نبشتانک: بی این ایم ءُ خلیل بلوچ ءِ کِرد
نبشتہ کار: زیردان بلوچ
دی بلوچستان پوسٹ
“چو ھما کونج ءَ کہ سِستگ چہ رم ءَ”
“پہ وتیگاں تلوسان ءَ اِے کَے اِنت”
اے منی وش بھتی ءُ زندمان ءِ بھشتیں روچ اِنت کہ بی این ایم ءِ کاروان ءَ ھوار بُوَگ ءِ وھد ءَ راجی راھشُون واجہ خلیل بلوچ ءُ واجہ ڈاکٹر منان بلوچ ءَ گوں دیدار بوت، پرے ھاترا من کہ وھدے گْوست ءِ آتراپ ءَ سرکشّ آں گُڑا واجہ خلیل بلوچ ءُ واجہ ڈاکٹر منان بلوچ منی چمّانی دیم ءَ پدّر بہ اَنت۔
پمیشکا من اے گپ ءَ پہ پھر گْوش آں کہ بی این ایم مرچی کہ اے جاہ ءُ سِیمسر ءَ سر اِنت، چہ واجہ گُلام مھمد ءُ لالا منیر، ءُ آئی سنگتاں چہ پد اے ھمے لاگر بالادیں راجی راھشون خلیل بلوچ ءُ واجہ ڈاکٹر منان بلوچ ءُ آئی کاروان ءِ سنگتانی شپ ءُ روچ ءِ جُھدانی برورد اِنت۔ چوش کہ رسانکدر ءُ اے دِگہ دیوان ءُ کچاریاں بازیں بالاداں اے گْوشتگ اَت کہ بی این ایم چو پیسریگیں داب ءَ جُنزگ ءَ نہ اِنت، بلکیں اُوشت ءِ آماچ اِنت، بلے اے نگیگیں جاورانی تہ ءَ بی این ایم ءِ راجی مجلس (کونسل سیشن) ءَ پدّر کُت کہ راجی راھشُون واجہ خلیل بلوچ ءُ آئی ءِ ھمراھیں سنگتانی جُھد ءُ کُوشستاں بی این ایم تھنا درملک ءَ ناں بلکیں ماتیں گُلزمین ءِ ھر ھند ءُ دمگ ءَ ساڑی ءُ گوں نوکیں ھِکمت اَمَلیاں ( حکمت عملیاں ) دیم پہ آجوئی ءِ مِنزل ءِ نیمگ ءَ جُنزگ ءَ اِنت۔ پمیشکا من اے گپّ ءَ ھزار رند ءَ گْوش آں کہ واجہ خلیل بلوچ ءِ راھشُونی ءُ راھدربری انگت مارا درکار ءُ زلورت اِنت، چی ءَ کہ واجہ ءَ گوں وتی سیاسی زانت ءُ زانگ ءَ ھوار اے پند ءَ بازیں جھل ءُ بُرزی، سنگتانی شھادت، دُژمِن ءِ بیھار ءُ پادتراپ، سکّی ءُ سوری، دوستانی سِکین ءُ دِلبڈّی، دوتل ءُ دوپُوستانی تژن ءُ پیگور کُل دیستگ اَنت، بلے پہ بچکند دیم ءَ جُنز اِتگ ءُ چہ وت ءَ گیش راجی نپّ ءُ سیتانی بابت ءَ جیڑ اِتگ ءُ دیمونی داتگ۔
مرچی من اگاں اے گپّ ءَ بِہ گْوشاں کہ واجہ خلیل بلوچ بلوچ راج ءِ ھما راھشُون اِنت کہ آئی ءِ اے راجی جُنز دِگہ دْروشمے داتگ رد نہ بہ آں، چی ءَ کہ مرچی بلوچ راجی جُنز ءِ اندر ءَ کُجام سِلاھبندیں گل گوں دُژمِن ءَ جنگ ءَ اِنت، آئی ءِ تہ ءَ ترا چہ بی این ایم ءِ پتّر ءُ سرکل ءَ رُدوم زُرتگیں سیاسی ءُ بودناکیں سنگت دست کپ اَنت کہ آ جنگ ءِ پِڑ ءَ ساڑی ءُ اے راجی جُنز ءَ دیم ءَ برّگ ءَ انت۔
اگاں انگت کسے بِہ گْوش اِیت کہ بی این ایم ءَ راجی جُنز ءِ اندر ءَ جوانیں کِردے پیلو نہ کُتگ، گُڑا من اے گپّ ءَ الم گْوش آں کہ آ گوں وتی جِند ءَ راستی ءِ درشان کنگ ءَ بے سوب بیتگ۔ چی ءَ کہ من مرچی کُجام سِلاھبندیں گل ءَ کہ چمشانک دیان ءُ چاراں، تہ من ءَ الم اُود ءَ جپا کشّیں ورناہ، چہ بی این ایم ءِ پتّر ءَ رُدوم زُرتگیں سنگت گِندگ ءَ کیت، پرے ھاتِر ءَ من گْوش آں کہ اے راجی راھشُون واجہ خلیل بلوچ ءِ جُھدانی مُزّ اِنت کہ بی این ایم یک راجی پارٹی ءِ بُوَگ ءَ سوبین بوتگ، ءُ ھمے اُمیت ءَ داراں کہ دیمتِر ءَ ھم گوں ھمے لیکہ ءَ دیم ءَ جُنز اِیت۔
مرچی بلوچ نیشنل موومنٹ ءِ سرکماشی ءِ مھار چہ واجہ خلیل بلوچ ءِ بدل ءَ نوک گچین بوتگیں سرکماش ءِ دست ءَ اِنت، بلے ھمے ٹیم ءِ تہ ءَ ھما سنگت ھم ھوار اَنت کہ آیاں واجہ خلیل بلوچ ءِ ھمراھی ءَ بی این ایم اے نگیگیں جاورانی تہ ءَ مھکم کُتگ ءُ اے جاہ ءَ سر کُرتگ، چہ آیاں من ھمے اُمیت داراں کہ آ انگت بی این ایم ءِ مھکم کنگ ءُ دیمروئی دَیگ ءِ واستا وتی جُھد ءُ کُوشست ءَ ھما پیم ءَ برجاہ دار اَنت ءُ اے گپّ ءَ سابت کن اَنت کہ ما چہ واجہ خلیل بلوچ ءِ سیاسی پتّر ءَ ھمے دربُرتگ کہ مئے زند ءِ لیکہ ءُ مکسد بی این ایم ءِ مھکم کنگ ءُ راجی جُنز ءِ دیم ءَ برّگ اِنت، اگاں اے سپر ءُ پند ءَ چونیں کہ مُشکلے بئیت، پہ آئی ارزان کنگ، گیش ءُ گیوار کنگ ءَ گاماں دیم شھار دئیں ءُ دُژمِن ءِ ھر رپک ءُ پندلاں بے سوب کن اِیں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔