آزمانک: آشنائیں دردے زندمان
نبشتہ کار: سیپ بلوچ
دی بلوچستان پوسٹ
دل ءَ گْوشت کہ کمیں واتر چہ تئی پیشگاهے کشک ءَ چہ بہ گْوز کہ، بلکیں تو پیشگاهے برزیں کهورے سیاهگ ءَ نشتگ ءِ گوں کٹور ءُ گُد دْوچگ ءَ بہ بے اے بری مدتے گْوستگ کہ من وتی جندے شوهاز ءَ گار ءُ بیگواه اِت آں ، بلے اچ ترا چہ شموکار نہ اِت آں همے کہ دْوری ءُ گیْشیں زهیراں گْور جت گڑا آ گیشیں ترانگاں گوں ترمپے ارس چہ چماں در اتکگ اَت گڑا آ تئی یات بیتگ ، بلے سرجنان ءُ سرجنان اے بری سر کپتگ ، بلے هچ ءَ سهی نہ آں ، گپے زان ئے من ءَ اچ تئی زهیراں ءُ گْوستگیں هبر ءُ هالاں چہ دگہ هچ گوں نیست ، هشت ماه بیت کہ تئی لمبر بند اِنت ، ءُ نہ تئی میسج ءِ اتکگ ، نہ کہ تئی هال ءَ سر پداں ، بلے گمان همے بیت کہ اڑے تو تنیگ ءَ سهب ءَ مهلہ پاد کائے پساں پچ کن ئے روان کن ءِ پہ کور ءَ ءُ وتی دراهیں درپ ءُ مشک ءَ چاه ءَ آپ کن ئے پد ءَ کائے کهورے چیر ءَ نندے گد دوچی ءَ لگ ئے گوں دزگوهاراں، بلے نزاناں پرچا ترسگ ءَ آں کہ تو بلکیں اچ من شموشکارے ، اگاں اچ من شموشکار نہ ئے منی هال و گپتگ ات زندگ اِنت مرتگ کجا انت-
من همے کہ تئی پیشگاه ءَ رست آں کهور مرچی کندگ نہ بیت ، کوهنیں کرگین ءِ پیشے لوڑ اتگ اَنت ، ءُ هما بان کہ مدام تو دریگے لمب ءَ نشتگے من ءَ چار اتگ آ بان بی سر پچ انت لوڑ اِتگ هنکین کْوهن اِنت پیشگاه هشک اِنت ، تئی بلکے کڈکے بی گندگ نہ بیت دیم ءِ دیوال اوں لوڑ اتگ کہ تئی شکی ئین پت ءَ پستگ ات کہ بلکیں مردمے کیت، شما کجا اِت من شوهازگ ءَ دمبرت داں دیم ءِ همساهگ ، هما کہ تئی دزگوهار اَت بلے آیانی پیشگاه سبز اِنت امید اِنت کہ آ همد اَنت گڑا سک ترسگ ءَ اِت آں اے ساهت ءَ برے هنچیں هیال ءُ ترانگ دل ءَ آیگ ءَ آں کہ دل چہ اندر ءَ هنچش گمان بیت کہ سستگ ، من موتر ءَ سوار اِت آں جنزان جنزاں داں تئی دْزگوهار سنج ءِ لوگ ءِ پیشگاه ءَ اتک آں ، کسانیں چکے در اتک چہ پکہ ئِے بانے ءَ چہ ، من جست کت سنج همد اِنت ؟ یکبرے دراهینتے ءُ کوکار ءَ لگ اِت اماااااا او اماااا ، پدا تچان ءَ شت لوگ ءَ بلکیں سنجے هال دات کہ کسے ترا لوٹگ ءَ اِنت ڈن ءَ یا مات ءِ ندیست کہ سنج در اتک سریگ ساری ءَ گٹ ءَ چار اِت چہ دریگ ءَ پدا دیم ءِ بست ءُ انگو آنگو چار اِت ئِے اتک-
هال کن تو نوکیں مردمے ، من جیڑگ ءَ لگ اِت آں ، ءُ پشت ءَ چار اِت کس نیست اَت پدا من گشت من؟گوشی هو!!!! پوره ترا پجارگ ءَ آں ، من گشت تو؟ گوشی هو!! اڑے مناں یار سیپ ماهگلو ئِے چمروک ، بلے نزاناں چیا اے گپے در آیگ ءَ گوں چمانی ارس در اتک آں سنجی ءَ هچ نہ گوشت ، بلے من پدا گوشت سنجو ترا یات نہ بیت زاناں کسانی ئے نوبت ؟ یا ماهگل تو شموشتگ من و هچ بستار نداشتگ؟ ، همے کہ من دگہ هبرے بہ کناں سنجی ءَ گوشت تو لوگ ءَ بیآ نند ترا گْوشاں ماهگل کج ءَ اِنت ، ءُ چو شر نہ اِنت تو و کسانی گٌوں ما گْوازینتگ، چیزے گپ ءُ هبر هال کن ایں ، پدا کسہ بیت ، نزاناں چیا من گشت من ءَ بگش ماهگلے پیشگاه چیا هشک اِنت ، اے کجا رپتگ انت-
روان اِنت
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔