نبشتانک: بے ترا زندمان ابیتکیں جنگلے
نبشتہ کار: کادر ھسرت
دی بلوچستان پوسٹ
منی نز ءَ من یک ستکگیں ءُ ابیتکیں جنگلے ءِ تہ ءَ آں کہ اے جنگل ءِ تہ ءَ یکے من آں ءُ بس تئی داتگیں گم ءُ رنج اَنت نئیکہ چہ دور ءَ یک شپانکے زاھر بیت من آئی ءِ دیوان ءَ بہ نند آں ھمے شپانک وتی بزگلاں بہ دوش ایت من ءَ شیری چاھے بہ وارین ایت من پد ءَ آئی ءِ کِر ءَ تئی مھر ءُ وپایانی کسہ ءَ بہ کن آں کپوتے ھم کوکو نہ کنت کہ ساھتے من آئی ءِ توار ءَ گوں دلگوش بہ باں
اھدی کماشیں مردے ھم اے ابیتکیں جنگل ءَ کاہ ءَ نئیت کہ من ءَ شئے مرید ءُ ھانی ءِ شیرین ءُ پرھاد، سسی ءُ پنو ءِ کسہ ءَ بہ گْوش ایت، پیریں بَلُکے ھم گندگ نہ بیت لیلوے بہ گْوش ایت منی دل ءَ بہ ساڑین ایت-
واجہ مبارک کازی ءِ وڑیں زانتکاریں شائرے ھم چہ اے جنگل ءِ ابیتکیں کشکاں نہ گْوز ایت کہ شریں شئیرے بہ وان ایت من چہ آئی ءِ شئیر ءَ ملمہ بہ باں سبزیں درچکے ھم نیست کہ من چیر ءِ بہ نند آں ندے ءُ کاگدے بزیر آں تئی نام ءُ تئی زیبائی ءِ سر ءَ یک شوکیں لچھے نبشتہ بہ کن آں کہ تو ھمے لچہ ءَ بہ وان ئے ترا گوں من مھر بہ بیت ءُ پد ءَ تو منی ھمے نبیس اتگیں لچہ ءَ وتی دزگْوھاراں پیش بہ دار ئے ءُ بہ گْوش ئے ھست یک اِشکی گنوکے مئے میتگ ءَ منی اِشک ءَ گنوک اِنت منی اِشک ءَ آئی ءَ را لچھے ءِ بندگ ءَ سکین داتگ تئی دزگْوھار تئی اے گپ ءَ بہ اِشکن اَنت تئی سر ءَ کلاگ بہ بند اَنت ءُ بہ گْوش اَنت تھنا تو وَ مئے میتگ ءِ تہ ءَ شررنگیں جنکے نہ ئے بہ گند ئے آ اِشکی گنوکیں شے مرید ءَ پہ وتی شررنگیں ھانی ءَ اے لچہ نبیس اِتگ وھدیکہ تو آیانی گپاں بہ اُشکن ئے آیانی سر ءَ زھر بہ گِر ئے منی نبیس اِتگیں لچہ ءَ چہ وتی پندول ءَ بہ کش ئے بہ دِر ئے دیوان ءَ چہ پاد بیا ئے آیاں بس ھمے پسو ءَ بہ دے ئے اگاں آ اِشکی گنوکیں شئے مرید لچہ بند ایت گڑا بس پہ من ءِ ھانی ءَ بند ایت ایندگی روچ ءَ تو من ءَ وتی لوگ ءِ دمک ءَ بہ گند ئے منی دست ءَ بہ گرئے وتی سر ءِ سر ءَ ایر بہ کن ئے ءُ بہ گْوش ئے منی سر ءِ کسم ءَ بہ ور کہ تو تھنا منی واست ءَ لچہ ، آزمانک ءُ نبشتانک نبیس ئے یکیں من ءَ وتی دل ءِ تہ ءَ جاہ دئے دگہ کسے ءِ واست ءَ وتی ند ءَ کارمرز نہ کن ئے من بچکندگے بہ جن آں تئی دست ءَ وتی سر ءَ چہ دور بہ کن آں وتی لنٹاں گَٹ بہ پاچ آں ءُ ترا ھمے پسو ءَ بہ دے آں اے گنوکیں شئے مرید بس تئی ھیالاں گوں بندیگ اِنت بس وتی ند ءَ تئی مھرانی ءُ تئی زیبائی ءِ سر ءَ کارمرز کنت بس ترا وتی دل ءِ تہ ءَ نادینتگ ئِے کور بات اَنت اے آشک ءِ چم اگاں دگہ یکے ءَ بچار اَنت ءُ دست ئِے ھشک بات اَنت –
اگاں دگہ مھرمے ءِ واست ءَ وتی ند ءَ کارمرز کنت تو منی ابیتکیں زندمان ءِ کندیلے چوناھا منی زندمان ابیتکیں جنگلے اگاں تو بہ لوٹ ئے تئی مھر منی اے ابیتکیں جنگل ءَ روژناہ کن اَنت ءُ من ءَ چہ اے ابیتکیں زندمان ءَ چہ آزات کن اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔