کیچ ءَ دو سرکاری ملازم پوج ءِ دست ءَ بیگواہ کنگ بوتگ اَنت

بلوچستان ءِ دمگ چہ کیچ ءَ پاکستانی پوج ءَ دو برات زورانسری آوار جنی ءِ نشانگ کتگ ءُ بیگواہ کتگ اَنت-

سربوتگیں ھالانی رِد ءَ بیست ءُ یک مارچ ءِ شپ ءِ ساھت سے ءَ پاکستانی پوج ءَ تربت ءِ دمگ آبسر بلوچی بازار ءَ بیڑبرتگ ءُ دو برات زورانسری آوار جتگ ءُ بیگواہ کتگ اَنت – بیگواہ کنگ بوتگیں دوئیں براتانی پجّار ریاض رضا ءُ نیاز رضا ناماں چہ بوتگ اَنت-

اِھوالکارانی رِد ءَ دوئیں برات سرکاری ملازم اَنت آیانی تہ ءَ ریاض لیویز فورس ءِ کمشنر کارگس ءَ وائر لیس آپریٹرے- نیاز رضا پاکستان نیوی ءِ گوستگیں ایس ایس جی کمانڈوے ھم بوتگ ءُ انّو ٹاسک فورس پرائز کنٹرول کمیٹی انچارج بوتگ-

دومی نیمگ ءَ گوستگیں روچاں پنجگور ءِ دمگ چہ پروم ءَ پاکستانی پوج ءِ دست ءَ آوار جنگ بوتگیں ظہور ء محمد علی ، اصغر ء محمد علی ، اشفاق ء عبدالخالق ءُ شکور ء عبدالغفور آجو بوتگ ءُ وتی لوگاں سر بوتگ اَنت-