َھاران ءَ یوفون کمپنی ٹاور سر ءُ کیچ ءَ بمب ڈسپوزل ءِ زمہ واری سلاہ بندیں گلاں منّ اِتگ اَنت

بلوچستان ءِ دمگ ھاران ءِ ھند لجے ءَ ناشناسیں سلاہ بندیں مردماں یوفون کمپنی ٹاور ءِ سر ءَ اُرش کتگ ءُ آئی مشنیری مانداشتگ اَنت ءُ ھمے وڑ ءَ کیچ ءِ دمگ زامران پگنزان ءَ بمب ڈسپوزل ءِ سر ءَ اُرش کرتگ –

دومی نیمگ ءَ بلوچ سلاہ بندیں گل بلوچ ریپبلکن آرمی ءِ جارکش بیبگر بلوچ ءَ گوشتگ کہ پاکستان ءِ موباھل کمپنی بلوچ جُھدکارانی موباھلانی ٹریس کنگ ءُ آھانی بیگواہ کنائینگ ءِ سرجم ءَ چاریگ ءِ کمکار جوڑ بوتگ اَنت –

جارکش ءَ دیمتر ءَ گوشتگ کہ مئے سرمچاراں گوستگیں شپ ءَ ھاران ءِ دمگ لجے ءَ ھستیں پاکستانی موباھل کمپنی یوفون ءِ ٹاور گوں تراکناکیں شورواں تباہ کتگ ءُ آئی ءِ مشنیری ءِ ساز ءُ سامان مانداشتگ ءُ تاوان بار کتگ اَنت –

بیبگر بلوچ ءَ گوشتگ کہ ما تچک ءَ گوشگ لوٹ ایں کہ موباھل کمپنی ماں بلوچستان ءَ آسراتی ءِ نام ءَ چہ زُلم ءُ زوراکی ءَ کم نہ اَنت-

ھمے وڑ ءَ یونائیٹڈ بلوچ آرمی ءِ جارکش مزار بلوچ ءَ وتی شنگ کرتگیں درشان ءِ تہ ءَ کیچ ءَ بیتگیں اُرش ءِ زمہ واری من اِتگ –

جارکش مزار بلوچ ءَ رسانکدراں شنگ کرتگیں درشان ءِ تہ ءَ گشتگ کہ مروچی سھب ءِ ساھت نُھ ءُ نیم ءَ کیچ ءِ دمگ زامران پگنزان ءَ بمب ڈسپوزل ءِ کارامند آئی ای ڈی ءِ نشانگ کتگ اَنت،چرے اُرش ءَ یک کارمندے ھما جاہ ءَ مرتگ ءُ یکے زدگ بیتگ –

جارکش ءَ گشتگ کہ زورگر بلوچ زمین ءِ سر ءَ وتی زورگری ءَ ھمنکس مھکم کنت ما وتی جنگ ءِ تہ ءَ ھمینکس ترندی کاریں –

جارکش ءَ گشتگ آجو بلوچستان ءِ رھبندانی رد ءَ مئے اُرش برجاہ مان اَنت-