نبشتانک: گْوادر ءِ شیرزال
نبشتہ کار: آسما بزنجو
دی بلوچستان پوسٹ
چہ دْرستاں پیش من وتی گْوادر ءِ شیرزالیں بلوچاں سُھریں سلام ءُ دْروت پیش کن آں کہ آیاں پہ بلوچ راج ءِ ھک، ھُدائی داد، زِروان، مال ءُ مڈّیانی پھزگ زھرشانی ءُ روانکے کش اِت۔ اے تْرُندیں زھرشانی ءُ بلاھیں روانک ءَ گُلامیں راج ءِ چاگِرد ءَ سرپدی داتگ کہ ما بلوچ یک گُلامیں راج ایں ءُ باید انت ما پہ وتی بُنکی ھک بزاں راجی آجوئی ءَ یکمُشت بِہ بہ ایں۔ اگاں ما دنیا ءِ نامداریں راجی آجوئی ءِ آشوب(انقلاب) ءُ جُھدانی بابت ءَ پوٹ ءُ پول کن ایں، یا دنیا ءِ گُلامیں راجانی سوب مندیں آشوبانی بابت ءَ چیزے وان ایں گُڑا ما پَک سرپد بہ ایں کہ دنیا ءِ ھر گُلامیں راجانی راجی آجوئی ءِ جّھد ءُ آشوب ءِ سوب مندی ءَ زالبولانی یک بلاھیں کِرد ءُ بھرے ھست اَت چے ءَ کہ ماں یک آگاھیں چاگِردے ءَ زالبول وتی چُکاں گُلامی ءُ آجوئی ءِ بابت ءَ سرپدی دنت۔ وھدے کہ یک راجے ءِ زالبوالاں گُلامی مار اِت ءُ راجی آجوئی ءِ جُنز ءِ بھر بوتگ اَنت گُڑا آ راج داں دیر ھونواریں دُژمنانی لگتمالی ءِ آماچ نہ بیت، آ راج ءِ لس مھلوک مجگی گُلامے جوڑ نہ بیت چو کہ بلوچ راج ءِ بلاھیں بھرے کاسگ چٹّیں دمگی میر ءُ نوابانی زیردست اِنت ءُ ھمے کاسگ چٹّیں دمگی میر دُژمن ءِ کارمند ءُ بلوچ راج ءِ دُژمن اَنت۔
چوناھا جنین آدم وَ بنی آدم ءِ نیم اِنت بلکیں میڈیکل سائنس ءِ رِد ءَ ماں بازیں بنی آدمی پدریچاں(جنریشن) ، ھاسکن سردیں کوھاھی دمگاں آبادیں راج ءِ تہ ءَ جنین آدم ءِ آبادی گیشترّ ھم بنت انچوشکہ:- نیپال، لاٹیوا، لِیتونیا، یوکرین، روس، بیلاروس، آرمانیا، ایسوڈونیا ءُ پُرٹوگال ءِ وڑیں مُلک اَنت کہ اود ءَ زالبول ءِ آبادی سک گیشتر ءُ مردین کم اَنت۔ ھمے پیم ءَ دگہ انچیں مُلک ھم ھست اَنت کہ اود ءَ مُلکارانی(سیاستدانانی) گیشتریں بھر ھم زالبول اَنت انچوشکہ روانڈا، کیوبا ءُ بولیوییا بلے ھبکھی گپ ایش انت کہ اسلامی شرھیی مُلک یو اے ای(یونائیٹڈ ارب امارات) ءَ ھم پنجاہ در سد مُلکار جنین آدم اَنت۔
ایشی ءَ ابید مرچیگیں وھد ءَ ، بزاں اے وھد کہ من پہ شُما سرپدی ءَ اے نبشتانک ءَ نبیسّگ ءَ آں جرمنی، ڈینمارک، بنگلہ دیش، پِینلینڈ، نیوزی لینڈ، لیتونیا، سربیا، ایسوٹونیا ءُ آئیس لینڈ ءِ کارمستر ءُ سروزیر جنین آدم اَنت کہ دُنیا ءِ سَک نامدارین ءُ بودناکیں راجی سروک اَنت کہ آ اے وھد ءَ پہ وتی راج ءُ مُلک ءِ ھزمت بے کساس کار کنگ ءَ اَنت۔ چوناھا اے وھد ءَ دگہ بازیں مُلکاں ھم راجی سروک جنین آدم اَنت بلے ما آیانی گپ ءَ وَ نہ ایں بلکیں من تھنا نامدارینانی بابت ءَ گپ ءَ آں کہ آیاں وتی ملک ءَ بے کساس دیمروئی داتگ۔ گِند ئے اے نبشتانک ءِ تہ ءَ ارجنٹینا ءِ ایوا پیرون، امریکہ ءِ روزا پارک، انگلستان ءِ مارگریٹ تھچر ءُ ھندوستان ءِ شیرزالیں راجی سروک اندرا گاندھی ءَ کَے شموش ایت کہ 1971 ءِ جنگ ءَ بانُک ءَ مھمد اَلی جِناہ ءِ پاکستان دو بھر کُتگ ءُ جناہ ءِ وتگڑیں دو راجی سسّا ئِے ھم رَد پیش داشتگ۔
اگاں ما دُنیا ءِ تہ ءَ پرنچ آشوب، روسی آشوب، سپینش آشوب ءُ ھندوستان ءِ وڑیں نامداریں راجی آجوئی ءِ جُھداں وان ایں گُڑا اود ءَ ھم آشوبی شیرزالانی بابت ءَ بے کساس پہ وانگ ءَ رس ایت۔ اگاں چہ یوٹوب ءَ ارب مُلک مِسر ءِ زورانسریں کارمستر واجہ ھُسنی مُبارک ءِ ھلاپ ءَ 2013 ءِ ھونیگیں زھرشانی ءِ تامُراں گِند ایں گُڑا سرپدی رس ایت کہ اود ءَ شیرزال ناں کہ تھنا گوں مردیناں ھوار زھرشانی کنگ ءَ ات اَنت بلکیں بُندری شھر کایرو ءِ تھریر سوکائر ءِ پوج ءِ لگتمالی ءَ ھم سگگ ءَ ات اَنت۔ گِند ئے دنیا ءِ دِگہ راجانی وڑ ءَ بلوچ راج ءِ زالبول ھم وتی بلوچ راج ءِ بھر اَنت۔ مئے نیکراہ ءُ بلوچ دود ءُ ربیدگ ءِ تہ ءَ زالبول ءِ ھم یک بلاھیں شرپے ھست۔ بلوچ راجی آجوئی ءِ جُھد ءَ بلوچ شیرزال گوں وتی گُنگریں بْراتاں ھمراہ اَنت۔ توری راجی آجوئی ءِ ھک ءَ زھرشانی ءُ روانکے کشگ بہ بیت یا توری سِلاھبندیں جُھدے بہ بیت کہ اود ءَ ھم بلوچ شیرزال گوں وتی بْراتاں ھمکوپگ اَنت ءُ ایشی ءِ مستریں درور شھید بانُک کریما بلوچ ئیگ اِنت کہ نمیرانیں شھید بانِک کریما بلوچ ءِ ماں بلوچ راجی آجوئی ءِ برجاھیں جُھد ءَ یک بلاھیں کِردے ھست۔ بی بی سی ءَ دنیا ءِ سد سان گیپتگیں رھشُونیں زالبولانی لَڑ ءَ شھید بانُک کریما ءِ نام ھوار کُت کہ شھید بانُک کریما بلوچ ناں کہ تھنا راجی آجوئی لوٹوکیں بلوچ نودربری گل- آزات ءِ سروک اَت بلکیں بلوچ سرجمیں بلوچ راج شیرزال ءِ پِگر ءُ سسّا ءِ منّوگِر بوتگ اَت۔ 2009 ءَ تُربت شھر ءَ پہ بلوچ راجی آجوئی ءِ ھک ءَ بلاھیں زھرشانی ئیں روانکے ھم شھید بانُک کریما بلوچ ءِ سروگانی ءَ کشگ بوتگ ءُ ھمے یکیں زھرشانی ءَ سرجمیں بلوچ راج ءَ ھمے سرپدی داتگ کہ ما بلوچ راج پنجابی ءِ گُلام ایں ءُ باید انت بلوچ راج پہ وتی راجی آجوئی ءَ پاد بئیت۔
گِند ئے مرچی ھمے شھید بانُک کریما ءِ رھشُونی اِنت کہ نمیرانیں شھید ھانی بلوچ، بانُک ھوران بلوچ، ماھرنگ بلوچ ءَ ھوار سرجمیں مکران ءُ گْوادر ءِ شیرزال گوں وتی بْراتاں ھمکوپگ بوُانان ءَ زھرشانی ءُ روانک ءِ آسر ءَ بلوچ راج ءَ وتی راجی آجوئی ءِ سکین دیان اَنت۔ بزاں بے جنین آدم ءَ چاگِرد ناسرجم اِنت ءُ جنین آدم ھر راج ءِ نیم بھر اِنت۔ ھچ راجی جُھد بے زالبول ءِ بھر زورگ ءَ سوبین نہ بیت پمیشکا باید اِنت گْوادر ءِ شیرزالانی وڑ ءَ بلوچستان ءِ دگہ شھر ءُ دمگاں ھم بلوچ شیرزالیں مات ءُ گْوھار وتی ھک ءِ واست ءَ در بیا اَنت ءُ راج ءِ مھلوک ءَ راجی آجوئی ءِ جُھد ھوار کنگ ءِ سکین بہ دے اَنت۔ وھدے کہ یک گُلامیں راجے ءِ زالبوالاں وت ءَ راجی آجوئی ءِ جُھد ءَ ھوار کُتگ گُڑا آ راج ءِ آجوئی ءِ جُھد الم سوبین بیت۔ راجی آجوئی ءِ جُھد ءِ بُندری لوٹ دُژمن ءِ ھلاپ ءَ نپرت ودی کنگ، وتی جِند ءُ راجی زُبان ءِ وانگ ءُ وانینگ، بلوچ شیرزالانی راجی آجوئی ءِ جُھد ءَ ھوار بوگ ءُ بلوچ چاگِرد ءِ تہ ءَ گُلامی ءِ مارشت ودی کنگ کہ ما بلوچ وت یک جُتائیں زُبان، راج ءُ سرڈگارے ءِ واجہ ایں پمیشکا مارا گوں پنجابی ءَ ھچ سْیادی نیست۔
بلوچ راج ءِ دُژمن ءِ شالا پْروش بہ بات ، بلوچ راجی آجوئی ءِ جُھد سوبین بات، سرجمیں راج تپاک ءُ یکمُشت بہ بات ءُ آزات بلوچستان دیمروئی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔