گوادر زھرشانی برجاہ، کیچ آل پارٹیز ءَ زھرشانی پلامرزی کتگ

بلوچستان ءِ تیاب دپی دمگ گوادر ءَ وتی لوٹانی ھک ءَ گوادر ھک دو زرمبشت ءِ زھرشانی مروچی سیزدھمی روچ ءَ برجاہ بوتگ – زھرشانی ءَ مکران ءِ دگہ مردمانی آیگ برجاہ انت –

دومی نیمگ ءَ آل پارٹیز کیچ ءَ شمبے ءِ روچ ءَ کنوئیر مشکور انور بلوچ ءِ سرکماشی ءَ نیاد ءِ بوتگ –

نیاد ءَ ڈپٹی کنوئیر فضل کریم، پریس سیکرٹری حفیظ علی بخش، جمعت علماء اسلام ءِ نمائندگ مولانا حفیظ مینگل پی پی پی رھشون نواب شمبے زئی ءُ حاجی قدیر احمد بلوچ، جماعت اسلامی دمگی امیر ظریف بلوچ، جمعیت الحدیث رھشون یلان زعمرانی، کیچ سول سوسائیٹی رھشون التاز سخی ءُ عومر ھوت ءُ دمگی ھوالکار ماجد سمد ھوار بوتگ انت –

نیاد ءَ درساں گوادر ھک دو زرمبشت ءِ پلامرزی کتگ زھرشانی ءَ ھوار بوگ ءُ مولانا ھدایت الرحمن گوم ءَ یکجھتی ءِ پیسلہ کتگ –

نیاد ءَ ھک دو زرمبشت ءِ بنکی لوٹ گیرکانودی ٹرالنگ، باڈر کاروبار ءِ بندش! سیکورٹی پوج ءِ بے نپیں پانگس ءُ راج ءِ کم شرپی ھلاس کنگ ءُ نشہ ءِ سر ءَ سرجمی بندش جنگ لوٹ جائز گوشتگ ءُ آھانی پلامرزی کتگ –

نیاد ءَ تران کنان ءَ آل پارٹیز ءِ رھشونانی گوشگ ات کہ راج ءِ جیڑھاں پد پُشت کنگ ھمک روچ جاور ھال ھرابتر بوان انت سرکار گیر سنجیدگی ءِ سبب ءَ راج زھری ءُ مایوسی گیشتر بوان انت –

نیاد ءَ بلوچستان گورنر ءِ نیمگ ءَ شنگ کنگ بوتگیں زھرشانی راجی روانکانی سر ءَ بندش نوٹیفیکیشن ایر جتگ ءُ رھبندانی لگتمالی گوشتگ-