حب چوکی شھر ءَ گیس بندش آپ ء نہ بوگ ءُ بے روزگاری ءِ بگیر ءَ حب شھریاں لسبیلہ پریس کلب دیم ءَ نندانکی بُنجلے جتگ – حب شھری گوستگیں چیزے روچاں چہ بُنکی آسراتیانی نہ بوگ ءِ بگیری ءَ زھرشانی کنگ ءَ اَنت-
حب ءِ سیاسی چاگردی ءُ تاجر گلاں شھریانی ھمراھی ءَ حب لسبیلہ پریس کلب دیم نندانکی بُنجلے جتگ، شھریاں اسسٹنٹ کمشنر حب کارگس دیم ءَ زھرشانی کتگ- ڈپٹی کمشنر لسبیلہ افتخار بگٹی ءَ زھرشانی کنوکانی گوم ءَ دیوان کتگ ءُ نندانک ھلاس کتگ-
شھریانی گوشگ اِنت کہ حب شھر ءَ گیس ءِ سستی ودان اِنت راج ءَ دو وھد ءِ ورگ جوڑ کنگ ءِ جنجال ءِ دیمپانی بوگ ءَ اَنت گیس واکدار شھر ءَ گیس کمی آرگ ءَ راج ءِ زند ازب کتگ گیس وڑ ءَ آپ جیڑہ ھم وتی جاہ ءَ ھست اِنت اے محمکہ شھریاں آپ پُجارینگ ءَ بے سوب بوتگ-
زھرشانی کنوکاں لوٹ کتگ کہ انتزامیہ حب شھر ءَ گیس ءُ آپ شر کنگ ءَ گامگیج بزور اِیت ءُ راج ءَ سر روزگار ءِ بہ کن اَنت اگاں ناں اشی ءَ چہ ھم تُرندتریں رھرشانی ءِ راہ ءَ در چن ایں وھدے کہ نندانک ءِ بُنجل ءَ جتائیں سیاسی مردم اَتکگ ءُ سربوتگ اَنت-
افتخار بگٹی ءَ نندانک ءَ نشتگیں مردماں گوشتگ ئِے کہ گیس سپلائی کم دیگ بوگ ءَ اِنت وھدے کہ زرورت چہ اشی ءَ گیش اِنت ھمے درگت ءَ ایم ڈی سوئی سدرن ءُ دگہ واکداراں نمدی نبشتہ کنگ بوگ ءَ اِنت ڈگار ءُ لوگ ھوٹلاں جتگیں گیس بے کانودی کنکشن ءَ زوت در کنگ بہ بنت سوئی سدرن لسبیلہ ءِ زمہ واریں آفیسرے کنگ بوتگ ءُ حب انتزامیہ ءَ ھرچ وڑیں کُمک ءَ پرمان داتگ ڈپٹی کمشنر ءَ گْوشتگ کہ ایمپلائمنٹ کمیٹی جوڑ کنگ بوتگ چریشی ءَ زوتاں دیوان بیت چریشی ءَ دمگی مردماں ڈگارانی سر ءَ کار، ھکومت بلوچستان ءِ جار پرینگیں کم چہ کم پگار سر ءَ چست ءُ ایر ، ای او بی آئی – بلوچستان ایمپلا سوشل سیکورٹی ءَ پوریاگرانی رجسٹریشن ءِ جیڑہ ءِ چارگ بیت اسپیشل مردم ءُ زالبولاں سرروزگار کنگ ءَ گامگیج زورگ بیت-
ڈپٹی کمشنر ءَ دیوان تہ ءَ زھرشانی کنوکاں گوشتگ کہ شھر آپ ءِ پائپ لائنانی لیکی ءُ دگہ جیڑہ ءَ اَنت آ کنگی اَنت-