سندھی راجدوستیں سلاہ بندیں گل سندھودیش روولیوشنری آرمی ءَ گوستگیں شپ ءَ میرپور خاص ءَ سندھ ءِ رینجرز ءِ سر ءَ دستی بمب تراکے ءِ زمہ واری من اِتگ۔
سندھودیش روولیوشنری آرمی ءِ جارکش سوڈھو سندھی ءَ وتی شنگ کُتگیں درشان ءِ تہ ءَ گُشتگ کہ گوستگیں شپ ءَ میرپور خاص ءِ جرواری دگ ءَ پاکستان رینجرز ءِ بنجاہ ءِ گیٹ ءِ سر ءَ بستگیں چوکی ءِ سر ءَ دستی بمب اُرش ءِ زمہ واری ءِ من ایں، کہ اے اُرش ءِ تہ ءَ چوکی ءِ سر ءَ اوشتاتگیں دو کارمند کُشگ بیتگ اَنت ءُ یکے ٹپی بیتگ۔
ایس آر اے جارکش ءَ گیشتر گُشتگ کہ زوراکیں پاکستانی پوج ءَ بیھار دئیں ءُ گُش ایں کہ سندھ ءِ سرڈگار ءِ سر ءَ زورگری ءَ ھلاس بہ کن اَنت ءُ در بیا اَنت۔
گُڈ سر ءَ ایس آر اے جارکش ءَ گُشتگ کہ سندھ ءِ سرجمیں آجوئی ءَ داں گھگیریں جھد ءَ برجاہ دارگ ءِ اھد ءَ نوک کنیں۔