پاکستان ءُ بنگلہ دیش ءِ نیام ءَ چٹاگانگ ءَ ٹیسٹ گوازی دومی روچ ءَ برجاہ اِنت، بنگلہ دیش ءَ 330 رنز اڈ کُتگ ءُ وھدیکہ پاکستان ءَ روچے آسر ءَ 145 رنز اڈ کُتگ۔
پاکستان ءُ بنگلہ دیش ءِ ٹیسٹ گوازی برجاہ، لئیب ءِ دومی روچ ءَ بنگلہ دیش ءِ ٹیم ءَ 114 اورانی تہءَ 330 رنز اڈ کُتگ ءُ درستیں لئیبی آوٹ بیتگ اَنت۔ بنگلہ دیش ءِ نیمگ ءَ گیشتر رنز لٹن داس ءَ 114 ءُ مشفق الرحیم ءَ 91 رنز اڈ کُتگ۔
وھدیکہ لئیب ءِ دومی روچ ءَ پاکستانی باولر حسن علی ءَ بیست اورانی تہءَ درستاں گیشتر 5 وکٹ زرتگ، وھدیکہ شاھین آفریدی ءُ فھیم اشرف ءَ دو دو وکٹ زرتگ اَنت۔
لئیب ءِ دومی روچ ءَ پاکستان ءَ بیٹنگ بندات کُتگ ءُ ھچ وکٹانی تاوان ءَ ابید 145 رنز اڈ کُتگ۔ پاکستان ءِ نیمگ ءَ عابد علی ءَ 93 رنز اڈ کُتگ ھمے پئیم ءَ عبداللہ شفیق 52 رنز اڈ کُتگ ءُ دومی روچ ءِ گوازی آسر بیتگ۔