زورانسری آوار جتگیں بلوچانی ھاترءَ توار چِست کنوکیں گل وائس فار بلوچ مسنگ پرسنز ءَ جھانی انسانی ھقانی روچے درگت ءَ پاکستان ءِ راجدھانی اسلام آباد ءَ زھرشانی روانکے کُش اِیت وھدیکہ ھمے درگت ءَ پریس کانفرنس ءِ ھم کنگ بیت کہ بیگواھیں مردمانی کھول بھر زیر اَنت۔
وائس فار بلوچ مسنگ پرسنز ءِ جار ءِ تہءَ گُشگ بیتگ کہ جھانی انسانی ھقانی روچے درگت اسلام آباد ء نیشنل پریس کلب ءَ بگر داں ڈی چوک ءَ زھرشانی روانک کشگ بیت۔ درشان ءِ تہءَ گُشگ بیتگ چوشکہ بلوچستان نیشنل پارٹی 10 دسمبر ءَ انسانی ھقانی جھانی روچ ءَ دارگءَ اِنت، کہ اِشی ءَ میان اُستمانی تکءَ انسانی ھقانی جھانی روچ ءِ ھساب ءَ برجاہ دار اَنت۔ وائس فار بلوچ مسنگ پرسنز پمیشکہ چہ اے کانفرنس ءَ یک روچے پیسر 9 دسمبر ءَ روچ ءَ 2 بج ءَ زھرشانی روانک ءَ کش اِیت۔
دیمتر ءَ گُشگ بیتگ کہ دہ دسمبر ءَ بلوچستان نیشنل پارٹی ءِ چیردستی ءَ اڈ داتگیں جھانی انسانی ھقانی روچ ءِ درگت ءَ کانفرنس دارگ بیگ ءَ اِنت کہ اِشی تہءَ وائس فار بلوچ مسنگ پرسنز ءِ رھشون ءُ بلوچستان ءِ جتاھیں شھراں چہ بیگواھیں مردمانی کھول بھر زیر اَنت وھدیکہ ما درستیں تکاں چہ سیادی داروکیں مردماں چہ اے کانفرنس ءَ بھر زیرگ ءِ دزبندی کنیں۔
زانگ بہ بیت کراچی ءَ ھم جھانی انسانی ھقانی روچ ءِ درگت ءَ وائس فار بلوچ مسنگ پرسنز، نیشنل ڈیموکریٹک پارٹی ءُ بلوچ یکجھتی کمیٹی ھوار یک سیمینار ءِ اڈ دیگ ءَ اَنت۔
ھواریں سیمینار ءِ درگت ءَ گوستگیں روچ ءَ پدءَ درستیں گلانی سروکاں کراچی پریس کلب ءِ دورہ کُتگ ءُ کارانی درگت ءَ گپ تران کُتگ ۔
ماما قدیر بلوچ ءِ گُشگ اَت کہ چہ مرچیگءَ زورانسری آوار جتگیں مردمانی کیمپ کراچی ءَ پریس کلب ءِ دیما جنگ بیت اِنت، کہ داں سردیانی موسم ءَ کراچی پریس کلب ءِ دیما ءَ جنوک بیت اِنت۔
ماما قدیر ءَ ابید وائس فار بلوچ مسنگ پرسنز ءِ چیئرمین نصراللہ بلوچ ھم کراچی ءَ سر بیتگ۔ پریس کلب ءَ دورہ ءِ وھدءَ بی وائی سی آرگنائیزر آمنہ بلوچ ءُ ڈپٹی آرگنائزر وھاب بلوچ ھم ھوار بیتگ اَنت۔
زانگ بہ بیت زورانسری بیگواھیں مردمانی زھرشانی کیمپ گرماگ ءَ شال پریس کلب ءِ دیما جنگ بیت وھدیکہ سردیانی وھدءَ اے کیمپ کراچی ءَ برگ بیت اِنت۔
دومی نیمگ ءَ بلوچ سوشل میڈیا ایکٹیوسٹس آنی نیمگ ءَ ھمے روچ ءَ #StopHRViolationsInBalochistan ءِ ھیشٹیگ ءَ گوں آنلائن کمپین جنزینگ ءِ جار جنگ بیتگ۔