بلوچستان ءِ دمگ کوھلو ءِ یونین کونسل جنگلی ھنکین کاھان ءَ ھمک سال ءِ پئیم ءَ اے سال ءَ ھم نودربراں پچیں آزمان ءِ چیر ءَ چکار دیگ ءَ لاچار بیتگ اَنت۔ اے دمگ وانگ ءُ زانگ ءِ وزیر میر نصیب اللہ مری ءِ گچین بوگ ءِ دمگ اِنت۔
اے درگت ءَ دمگی مردماں رسانکدری اھوالکاراں گُشتگ کہ ھمک سال وانگ ءِ ھاترءَ بلوچستان ءَ اربانی کساس ءَ زر فنڈ دیگ بیت اِنت بلے مئے اسکول ءَ دیوال ھست، نہ کلاس روم ءُ نہ کہ چکاس ھال ھست اَنت کہ سرکار ءِ ٹاھانی سرءَ جُست چِست کن اَنت۔
دمگی مردمانی گُشتگ اِنت کہ وانگ ءُ زانگ ءَ کدی ھم سرکار ءِ نیمگ ارزشت دیگ نہ بیتگ، اے مردم ٹاہ دئینت، اے مردم زان اَنت کہ وھدے بزگر ءِ زھگ وانیت ءُ زانتکار بیت گُڑءَ آ نا انساپیانی بگیری ءَ توار چِست کنت۔
آیاں واکداراں چہ اے درگت ءَ زیت گام زیرگ ءِ دزبندی کُتگ۔