سیندک: چینی کمپنی ءِ ھلاپ ءَ زالبولانی زھرشانی برجاہ، دامگ بند

سیندک پراجیکٹ ءَ چینی کمپنی ءِ پابندیانی ھلاپ ءَ زھرشانی درچ سرجمیں شپ ءَ برجاہ بیتگ ءُ دمگ ءَ دامگ ماٹو کنگ بیتگ-

چینی کمپنی ءِ ھلاپ ءَ زھرشانی نوکیں درچ گوستگیں روچ ءَ بندات بیتگ اود ءَ زالبولاں بازیں کچے ءَ دَہ کلو میٹر ءَ پند ءَ روانک بر اِتگ ءُ وتی زھرشانی یاداشت کنائینتگ، دمگی مردمانی رد ءَ دمگی میراں زالبولاں گاڑی نہ دیگ ءِ سر ءَ زالبولاں پند ءَ روانک کش اِتگ-

کمپنی ءِ ملازمین سائٹ ءِ تہ ءَ زھرشانی ءُ نندانک اش جتگ ءُ ھمے وڑ آیانی زالبولاں ڈن ءَ زھرشانی ءَ نشتگ اَنت اے زھرشانی داں گوستگیں شپ ءَ برجاہ بیتگ – دمگی اھوالکار ءِ رد ءَ دمگ ءَ یوفون موبائل سروس ءُ پی ٹہ سی ایل انٹرنیٹ ھم بند کنگ بیتگ گپ ءُ ترانی بازیں وھد بیتگ اَنت بلے گپ سرجم نہ بیتگ-

چینی کمپنی ءِ پالیسیانی ھلاپ ءَ زھرشانی گوستگیں روچاں زالبولانی نیمگ ءَ بندات کنگ بیتگ – زھرشانی کنوکانی گوشگ اِنت کمپنی ءِ ملازماں شش شش ماہ ءَ داں لوگاں آیگ ءَ نیلگ ءَ اِنت ھمے وڑ دمگی مردماں جانسلامتی ءِ واستا سیندک ھسپتال ءَ ھم نیلگ اِنت ءُ دمگ ءَ ایس او پیز ءِ نام ءِ سر ءَ دمگ ءَ سرجم ءَ تر ءُ تاب بند کنگ بیتگ دمگ سرجم ءَ بندیگجاھے جوڑ کنگ بیتگ-

ٹی بی پی ءَ اے ترندیں باپندیانی بارو ءَ جست ءُ پرس کتگ یک دمگی اھوالکارے ءَ جست گپتگ آئی ءَ گوشتگ گوستگیں روچاں نوشکی ءُ پنجگور ءَ بیتگیں اُرشاں پد اے پابندی گندگ ءَ اتکگ اَنت ھمے وڑ ملازماں پیسر ءَ پھریزی ٹکہ لگ اِتگ اَنت اشاں ابید پالیسیانی رد ءَ پیسر ءَ ملازماں موکل ءَ پد واتری ءَ چاردہ روچ ءَ داں قرنطینہ ءَ بیتگ اَنت-

اھوالکار ءَ گوشتگ نھاد جاہ ءُ کارگسانی بندش، انٹرنیٹ ءِ نہ بوگ ءِ سر ءَ اے گپ چرتریتگ چینی کمپنی یکدم نادلگوشی ءِ آماچ اِنت اشی ءَ ترندیں پابندی گندگ ءَ اتکگ اَنت –

زانگ بہ بیت ھمے ماہ ءِ دو فروری ءَ بلوچ لبریشن آرمی ءِ مجید بریگیڈ ءِ فدائیناں نوشکی ءُ پنجگور ءَ پاکستانی پوج فرنٹیئر کور ءِ ھیڈ کوارٹر یک ترندیں اُرش کرتگ اِت اَنت اود ءَ داں چار روچاں اُرشکاراں ھیڈکوارٹر وتی دستیگی ءَ کتگ اے اُرش بی ایل اے ءِ مجید بریگیڈ ءِ شانزدہ فدائیاں کرتگ اَت، اشی ءِ راستی بی ایل اے ءِ جارکش جیئند بلوچ ءَ کتگ اَت بی ایل اے ءِ وتکش ارشکارانی ھواریں یونٹ مجید بریگیڈ ءَ اشی ءَ پیسر دالبندین، کراچی ءأ گوادر ءَ چائینز انجینئر ءُ کار کنوک نشانگ کنگ بیتگ اَنت-

سیندک ءَ بیوکیں زھرشانی ءِ بارو ءَ داں انگت ءَ دمگداراں گپ دیم ءَ نیتکگ اَنت دمگی مردمانی گوشگ اِنت آیاں رسانکدراں آرگ ءَ نہ اَنت-