کریمہ بلوچ ءِ اولی سالروچ ءِ درگت ءَ بازیں جاھاں مراگش برجم دارگ بیتگ اَنت

سندھ ءِ مزن شھر کراچی ءُ بلوچستان ءِ دمگ گوادر، اوتھل، بارکھان، ھاران، پنجگور ءُ دگہ دمگاں بانک کریمہ ءِ شھیدی ءِ اولی سالروچ ءِ درگت ءَ مراگش ءُ بے تواریں روانک کشگ بوتگ – چاگردی ترامجاہ ٹوئیٹر ءِ لمہ وتن ءِ ھیش ٹیگ ءِ ٹرینڈ ءِ ھم چلائینگ بوتگ –

سندھ ءِ مزن شھر کراچی ءَ بلوچ یکجھتی کمیٹی کراچی ءِ نیمگ ءَ بانک کریمہ بلوچ ءِ اولی سالروچ ءِ درگت ءَ مراگشے برجم دارگ بوتگ ءُ بانک کریمہ ءِ اکس ایرکنگ ءُ آھانی دیم ءَ موم بتی روک کنگ ءُ پُل چنڈگ بوتگ اَنت – مراگش ءَ ماما قدیر بلوچ، نامی ئیں زانوگر استاد محمد علی تالپور ءُ دگہ سیاسی چاگردی باسکاں ھوار نودربراں بھر زرتگ ءُ مرگش ءَ تران کُتگ –

کراچی ءِ مراگش ءَ تران کنان ءَ لالا وھاب ءِ گوشگ ات مروچی بانک کریمہ اِد ءَ مئے گوم ءَ جسمانی ھوالگ ءَ ساڑی نہ انت بلے ھما کسانیں جنکو پاتمہ گوش ایت کہ من ھم کریمہ بلوچ ءَ گڑا ھمے ریاست ءِ پروش ورگ انت ھمے ریاست ءَ پیام انت تو چینچو کریمہ کُش ئے ھر گِس ءَ کریمہ درکیت ءُ مئے چاگرد ءَ ھر گِس ءِ تہ ءَ کہ زھگے ودی بیت آئی ءِ نام ھم کریمہ ایر کنگ بیت اِنت – اے ریاست ھمے پھمیت کہ ما کریمہ ءَ جنیں بلکیں اشانی زرمبشت نزور بیت بوت کنت آئی ءِ ھمراھی ءَ جھد اوشت آماچ بیت بلے ما گندگ ءَ ایں بلوچستان ءِ سرڈگار ءِ سر ءَ ھر تچوکیں ھونانی گوم ءَ مئے راجی آجوئی ءِ زرمبشت مھکم تر بوان انت – دنیا ءِ راجدپتر ھم مار ءَ ھمے گوش ایت کہ جانانی رؤگ ءَ ھچبر زرمبشت ھلاس نہ بنت پرچاکہ اھانی پگر زندگ مان انت مروچی کریمہ یک پگرے دروشم ءَ انت ھر بلوچ ءِ دل ءِ تہ ءَ انت ءُ ھر بلوچ آئی ءِ مشن ءَ منزل ءَ سر کنگ ءَ بے تاب انت ءُ ما ھم پھمیں ھمے مئے زرمبشت ءِ سوبمندی انت –

تران کنان ءَ ماما قدیر بلوچ ءِ گوشگ ات کبزہ لالچ ءِ ھوسے بلے جنگ مھر ءِ بنیاد ءَ بیت وتی سرڈگار ءَ گوں مھر، وتی رکینگ ءَ گوں مھر، وتی پجار ءَ گوں مھر لُمہ ءَ بوتگ – لمہ کریمہ بلوچ مھکمیں زھن ءِ واھند بوتگ ءُ بی ایس او آزاد ءِ رھشونے بوتگ بلوچستان ءَ ھپتاد سالی جنگے بوگ انت ھمائی ازاتی ءِ ھاتر ءَ مھم ءِ چلائینگ ءَ بوتگ – سرکار ھمائی ءِ پلامرزی ءِ ھاتر ءَ بی ایس او ءِ سر ءَ بندش جتگ – بانک ءَ ھم ھما دمگاں سپر کُتگ ءُ اود ءَ زھرشانی ءُ روانک کش اتگ – ءُ کراچی ءَ ھم بیگواھیں مردمانی بنجل ءَ اتکگ بیگواھیں مردمانی ھاتر ءَ زھرشانی ءِ کُتگ –

کریمہ بلوچ ءِ مرگ پدردی یے بلے دلیری ءِ نشان انت ھم اے دلیری ءُ تمردی ءَ ھر یکے منگ ءَ ساڑی انت پرچاکہ شھیدی زرمبشت ءِ تہ ءَ تاکت کاریت ءُ مھکم کنت –

مراگش ءَ تران کنان ءَ سمی بلوچ ءِ گوشگ ات من وت ءَ ھما وشبھتیں مردمانی تہ ءَ ھواران کہ آھاں بانک ءِ ھمراھی وھد گوازینتگ – بانک ءِ کِرد ءُ آئی ءِ بستار ءِ سر ءَ منی روایتی لپز آئی ءِ کرد ءَ بیان کُت نہ کن اَنت – ما ھما مردم انت کہ وتی کُلانی تہ ءَ نشتگ بوتگ انت مروچی اسٹیج ءِ سر ءَ گوں شما تران کنگ ءَ انت اے بانک کریمہ ءِ تربیت انت اے بانک کریمہ ءِ مشعل ء راہ انت – من ءَ ھما روچ یاد انت کہ بانک مئے دمگ ءَ مشکے ءَ اتکگ ات من ءَ چہ پُرسیت تو وانگ ءَ نہ رؤگ ءَ ئے من درائینت کہ وانکجاھے سر ءَ پوج انت آئی ءَ گوشت کہ پوج ءَ بہ گلینیت بہ گوش ات کہ اے مئے زمین انت پد ءَ ما ھزارانی ھساب ءَ مردم یکجاہ کُت وانگجاہ ءَ شتیں پوج چہ اود ءَ در کنائینیت ـ من ھما روچ ءَ زانتگ ات کہ بانک یک لس جنکے نہ انت عامیں کردارے نہ انت – اگاں رؤگی انت گڑا ھمیشی ءِ پد رنداں رؤگی انت – مروچی من دوازدہ سال انت کہ وتی پت ءِ ھاتر ءَ جھد ءَ آں من سرپد باں کہ من ءَ اے راہ ھم کریمہ بلوچ ءَ گوشتگ پرچاکہ ھما دمگ ءَ من جھمنند انت اود ءَ ناکہ چشیں ایکٹیوٹی بوتگ ناکہ اے چیزانی درگت ءَ من ءَ سرپدی بوتگ اے ھما یکیں کریمہ بلوچ بوتگ کہ در بیا وتی پت ءِ ھاتر ءَ جنگ کن مروچی تو کسانے نہ زان ئے بلے باند ءَ مزن بئے زان ئے بلے ھاموش بوگی نہ انت پاد آیگی انت – ھما روچ ءَ من ھما راہ ءَ در اتکگ کہ کریمہ ءَ سپر جتگ ات –

آئی ءِ گوشگ ات کہ ریاست مئے زالبولانی راہ ءِ دیم ءَ اڈاند پیدا کنگ انت ترسینگ انت ، مئے اکس ءَ شنگ کنگ ءُ مئے موبائیلانی ھیک کنگ دگہ وڑ وڑ ءَ پندل کنگ انت ایشاں پد من ءَ کریمہ ھما گپ یات کائنت کہ منی گِس ءِ سر ءَ گولہ جنگ بیتگ، منی گوھارانی سریگ کشگ بوتگ اَنت منی ارزی نبشتہ بوتگ بلے من پد کنز نہ بوتگ اَنگ رواناں شمارا ھم اوشتگی نہ انت رؤگی انت سرجھل کنگی نہ انت دیم ءَ جنزگی انت –

من درسیں بلوچ زالبولاں ایکٹوسٹاں گوشگ لوٹاں مارا پکر بہ بیت کہ ما ھما راج ءَ گوں سیادی داریں کہ کریمہ بلوچ ءِ سیادی بوتگ – کریمہ کرد ءُ آئی ءِ دلیری ءَ من وتی لپزانی گوم ءَ بوت کنت درشان کُت مہ کناں بلے شمارا گوشگ لوٹاں کہ نگیگیں جاورھالاں ھما راہ ءَ کہ اڈاند، کُنٹگ وڑ وڑیں زوراکیانی دیمپانی اول وت کتگ ءُ مئے رھشونی کنان ءَ پہ مئے ھاتر ءَ راہ گیشینتگ اَنت ساپ کُتگ اَنت –

مراگش ءَ بلوچ زانتکار استاد مھمد علی تالپور ءَ گوشتگ کہ کریمہ ھما زھگ اِنت کہ آئی ءَ اول ءَ ھیر بکش مری ءَ را بابا گُشتگ کہ ھیر بکش مری ءِ بیرانی ءَ پد آئی ءَ من ءَ بابا گُشتگ ءُ کریمہ ھما کارست اِنت آئی ءَ ما لبزاں بیان کرت نہ کن ایں ءُ آئی ءں ستاشانی ءَ یک لچھے نبشتگے کتگ ءُ دیوان ءَ ونتگے –

ھمے وڑ ءَ یکجھتی کمیٹی ءِ رھشون آمنہ بلوچ ءَ گشتگ کہ کریمہ بلوچ یک ھنچیں دمگے ءَ ودی بیتگ ءُ اود ءَ ھچ نہ بیتگ بلے آئی ءِ زانت ءَ کراچی ءِ وڑیں جاھانی وابیں جنک پاد کتگ اَنت –

مراگش ءَ دگہ مردماں ھم تران کُت آھانی گوشگ ات کہ مار ءَ اگاں مزلومانی ھمراہ داری کنگی انت گڑا بلوچ ءِ ھمراہ بوگی انت اگاں مارا ءَ مزلوم ءِ ھمراہ داری کنگی انت گڑا مزلومیں سندیانی ھمراہ داری کنگی انت مار ءَ ھمک وھد ءَ مزلومانی ھمراھ داری کنگی انت المی نہ انت کہ بس اسٹیج ءِ سر ءَ بیا تران بہ کنیں آھانی گوم ءَ اخلاقی ھمراہ داری بہ کن ات – دو گام ءِ ھمراھی ھم ھمراہ داری انت-

ھمے وڑ بلوچستان ءِ دمگ ھاران، پنجگور، گوادر ءُ اوتھل ءُ دگہ دمگاں کریمہ بلوچ ءِ اولی شھیدی سالروچ ءِ درگت ءَ روانک کشگ ءُ اکسانی دیم ءَ موم بتی روک کنگ بوتگ اَنف آئی شھیدی ءَ دروت ندر کنگ بوتگ –

ھاران ءَ شھید بانُک کریمہ ءِ سالروچ ءِ درگت ءَ بلوچ ویمن پورم ءِ چیردستی ءَ چہ قاسم چار راہ ءَ بگر داں پریس کلب ءَ روانکے کشگ بیتگ – اکس ایرکنگ موم بتی روک کنگ بوتگ – کہ سول سوسائٹی ھاران، نودربر ءُ آدگہ تک ءُ پھناتاں سیادی داروکیں مردماں بھر زرتگ –

تران کنان ءَ آھاں گوشت کہ مئے چاگرد ءَ جنین چہ گساں در نیا اَنت۔بلے ما پہ بانُک کریمہ ءَ ڈن ءَ درکپتگیں کہ آئی وتی زندگی پہ ھک ءُ بلوچستان ءَ ندر کُتگ۔آ کہ پہ ھک ءَ اوشت اَنت اے میارے نہ اِنت ءُ ما بژنیگ نہ ایں کہ بانک شھید بیتگ بلکیں ما وشیں کہ آ پہ سرڈگار ءَ ندر بیتگ۔ بانک کریمہ ءِ یات ءَ ھاران پریس کلب ءِ دیم ءَ ڈیوا بالینگ بیتگ۔
ھمے وڑ بلوچ یکجھتی کمیٹی ءِ جار سر ءَ مروچی پنجگور ءَ بانُک کریمہ بلوچ ءِ یات ءَ یک مراگشے برجم داشتگ ءُ بھر زرتگیں مردماں روانک چہ بندات کتگ ءُ چلڈرن پارک ءَ موم بتی روک کتگ ءُ ترانکاراں آئی دیمونی ءُ جُھد زندگی ءِ ستاشانی کتگ ءُ لمہ ء وتن ءِ شھیدی یک شوری بندی ءِ گوشتگ-

ھمے وڑ بلوچ یکجھتی کمیٹی گوادر ءِ چیردستی بلوچستان ءِ تیاب دپی دمگ گوادر ءَ سید ھاشمی چار راہ ءِ سر ءَ شھید بانُک کریمہ ءِ یات ءَ روانکے کش اِتگ –

ھمے وڑ اوتھل ءَ بلوچ اسٹوڈنٹس آرگنائزیشن نیمگ ءَ شھید بانُک کریمہ بلوچ سالروچ ءِ درگت ءُ آئی ءِ یات ءَ موم بتی روک کتگ مزنیں کچے ءَ نودربراں بھر زرتگ ءُ بے بھا ایں آشوبی راھشون ءُ آئی ءِ دیمونی ءِ سُھرچکیں دروت ندر کتگ-

دومی نیمگ ءَ چاگردی ترامجاہ ٹوئیٹر ءِ لمہ وتن ءِ ھیش ٹیگ ءَ ٹرینڈ چلائینگ بوتگ کہ ھر تک ءُ پھناتاں سیادی داروکیں مردماں بھر زرتگ بانک کریمہ بلوچ ستا شانی ندر کُتگ کہ پاکستان ءِ تہ ءَ ٹاف ٹرینڈ ءِ تہ ءَ بوتگ –