اعوان گوٹھ وئیل ءِ بگیری ءَ بلوچستان اسمبلی ءِ دیم ءَ نندانک برجاہ ءَ اِنت

بلوچستان ءِ بُنجاھی شھر شال ءَ بلوچستان اسمبلی ءِ دیم ءَ اعوان گوٹھ کچھی وئیل ءَ نامدپیں کُتکار دزگیری ءِ بگیری ءَ سیمی روچ ءَ ھم نندانک برجاہ ءَ اِنت-

گیشیں ھالانی رِد ءَ مروچی نندانکیں زھرشانی ءَ سرجمی ءَ چارمی روچ ءُ بلوچستان اسمبلی دیم ءَ سیمی روچ بوتگ-

نندانک ءَ نشتگیں مردماں تران کنان ءَ گوشتگ کہ پاکستانی تحریک انصاف ءِ راھشون ءُ باسک بلوچستان اسمبلی یار محمد رند ءَ گوشتگ کہ ما آئین ءُ اخلاقی ءِ بوگ ءِ جُھد کتگ ، قدوس بزنجو کُشکاراں وتی میار مہ کنت-

آیاں گْوشتگ کہ حکومت کُشکاراں دزگیری وتی جاگہ ءَ درانڈیھ ءَ تچگ ءَ جُھد ءَ اِنت ، سے روچ ءَ ھائی کورٹ ءُ اسمبلی ءِ میان ءَ نشتگیں ھکومت ءَ ھچ سما نیست –

یار محمد رند ءَ گْوشتگ کہ بلوچستان ھمینچو بے کسیں صوبھے اے سما انو بوتگ ، دگہ صوبھاں چہ پوسٹ بوگ آؤکیں افسران مئے واست ءَ فرعون جوڑ بنت-

آئی ءَ گوشتگ کہ ما زان ایں کُشکار ءِ نہ گرگ ءِ پُشت ءَ کے اِنت- آئی ءَ دیمتر ءَ گوشتگ ما زُلم اوپار کن ایں کسی ءِ دیم ءَ سر ءَ جھل نہ کن ایں، مئے گوم ءَ زُلم بوگ ءَ اِنت گُڑا نزوریں مردمانی گوم ءَ چی بیت-

یار محمد رند ءَ گوشتگ ما وزارت، روزگار یا پلامرزی اناں بلکیں تھنا انساپ لوٹگ ءَ ایں-

آئی ءَ گوشتگ اگاں کُشکار دزگیر نہ بوت اَنت گُڑا گیش مردماں کُش اَنت، کُشگ بوتگین ءِ کھول ءَ ھکومت انساپ ندنت بلے اللہ الّم انساپ دنت-

آئی ءِ گْوشگ اِنت کہ داں کد اد ءَ گچینکاری دُزگ بنت، اد ھرکس جوانیں بولی جنت آ گچینکاری ءَ سوبمند بیت، جام کمال ھکومت ءَ چی کمی بوتگ، مرچی صوبہ ءَ وزرارت بھا بوگ ءَ اَنت –

آئی ءَ گوشتگ کہ مرچی لاچارانی، ایردستانی گپ ءَ کنگ ءَ آں، بلوچستان ءَ اپوزیشن ءِ نام سر ءَ ڈرامہ کنگ بوگ ءَ اِنت – آئی ءَ گوشتگ کہ کچھی ءَ زمین ءِ یک چُنڈے ءِ ھاتر ءَ مردماں کُشتگ اَنت-

نندانک ءَ نشتگیں مردماں من آں نُھ رند ءَ پارلیمنٹ باسک گچین کتگ آیاں ایوک ءَ یل نہ کن آں، اد ءَ سارتی ءَ مردم نشتگ اَنت من ھم شپ ءَ شریں وڑ وپت نہ کن آں-

یار محمد رند ءَ گوشتگ کہ آمیدگس ءُ پوج سر ءَ بھتام جنگ پیسر ءَ بے کانودی بوتگ، نو مردمانی زبان بند کنگ ءِ ھاتر ءَ نوکیں آرڈیننس آرگ ءَ اَنت-

آئی ءِ گوشگ اِنت وزیر اعظم ءَ گوشگ لوٹ آں آرڈیننس بدیں داگ ءَ وتی پیشانی ءَ مہ جنت، ما کُشکارانی دزگیری ءِ ھاتر ءَ 48 ءِ گُڈی بیھار داتگ-

آئی ءَ گوشتگ کہ دیمتری کارانی کنگ ءِ جار ءَ زوت جن ایں، ھکومت ءَ دیگ بوتگ گُڈی بیھار ھلاس بوتگ – یار محمد رند ءَ اسمبلی دیم ءَ نندانک ءِ برجم دارگ ءِ جار جتگ ءُ گوشتگ کہ اگاں درکار بوت گُڑا اسلام آباد ءَ ھم رو ایں-