ڈاکٹر عبدالحئی ءِ اناگھی بیرانی بلاھیں تاوانے – این ڈی پی

کماشیں بلوچ سیاسی رھشون ءُ بلوچ نودربر گل ءِ اولی سرکماش ڈاکٹر عبدالحئی بلوچ ءِ اناگتی بیرانی ءَ بی ایس او، این ڈی پی، نواب اسلم رئیسانی ءَ ھوار دگہ مردماں دلپدری درشانتگ –

بلوچ اسٹوڈنس آرگنائزیشن ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ بی ایس او ءِ اولی سرکماش ءُ بلوچ سیاست ءِ کلانیں رھشون ڈاکٹر عبدالحئی ءِ اناگتی بیرانی دلپدردیں ءُ پہ بلوچ راج ءَ بلاھیں تاوانے –

جارکش ءَ گوشتگ کہ بلوچستان ءِ نوکتریں راجداری ءِ امل بید ڈاکٹر ءَ ناسرجمیں آئی ءَ وتی سرجمیں زند بلوچ راجکاری ءِ ھاتر ءَ ندر کُتگ – ڈاکٹر عبدالحئی ھما راجداریں رھشونانی لڑ ءَ ھواریں کہ آئی ءَ بلوچ راج ءَ بی ایس او وڈیں درسگاھے دئیگ ءَ وتی کرد پیلو کُتگ- آئی ءَ ھما وھد ءَ دنیا یل کُتگ کہ راج زلم ءُ زوراکیانی آماچ انت اے وھد ءَ دنیائے یل کنگ بلاھیں تاوان ءَ چہ کمتر نہ انت –

ھمے وڈ نیشنل ڈیموکریٹگ پاٹی ءِ بنجاھی جارکش ءَ ڈاکٹر ءِ بیرانی ءِ سر ءَ دلپدردی درشانتگ گوشتگ کہ بلوچستان ءِ راجکاری ءِ پڈ ءَ ڈاکٹر عبدالحئی کلانیں سیاستدان ءِ نام ءَ زانگ بیت آئی ءِ رؤگ ءَ سیاست ءِ دگہ دروازگ ءِ بند بوت –

آئی ءَ گوشتگ کہ راجکاری ءِ گوستانک چارگ بہ بیت گڈا آئی ءَ بی ایس او ءِ اولی سرکماشی ءِ تاج سر ءَ انت ءُ ھمے وڈ نیپ ءِ زمانگ ءَ نیشنل عوامی پاٹی ٹکٹ رسگ ءَ قومی اسمبلی باسک جوڈ بوتگ بلے 73 ءِ آئین ءِ سر ءَ دزنشان نہ جتگ ءُ نواب خیر بخش مری ءِ موقف ءُ نزریہ ءِ منوگریں رھشون جوڈ بوتگ –

آئی ءَ گوشتگ کہ ھر ھما وھد ءَ بلوچ راجکاری ءِ تہ ءَ راجداری ءِ سادگی گپ بئیت گڈا ڈاکٹر نام الم گرگ بیت –

نواب اسلم رئیسانی ءَ گوشتگ کہ ڈاکٹر ءِ اناگتی بیرانی ءَ ما دلپدردیں، ڈاکٹر مئے کماشتریں ءُ نزیکیں سنگتے بوتگ –

آئی ءَ گوشتگ کہ بلوچ راج ءِ ھکانی ھاتر ءَ آئی ءِ سرجمیں جُھد پہ مئے ھاتر ءَ رژناھیں چراگ ءِ بستار ءَ داریت – مئے دوائیں ھاوند آئی ءِ جاہ ءَ وش بہ کنت ءُ پشپداں سبر اوپار ءِ ھاٹیگ ءَ بہ دنت –

ھمے وڈ بلوچستان گونرر سید ظہور احمد آغا، نیشنل پاٹی ءِ سرکماش ڈاکٹر مالک بلوچ، پی پی بلاول بھٹو، آسف زرداری، زولفقار علی مگسی ءُ ھر تک ءُ پھناتاں سیادی داروکین مردماں ڈاکٹر عبدالحئی بلوچ ءِ اناگتی بیرانی ءَ دلپدری درشانتگ-