بساک: اوتھل ھنکین ءِ نیمگ ءَ وانگی گردانکے برجم دارگ بیتگ

بلوچ اسٹوڈنٹس ایکشن کمیٹی اوتھل ھنکین ءِ نیمگ ءَ چہ یک وانگی گردانکے برجم دارگ بوتگ کہ آئی ءِ سر ھال “بلوچ پدریچ”بیتگ ءُ نیاد تران کنوک بلوچ اسٹوڈنٹس ایکشن کمیٹی ءِ بنجاھی کمیٹی ءِ باسک رفیق بلوچ بیتگ ءُ دیوان ءِ تہ ءَ مزنیں کساسے ءَ نودربراں بھر زُرتگ-

دیوان ءِ تہ ءَ تران کنان ءَ رفیق بلوچ ءَ اولی سر “بلوچ” گالبند ء بزانت دیوان ءَ بھر زیروکیں نودربرانی دیم ءَ ایر کت، جتا جتائیں ندکاراں جتا جتائیں ھیال درشان کتگ اَنت بازیں ندکار بلوچ گالبند جتا جتائیں مانا داتگ اَنت کہ آ ابید چہ تواررینک بنیاد ء دگہ چوشیں منانک دیگ سوبمند نہ بیتگ اَنت-

آئی ءَ گُشت ھمے توارینک چی “بعلوث، بلوج، بالیچا، بلءاوچ، کروس ء بل” وگیرہ دیم ءَ آرگ بوتگ انت اے گالبند ابید چہ تواررینک ءَ دگہ چوشیں منانک نیست کہ ایشانی سر ءَ باور کنگ بہ بیت کہ “بلوچ” گالبند چہ کجا آتکگ-

آئی ءَ دیمترا تران کنان ءَ گُشت ” چوشکہ بلوچ گالبند بابت ءَ جتا جتائیں ندکاراں جتا جتائیں ھیال دیم ءَ آؤرتگ ءُ ھمے وڑ بلوچ راج ءِ نسلی یا راجی گوستانک ھوالہ ھم وڑ وڑیں لیکہ دیم ءَ آرگ بوتگ اَنت بلوچ ءِ ریشگ لھتے ندکاراں گوں” الٹیک ریشگ” ءَ بندوک کتگ ءُ بلوچ ءَ ترکمان، کرغیز یا تاجک گون بندوک کتگ ھمے وڑ لھتے ندکاراں بلوچ گوں آریائی ءُ سامی نسل ءَ بندوک کتگ آریائی لیکہ دیم آروک انت دیمترا انگت بلوچ ء گوں ایرانی آریائی نسل ءَ ءُ دومی گوں ھندوستانی آریائی نسل ءَ ھمگرنچ کتگ بلے گوستانک ءَ بچارے چوشیں ھچ منانک نیست کہ اے لیکھانی سر ءَ باور کنگ بہ بیت کہ بلوچ ترکمان، تاجک یا کرغیز اَنت، یا آرین نسلے، دومی نیمگ ءَ ھماں لیکہ کہ آ بلوچ ءَ گوں سامی نسل ءَ ءُ گالبند بلوچ ءَ گوں “بعل”ءَ بندوک کنت، اے ھم رد اِنت ءُ ھمے لیکہ دیم آروک بازیں بلوچ نبشتہ کار ھم ھست انت ءُ اھدی بلوچ شاعری کہ آئی ءِ تہ ءَ کربلا ء جنگ، ءُ حلب ء چہ بلوچ ء لڈ ءُ بار ء پیش کنت۔ ھمے منانک بنیاد ءَ بلوچ ءَ گوں عرباں بندوک کن انت، بلے اگاں گوستانک چارگ بہ بیت گڑا کربلا ءِ جنگ ءَ چاردہ سد سال بیت، بلے گوستانک ءِ اولی کتاب کہ ھیری ڈوٹس ء نبشتہ کتگ کہ آئی ءِ 2500 سال ساری اِنت۔ آئی ءِ تہ ءَ بلوچ راج بابت ءَ نبشتہ انت کہ آھاناں مکران ءَ جھمنند پیش داریت. اد ءَ چہ اے منانک ھم ھلاس بیت کہ بلوچ کربلا جنگ ءَ رند لڈ ءُ بار کُرتگ ءُ مروچیگیں ڈگار ءَ جھمنند بوتگ اَنت-

گُڈ سر ءَ ھمے گپ ءَ گوں دیوان ھلاس بوت کہ بلوچ راج سک کوھنیں راج ءِ ءُ ڈگار ءَ کہ مرچی نِندوک انت ھزاراں سال ساری ھم ھمے جاگہ نِندوک بوتگ اَنت۔ چوش کہ مہرگڑھ ءِ آثار وت اے گپ ءِ گواھی ءَ دنت نوں بلوچ ءِ گوں دیگ ءَ نسلاں ھمگرنچ کنگ بلوچ دپتر مسخ کنگ ءِ برابر زانگ بیت۔ چیا کہ بلوچ نسلے نہ اِنت، بلکیں بلوچ یک راجے ءُ چہ نمروز ءَ بہ گر داں ھلمند، چہ مکران ء بگر داں کوہ سلیمان بلوچ مھلوک ءِ تہ ءَ راجی مارشت ءَ آوار یکیں زبان، دود ءُ ربیدگ ءُ گوستانک اے گواھی دنت کہ بلوچ یک راجے ءُ نسلے نہ اِنت۔ھمے جاھے بزاں مکران بہ گر داں کوہ سلیمان ءَ نِندوکیں مردم اَنت ایشی رند سوال جواب سیشن بوت ءُ دیوان ھلاس کنگ جار جنگ بیت-