلم چست کُت انت۔ امیت کناں کہ تو پسو ءَ دئے ءُ شُما گیش تِر ھبر کنگ ءِ موہ من ءَ دے اِت گْوادر ءِ جاورانی بابت ءَ ھم سرپدی دے اِت۔ دگہ راستاں اِد ءَ کاگد سر بوھگ ءَ پیسر چار پنچ جاہ ءَ وانگ ءُ گوشدارگ بنت ءُ نوں زندانیاں سر بنت نوں بس من وتی بابت ءَ گُشاں کہ انگت من ءَ سزا نہ بوتگ ءُ ناں کہ دات کن اَنت۔ بلے پد ءَ ھم ھر وڑیں سزا دات ئے پہ چم۔ بلوچستان زندگ بات۔ بی ایس او زندگ بات۔ زپار زندگ بات۔ زپار ءُ بلوچ برات اَنت ھمید گُشگ ءَ ات اے منی اولی کلوہ اِنت من پہ گل جان ءَ نبشتگ۔ چہ ایشی ابید ھم من بازیں کاگدے نبشتگ منی راج ءَ بگش منی کاگداں بوان اِت ءُ وتی جھد ءَ دیم ءَ بہ بر اِت۔ من ھمید ءَ گُشت گڑا یازدہ جون ءَ چی بوتگ ھمید ءَ گُشت کہ یازدہ جون ءَ من ءَ پاھو دیگ بوتگ بلے من وتی چمانی دیم ءَ سیاھیں پُچ نہ بستگ ءُ گُشتگ م ءَ نہ تُرس ایت من وتی مرگ ءَ وت گِندگ لوٹ آں ۔من پاھو ءِ ساد چُک اِتگ ءُ گور ءَ کُتگ ۔نوں من زانت کہ یازدہ جُون ءَ پرچا من ءَ دل ءَ سکین داتگ کہ چیزے بہ نویس ۔یازدہ جون راج دپتر ءِ اَنچیں تاکے گوں ھر آؤکیں روچ ءَ نوک بیت۔ منی راج پوہ سرپد اِنت کہ پہ ڈیھ ءِ ھاتر ءَ پاھو چہ سُھر ءَ شرتر اِنت۔ بلے یات بدار اِت اے پاھو ءُ مرگ پہ آجوئی ءُ پہ ڈیھ ءَ لھتے وش بھت ءَ رس ایت ۔اے ھرکس ءَ نہ رس ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔