انسانی ھکانی میان اُستمانی روچ، کراچی ءَ سمینار برجم دارگ بیتگ

انسانی ھکانی میان اُستمانی روچ ءِ درگت ءَ وائس فار بلوچ مسنگ پرسنز، بلوچ یکجھتی کمیٹی ءُ نیشن ڈیموکریٹک پاٹی ءَ ھواریں سمینارے برجم داشتگ –

سمینار ءَ مھمد علی تالپور، وائس فار بلوچ مسنگ پرسنز ءِ وائس چیئرمین ماما قدیر بلوچ، پی ٹی ایم ءِ کور کمیٹی ءِ باسک مھمد شیر، بلوچ یکجھتی کمیٹی ءِ آرگنائزر آمنہ بلوچ، بی وائی سی ءِ ڈپٹی آرگنائزر عبدالوھاب، وائس فار بلوچ مسنگ پرسنز ءِ چیئرمین نصر اللہ بلوچ، نیشنل ڈیمو کریٹک پاٹی ءِ آرگنائزر ءِ ایڈوکیٹ شاہ زیب ءُ دگہ مردماں تران کرتگ –

تران کنوکاں گوشتگ کہ بلوچانی زورانسری ءِ بیگواھی ءِ ھمدردی ءَ ابید ھکانی واستا پلامرزی درکار اِنت، چریشی ءِ سبب ءَ آیاں آوار جن اَنت اے ریاست ءَ ھکانی واستا گپ جنگ یا دزبندی نامناسب اِنت ھک مارا جد ءُ جھد ءُ ھما راہ ءَ رس ایت کہ آئی ءَ چہ ھک گپت کن ایں –

بلوچستان ءِ درگت ءَ بیتگیں سمینار ءَ پیش کنگ بیتگیں انسانی ھکانی سالگشت ءِ ھال ءِ رد ءَ ھمے سال ءِ جنوری ءَ بہ گر داں نومبر ءَ بلوچستان ءَ پاکستانی پوج ءَ شش سد ءُ یک بر ءَ بلوچستان ءِ جتا جتائیں جاھاں فوج کشی کتگ ءُ چار سد ءُ بیست ءُ چار مردم آوار جنگ بیتگ اَنت یک سد ءُ ھپتاد ءُ چار مردم کُشگ بیتگ اَنت، بیست ءُ سَے مردمانی لاش جنگلاں دزکپتگ اَنت ءُ دو سد ءُ ھشتاد لوگ لُٹ ءُ پُل ءَ پد ماندارگ بیتگ اَنت-

مھمد علی تالپور، ماما قدیر بلوچ ءُ دگہ مردماں تران کنان ءَ گوشت کہ نی اے ریاست ءَ بلوچستان ءِ جاورھالانی دزبندی کنگ نامناسب اِنت پرچاکہ دُز ھچبر وتی دُزی ءَ نہ منّ ایت چُشکہ کسے ءِ سر ءَ نہ گوستگ ءُ گڑا یکے وتی جاورھالاں دومی ءِ گور ءَ بیان کنت گڑا دومی مردم ءَ ھمے لگ ایت اے وئیل یک وتگڑینے –

آیاں گُشتگ کہ ما اے ملک ءِ ھاکم اے ملک ءِ میڈیا ءِ دیم ءَ بس کسہ اِنت ھرچی گوش ئے بس اشکن اَنت آیاں مزنیں کار کتگ انسانی ھکانی درستاں اولی ھک انسان ءِ زندگی اِنت مارا مئے زند پچگرگ بیتگ اَنت ما کسے ءِ بارو ءَ گپ بہ جن ایں؟ بے گناھیں ھیات بلوچ گوں تیراں درشگ بیتگ پد ءَ گوش اَنت مئے دست ءَ ردی بیتگ – اے وڑیں ردی شما باز کتگ ما نی کجام ردی ءَ پھل بہ کن ایں؟

آیاں گُشتگ کہ مارا بس اے مردمانی واستا پلامرزی نہ لوٹ ایت ما ھرچی کنگ ءَ ایں ھما بنکی ھکانی واستا جد ءُ جھد کنگ ءَ ایں مارا بس پلامرزی لوٹ ایت-

آیاں دیمتر ءَ گُشتگ کہ اے مراگش ءِ برجم دارگ ءِ مول ءُ مراد میڈیا، سول سوسائٹی، عدل ءُ انساپ، انسانی ھکانی ٹاہ دیوکانی چماں بستگیں پُچ، ڈالچار کنگ بیتگیں بلوچستان ءِ جاورھال، درناکیں جاورھال شمئے دیم ءَ ایر کرت بہ کن ایں،ستاشانی مراگش ءِ زور ءَ میڈیا ءَ ھاٹیگ بہ بیت مئے درداں مردماں سر کرت بہ کنت-