سرکار بیگواھیں مردمانی یل کنائینگ ءِ ھاتر ءَ وتی کول ءَ مہ بج ایت – نصراللہ

وائس فار بلوچ مسنگ پرسنز ءِ سرکماش نصراللہ بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ صوبائی ءُ وفاقی سرکار بیگواھیں مردمانی یل کنائینگ ءِ ھاتر ءَ وتی کرتگیں کول ءَ پورہ کنگ ءَ نہ انت بلکیں سرکار ءَ زورانسری آوار جنی ءَ کتکار گوشگے کانود ءَ ھنچیں شکے مان کُتگ کہ چریشی ءَ بیگواھیں مردمانی کھول ماژگی ازیت آماچ جوڑ بوتگ انت ھمے ھاتر ءَ اے کانود ءِ سر ءَ اقوام متھدہ ءِ ورکنگ ٹولی زورانسری آوارجنی ءُ اقوام متھدہ ءَ ھوار ملکی ءُ میان استمانی انسانی ھکانی گلاں وتی ھیال درشان کُتگ انت ءُ سرکار ءَ چہ لوٹ کتگ کہ اے کانود ءِ تہ ءَ شک ھلاس کنگ بہ بیت کہ بیگواھیں مردمانی کھول مھکم نہ بیت اے ھم لوٹ کتگ کہ اگاں کسے کُتکار انت آمیدگس ءَ آرگ بہ بیت ءُ سزا دیگ بہ بیت ءُ ھماھانی سر ءَ زورانسری آوارجنی ءِ الزام ھست انت آھانی جرم ھلاس کم کنگ بہ بیت تانکہ پاکستان زورانسری آوار جنی ءَ چہ پلگار بہ بیت –

نصراللہ بلوچ ءَ گوشتگ صوبائی سرکار ءَ سال دوھزار ءُ نوزدہ رسانکدرانی دیم ءَ مئے گوم ءَ کرار کتگ کہ درساں پیش بازیں سالاں چہ زورانسری آوار جنگ بوتگیں مردم یل کنگ بنت یا آھانی درگت ءَ آھانی کھول سرپد کنگ بیت انت – لھتے مردم یل بوتگ بلے بازیں سالاں چہ بیگواھیں مردمانی درگت ءَھچ وڑیں گامگیج زورگ نہ بوتگ ءُ ھمے سال ءِ فروری ءِ ماہ ءَ ما گوں وفاقی وزیر داکلہ شیخ رشید، وفاقی وزیر کانود فروغ نسیم، انسانی ھکانی وفاقی وزیر شیرین مزاری، بیگواھیں مردمانی کمیشن ءِ سرکماش جسٹس اقبال ءُ مارچ ءِ ماہ ءَ مزن وزیر عمران خان ءَ ھم دچار کپتگیں – وفاق ءِ نیمگ ءَ.مار ءَ باور کنائینگ بوتگ کہ کم کم ءَ بیگواھیں مردم یل کنگ بنت اولسر سر ءَ مار ءَگوشگ بوتگ کہ مئے داتگیں لسٹ ءَ مردم شش ماہ ءِ تہ ءَ یل کنگ بنت یا آھانی درگت ءَ کھول سرپد کنگ بیت اِنت آئی ءَ چہ پد مار ءَ گوشگ بوتگ دسمبر ماہ ءَ بیگواھیں مردم یل کنگ بنت ءُ مزن وزیر ءِ معاون کار شازین بگٹی ءَ ھم باور کنائینتگ کہ دسمبر ءَ تاں بیگواھیں مردمانی درگت ءَ گامگیج زورگ بیت اِنت – نوں دسمبر ماہ ھلاس بوگی انت بلے بیگواھیں مردم یل کنگ نہ بوتگ انت ناکہ کھول آھانی درگت ءَسرپد کنگ بوتگ اَنت بلکیں بیگواھیں بیگواھیں مردمانی یل کنگ دارگ بوتگ ءُ زورانسری آوار جنیانی تہ ءَ گیشی آرگ بوتگ –

نصراللہ بلوچ ءَ یکرندے پد ءَ صوبائی ءُ وفاقی سرکار ءَ چہ لوٹ کُتگ کہ بیگواھیں مردمانی یل کنائینگ ءِ ھاتر ءَ وتی کول ءَ پورا بہ کنت ءُ آھانی کھول چہ ازاب ءَ رکینگ بہ بنت –