داں پوج ساڑی انت ما ڈوٹی نہ دئیں- ینگ ڈاکٹرز

یکشمبے ءِ بیگاہ ءَ ڈاکٹر سمیع، ڈاکٹر جہانزیب، ڈاکٹر مقصود رئیسانی ءُ دگراں شال ءِ پریس کلب ءَ گوں اھوالکاراں تران کنان ءَ گوشتگ کہ ینگ ڈاکٹرز ءُ پیرامیڈیکل سٹاف فیڈریشن بلوچستان ءِ سرکاری نادراھجاھاں آسراتی ءِ نہ بوگ ءِ سوب ءَ مدامی زھرشانی کنگ ءَ انت اے میان ءَ ڈاکٹرز ءُ پیرامیڈیکس ءَ زھرشانی کتگ گڑا دزگیر کنگ ءُ ماھے ءَ زنداناں بندیگ کنگ بوتگ انت –

آھانی گوشگ ات کہ ینگ ڈاکٹرز ءُ سرکار ءِ میان ءَ گند ءُ نند بوتگ کہ ڈاکٹرانی لوٹانی پلامرزی بوتگ ءُ ڈاکٹرانی گوم ءَ مسام کنگ بوتگ بلے روچ مروچی مسامانی سر ءَ گامگیج زورگ نہ بوتگ چریشی ءَ پد لاچاری ءَ یکرندے پد ءَ ینگ ڈاکٹرز ءُ پیرامیڈیکل سٹاف فیڈریشن ءَ زھرشانی روانک ءِ کش اِتگ کہ پولیس ءَ آھانی سر ءَ لٹ شاپی کُتگ ءُ دزگیر کتگ انت ءُ مدامی ئیں وڑ ءَ یکرندے پد ءَ گند ءُ نند کنگ بوتگ ءُ سرکار ءَ کول کتگ کہ چیزے روچانی میان ءَ گامگیج زورگ بیت اِنت بلے چِل ءُ پنچ روچ پرگوستگ ھچ وڑیں گامگیج زورگ نہ بوتگ گڑا پد ءَ ڈاکٹراں زھرشانی کتگ ءُ پولیس ءَ پانزدہ ڈاکٹر دزگیر کتگ ءُ زندانی کتگ انت ءُ پد ءَ اشی ءَ چہ یکروچے ءَ رند پولیس ءَ شال ءِ سول نادراھجاہ ءَ مئے پُرایمنیں بنجاھی زھرشانی بنجل ءَ بیڑ برتگ چِل ڈاکٹر ءُ پیرامیڈیکس دزگیر کتگ انت –

آھاں گوشتگ کہ نادراھجاھانی بندی، نادراھانی کم شرپی ءُ ڈاکٹر ءُ پیرامیڈیکس ءِ سر لٹ شاپی ءَ جانسلامتی سیکرٹری ءِ دست مان انت کہ آئی چیزے ملام زوروک گوں جانسلامتی ءِ کارکنوکاں قومیت ءُ لسانیت ءِ نام ءَ بھر بانگ کنگے جھد انت ءُ جانسلامتی ءِ سیکرٹری ءَ محکمہ کرپشن ءِ گڑ جوڑ کتگ –

آھاں گوشتگ کہ سرکار ءَ ھمے زوتاں جانسلامتی ءِ سیکرٹری اگدہ ءَ پچ بہ گیپت –

آھاں گوشتگ کہ سرکاری نادراھجاھاں دانکہ ایف سی ءُ پولیس ساڑی انت ینگ ڈاکٹرز ءُ پیرامیڈیکس ھچبر ڈوٹی نہ دئے اَنت –

آھاں اے ھم گوشتگ کہ دانکہ جانسلامتی ءِ سیکرٹری ساڑی انت ینگ ڈاکٹر ءُ پیرامیڈیکس سٹاف ھچ وڑیں گند ءُ نند بھر جوڑ نہ بنت – آھاں گڈسر ءَ گوشتگ کہ ھمے زوتاں درسیں سوبھانی ینگ ڈاکٹرز ءُ پیرامیڈکس ءَ گوں وت زوریں زھرشانی جار ءَ جنیں –