نبشتانک: راج ءِ مادر شھید شاری پنام برمش ءِ کرد ءُ بلوچ راجی جُنز ءِ لوٹ
نبشتہ کار: اسد ابدال
دی بلوچستان پوسٹ
چہ درستاں پیش مادر ء وتن پدائی شھید بانک شاری پنام برمش ءِ جُھد ءَ سُھریں سلام پیش کناں گوں راجی کُل شھیداں ھوار-
ما راجدپتراں بہ چاریں یا زانتکار ءُ کواسانی لیکھانی نیمگ ءَ وتی نگاھاں بہ ترّینیں تَاں مارا ھمے گندگ ءَ کیت ھمے چیز مئے پھم ءَ کیت کہ وھدے آ راج ءِ زلبول کہ وتی مردینانی ھمکوپگ جوڑ بنت گڑا آ راج ءَ ھچ پیمیں زور ءُ تاکت پروش دات نہ کنت ھمے پیم مرچی اگاں ما بہ چاریں وش بھتی ءَ بلوچ راجی جُنز ءِ تہ ءَ زالبولانی یک بلاھیں کردے ءُ آھانی جھد ءُ داتگیں کربانی لک ستا کرز انت کہ مدام دشمن ءِ دیم پہ دیم ءَ اوشتگ ءُ زھرشانی پُشت ءَ زھرشانی کنگ چو کہ شھید بانک کریمہ ءِ دروشم ءَ یا انگت کامریڈ بانک مھرنگ ءُ بانک سمّی یا دگہ ھزاراں گوھار دشمن ءِ چمانی تہ ءَ وتی چماں ڈکین انت ءُ تچک ءَ تچک وتی گپاں کن انت ھما زوراکی کہ بلوچ ءِ سر ءَ بوگ ءَ اَنت ھما گپاں تچک ءَ تچکیں دابے ءَ بیان کنگ ءَ ھچ چَک ءُ پد نہ بنت نہ تُرس نہ ججک پد ءَ دومی نیمگ ءَ شھید پدائی بانک شاری ءِ کرد وت یک بلاھیں جیڑھے پہ دشمن ءَ ءُ دشمن ءِ داشتگیں چانیگ واراں ءُ دشمن ھم زانت کہ من اے راج ءِ سر ءَ اینچو زوراکی نہ کتگ کہ اے ھبر نا ممکن بہ بیت کہ بلوچ زالبولے ءَ پدائی کتگ ھو زوراک ءِ گیشیں زوراکیانی سوب ءَ بانک ءَ اے گامگیج زرتگ بلکیں ھزاراں شاری ھست کہ آھانی سر ءَ انچیں زوراکی بیتگ یا انگت بیگ ءَ اِنت کہ آ بابت ءَ گوشگ ءُ بیان کنگ ءَ گال ھم نیست آھانی کہ ھاندانانی ھاندان جنگ ءُ تباہ کنگ بیگ ءَ اَنت سرجمیں لوگ ءِ یک پردے ھم نہ منتگ سرجمیں مردین تاں تپلیں زھگاں ھم دشمن نہ بکشگ ءَ اِنت درستاں وتی زوراکیانی نشانگ جوڑ کنگ ءَ اِنت درست دشمن ءَ وتی ارجان جتگ اَنت لوگ ءُ جاگہ سرجم ءَ مانداشتگ اَنت گڑا سرجمیں ٹکّ ءِ اے یکیں پشت کپتگیں زالبول یا مرد ءِ واست ءَ دگہ چی راہ پَشت کپت کنت؟-
منی اے جست پہ ھماھان اِنت کہ اے پیمیں کرداں ایر جن اَنت ءُ بے سریں مناپکت کن انت ءُ زوریں چست ءُ ایر جوڑ کنگ ءِ بے سوبیں جھد کنگ ءَ اَنت من ھماھاں اے گوشگ لوٹاں کہ جُنزانی تہ ءَ اے پیمیں لوٹ دیم ءَ کایَنت اے لوٹانی پیلو کنگ پہ راج ءِ ھر بنیادم ءَ ھژدری اِنت وھدے کہ آ راج ءِ توامیں راہ ءُ در بند کنگ بنت آ ھرچ نیمگ ءَ دشمن ءِ انگرّان بیت ءُ ھرچ دابیں زوراکی کہ آ راج ءِ سر ءَ بوگ ءَ اِنت ءُ آ زانت کہ منی تھنا یک (کلاشنکوفے) یا کہ یک (ایل ایم جی) یے دشمن ءِ نوکیں ٹیکنیکل سسٹمانی دیم ءَ داشت نہ کن اَنت گڑا پہ آئی ءَ گُڈسر ءَ ھمے یکیں راہ پشت کپ ایت کہ مرگ ءَ وتی دستاں گوں زیرگ ءُ دشمن ءِ دیم ءَ درایگ ءُ وت ءَ پدا کنگ ءُ دشمن ءِ پالیسیاں نیست ءُ نابود کنگ انچوشکہ اے انیگیں ھبرے کہ یوکرین ءِ یک سپاھیگے روس ءِ لشکر ءِ پیش کدمی دارگ ءِ واست ءَ یک پُھلے تباہ کنگ ءَ پدائی کنت ءُ دشمن ءِ پیش کدمی ءَ داریت دنیا آئی ءِ مزمت ءَ نہ کنت بلکیں آئی ءِ پلامرزی ءَ کنت گڑا بلوچ پرچا اینچو زلم ءُ زوراکیانی سگّگ ءَ پد اے کار ءَ کت نہ کنت اے کار پہ بلوچ ءَ پرچا بَد اِنت من ھمے سرپد باں شھید بانک شاری بلوچ ءِ اے کرد ءَ دنیا ءِ ھمک راجدپتر ءِ تہ ءَ پہ وت جتا یک نوکیں بابے ٹھینتگ بانک ءِ اے کرد ءَ توامیں دنیا سرپد کتگ کہ من یک زندگیں راجے آں من ءَ وت ءَ را جتا زبان ھست من ءَ وت ءَ سرزمین ھست من ءَ وت ءَ رسم ءُ رواج ھست ءُ راجدپتر ھم اے چیز ءِ گواہ اِنت کہ بلوچ ءِ وتی جتائیں ریاستے بیتگ ءُ پہ زور ءُ مکر ءُ ھیلہ بلوچ ءِ سرزمین دزگیر کنگ بیتگ ھما اِنت کہ بلوچ کربانیانی پُشت ءَ کربانی دیگ ءَ اِںت ءُ تاں ڈیھ آجو نہ بیت اے کشت ءُ کوش ءِ درچ انچو برجاہ مانیت دشمن ءَ ءُ اے دگہ سرجمیں جھان ءَ ھرچ داب ءَ اے چیز منّگ کپ اِیت کہ ھو بلوچستان جتا یک ریاستے بیتگ ءُ جتا یک ریاستے ھست اِنت پدائی شھید شارُل ءَ وتی زالبولی جاہ ءَ ءُ دو زھگانی ماس بوگ ءَ باوجود ھم اے گامگیج پہ بلوچ راج ءِ ننگ ءُ ناموس ءُ وتی سرزمین ءِ آجوئی ءِ واست ءَ چست کت بانک ءِ اے گامگیج دنیاءِ ھمراھی ءَ پہ بلوچ راج ءِ ھر تبکہ ءِ پکر ءِ واست ءَ ھمے کلوہ اِنت کہ ما باید ھچبر وت ءَ را کمزور مہ لیکیں ھچبر اے گپ ءَ مہ کنیں کہ سر گوں سنگ ءَ میڑینگ نہ بیت یا اے ھبر کہ من ءَ چی کار ءُ اے ودار ءَ مہ بئیں تاں کہ منی گس ءَ دشمن یکے بیگواہ بہ کنت یا اوار بہ جنت گڑا من پاد کایاں انّاں بلکیں راج ءِ ھرچ بنیادم ءِ سر ء ھرچ پیمیں زوراکی کہ بوگ ءَ اِنت ھمے بہ پھم کہ اے منی یا منی کھول ءِ گوم ءَ بوگ ءَ اِنت انچوشکہ بانک شارل ءَ پھم اِتگ شارُل یک وانندہ تبکھیں گسے ءِ زھگے اَت وت ھم (ایم فل) کتگ بیتگیں زالبولے اَت ءُ بانک ءِ لوگواجہ ڈنٹسٹ ڈاکٹرے ءُ کھول ءِ مردم بزاں براس پِس اے دگہ جوانیں جوانیں پوسٹانی سر ءَ اَنت ءُ بزاں شھید بانُک چہ یک وانندھیں ٹکے ءِ زھگے اَت ءُ وت ھم یک جوانیں وانندہ ءُ پُھتو پکریں شیرزالے اَت پمشکا بانک ءَ اے گامگیج زُرت پرچا کہ آ باز سرپد اَت بانک ءَ زانتگ پھم اِتگ ءُ مار اِتگ بیتگ بانک ءَ ھرچ بلوچ مھلوک ءِ سوز وتی جند ءِ سوز پھم اِتگ انت پمیشکا چو اے پیم بانک ءَ وت ءَ ندر کت ءُ جنز ءَ را نوکیں رنگے دات-
نی باید اِنت کہ بانک ءِ برات گیرت ءِ جامگ ءَ گورا بہ کن اَنت ءُ پہ دلیری دشمن ءَ چم پیش دارگ ءِ جرات ءَ گیشاں چہ گیش وتی تہ ءَ جاگہ بدی اَنت ءُ آ کہ اَنا ءِ شکار اَنت باید آ اے بیماریاں چہ وتی تہ ءَ بہ کشّ اَنت کہ من مستر یا آ کستر جی ناں اد ءَ درست یک اَنت مرچی درست گوشدارگ ءُ منّگ بنت اگاں آ یک زھگے آئی ءِ گپ اگاں وزن دار اِنت آ ھم منّگ بیت یا زالبولے بہ بیت آ ھم گوشدارگ ءُ منّگ بیت آ کہ گریب ءُ درتہ پُچّے آھم گوشدارگ ءُ منگ بیت باید اِنت کُُل بلوچ راج وت ءَ یکجاہ ءُ یک مُشت بہ کنت ءُ وتی کسان کسانیں اھتلاپاتاں تھمیری دروشم بدے اَنت کینگ داری ءُ بندداری ءَ درست چہ وتی دلاں بہ کشّ اَنت ءُ وت مہ وت نزیکی ءُ یکجاھی پیداک بہ کن انت تپاکی ءَ وتی دلانی تہ ءَ جاہ بدے اَنت ءُ اے بابت ءَ بزاں بلوچ آجوئی ءِ جھد ءَ دیم ءَ برگ ءِ ھاتر ءَ کُل بلوچ راھشون یکجا بہ نند انت ءُ ھما کہ بلوچ جنز ءِ لوٹ انت آھانی پیلو کنگ ءَ بہ جیڑ اَنت ءُ جوانیں کار سر انجام دیگ ءِ واست ءَ وتی وتی لیکھاں ایر بہ کن اَنت پہ بلوچ جنز ءَ دیم ءَ برگ ءُ تچکیں راہ ءَ رسینگ واست ءَ باید ھر بلوچ پہ ایمانداری وتی وتی گنجاھش ءَ ھمینچو جھد کت کنت بہ کنت گڑا ھچ تاکت بلوچ ءَ پروش دات ءُ بندیگ کت نہ کنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔