سربوتگیں ھالانی رِد ءَ متحدہ عرب امارات ءِ واکداراں ھمودے نندوک ھزدار ءِ جھمنند عبدالحفیظ پاکستان ءَ دیم داتگ –
حفیظ زھری ءِ پاکستان دیم دیگ ءِ کاگد آئی ءِ کھول ءَ متحدہ عرب امارات ءِ امیگریشن ءَ چہ دست گپتگ انت – امیگریشن کاگدانی ھساب ءَ عبدالحفیظ ء حاجی رمضان زھری جھمنند ھزدار دو روچ ساری بزاں دو فروری ءَ دبئی ائیرپورٹ ءَ چہ کراچی ائرپورٹ ءَ آرگ بوتگ –
زانگ بہ بیت عبدالحفیظ زھری گوستگیں ماھے بیست ءُ شش ءُ بیست ءُ ھپت جنوری ءِ شپ ءَ متحدہ عرب امارات ءِ انٹرنیشنل سٹی ءَ چہ آوار جنگ ءُ بیگواہ کنگ بوتگ کہ آئی ءَ پد اماراتی واکدارانی ھوالگ ءَ بوتگ – آئی ءِ آوار جنی ءِ ارزی ھمودے پولیس تانہ ءَ ھم نبشتہ کنگ بوتگ –
حفیظ زھری ءِ پاکستان ءَ دیم دیگے ھبر آئی ءِ کھول ءَ راست کُتگ ءُ کراچی ءَ آرگ ءِ کاگد ھم دی بلوچستان پوسٹ ءَ سرکتگ انت –
زانگ بہ بیت حفیظ زھری ءِ زورانسری آوار جنی ءِ بگیری ءَ گوستگیں روچ ءَ کراچی ءَ زھرشانی کنگ بوتگ – آئی ءَ کھول ءَ اے ھم گوشتگ کہ مارا تُرس انت کہ متحدہ عرب امارات ءِ واکدار عبدالحفیظ بلوچ ءَ گیر کانودی ءُ بگیر پاسپورٹ ءَ پاکستان ءِ ھوالگ ءَ کنگ لوٹ انت کہ اود ءَ آئی ءِ جان ءَ ھترہ انت –
زانگ بہ بیت اشی ءَ پیش حفیظ زھری ءِ وارس راشد حسین ھم متحدہ عرب امارات ءَ زورانسری آوار جنی ءَ پد پاکستان ءِ ھوالگ ءَ کنگ بوتگ ءُ عبدالحفیظ زھری راشد حسین ءِ زورانسری آوار جنی ءِ چم دیستیں شاھد ءِ بوتگ وھدیکہ آئی وتی جان ءِ رکینگ ءِ ھاتر ءَ دبئی ءَ شتگ بوتگ –
عبدالحفیظ بلوچ ءِ بلوچستان ءِ دمگ ھزدار ءِ جھمنند انت کہ اود ءَ سال دوھزار ءُ دہ ءَ آئی ءِ برات مجید زھری ءُ سال دوھزار ءُ یازدہ ءَ آئی ءِ پت حاجی رمضان زھری پاکستانی پوج ءَ کُشتگ انت – گوستگیں دہ سال بیت انت کہ عبدالحفیظ متحدہ عرب امارات ءَ نندوک انت –