سید ہاشمی ریفرنس لائبریری ملیر کہ بلوچی زبان ءِ مستریں لائبریری زانگ بیت کہ کساس گوستگیں شانزدہ سالاں چہ بلوچ نودربر، شائر، زبان دوست ءُ راجکارانی ھاترءَ یک درسگاہ ءِ کردءَ پیلو کنگ ءَ اِنت، مروچی وتی راج ءِ کمکانی راہ چار اِنت۔
ٹی بی پی چاگردی رسانکدرانی اھوالکارءِ رد ءَ سید ہاشمی ریفرنس لائبریری ءِ آفیشل فیسبوک تاک ءَ شنگ بیتگیں کمکی جار ءِ تہءَ گُشگ بیتگ کہ لائبریری ءَ لھتیں کارانی ھاترءَ کمک پکار اِنت۔ کارانی لڑ چُش اے وڑءَ اِنت کہ لائبریری ءِ کمپان (پسیل) ءِ بُرز کنگ، لائبریری ءِ کمپان (پسیل) ءِ سَر سیم جنگ، لائبریری ءِ رنگ ءُ نوکاری ءُ لائبریری ءِلین ءُ سولر سسٹمانی شر کنگ ھوار اَنت۔
جار ءِ رد ءَ اے درستیں کارانی ھرچ کساس سئے 3 لک کلدار اِنت۔
اھوالکار ءِ رد ءَ کمکی جار ءِ تہءَ دیمترا گُشگ بیتگ کہ چو کہ شما سَرپداِت کہ کتابجاہ پُرّیگیں دہ 10 سال چہ نگیگیں مالی جاور ءِ آماچ اِنت چو کہ داں 2003 ءَ بگر داں 2011 ءَ کتابجاہ ءِ مالی کمک کنوک واجہ صبا دشتیاری بوتگ، واجہ ءِ شہید بیگ ءَ پَد کتابجاہ ءِ کُمک بلوچ راج ءَ کتگ بلے روچ پہ روچ اے کمک کم بوان بوت۔
آیانی ردءَ ڈی ایم سی ملیر ءِ سئے سال پیسر پِرّینتگیں جار کہ آ کتابجاہ ماڑی ءِ نوکار کنت، ابید چہ جار ءَ دیما شُت نہ کُرت، ءُ پمشکہ کتابجاہ ءِ ماڑی ءِ جوڑ کنگ ءُ نوک کاری کار بیت نہ کُرت۔
آیانی ردءَ گوْستگیں چیزے سال اِنت کہ دُزّی ءُ دزمان جنی ءَ کتابجاہ سَک مالی تاوان داتگ، ھمک ماہ چیزے نہ چیزے نشہ کنوکیں دُز چہ کتابجاہ ءَ بر انت۔ کدی سولرسسٹم، کدی نَل ءُ پائپ، کدی کمپیوٹر، کدی آپ ءِ موٹر۔ کتابجاہ ءِ دُزی ءَ دارگ ءَ پہ چوکیدار بدل کنگ بیت انت، بلے چو کہ چوکیدار شَپ ءَ بیت ءُ کتابجاہ ءِ مالی جاور انچو شر نہ اِنت کہ دو چوکیدار داشت بہ کنت۔
اھوالکار ءِ رد ءَ کمک جار ءِ تہ ءَ دیمترءَگُشگ بیتگ کہ استیں جاورانی سرا سنگت ءُ دوزواہاں ھمے سلاہ داتگ کہ کتابجاہ ءِ کمپان (پسیل) بُرز کنگ ءُ سُیم جنگ بہ بیت بلکیں چہ دُزاں پہریزگ بہ بیت ءُ سولر سسٹم شر کنگ بہ بیت۔ چو کہ کتابجاہ ءِ مالی جاور شر نہ اِنت پمشکہ اے دست بندی کنگ بیت کہ شما وتی کسان ءُ مزنیں کمک ءَ جہل ءِ مردماں گوں رابطہ کُرت کن اِت۔
ھمے درگت ءَ لھتیں مردمانی نام ءُ آیانی رھوت نمبر ھم شنگ کنگ بیتگ اَنت کہ چو اے رنگ ءَ اَنت؛ ظریف محمود (ھسابدار) 2625537-0321 پروین ناز (کراچی)، نواز فتع (کیچ / کراچی) 7466580-0335، عاصم زھیر (شال) 03130838052، شبیر رخشانی ( آواران) 8928700-0336 ءُ وھاب بلوچ (کتابدار) 2241982-0313
کمک جار ءِ تہءَ اے ھم گُشگ بیتگ کہ ھر یکّے وتی وس ءُ واک ءِ ھساب ءَ کُمک کت کنت، کمکّار الم وتی داتگیں مالی کمک ءِ رسید (کمکی کاگد) ءَ بہ زیر ایت۔
زانگ بہ بیت سید ہاشمی ریفرنس لائبریری سال 2005 ءَ بگر داں روچ مروچی لس بلوچانی ھاترءَ پچ اِنت، کہ مھلوک ادا بلوچی زبان، بلوچ ءِ راجدپتر، بلوچ راجکاری ءَ ھوار ایندگہ زبانانی کتابانی پجیگ ءَ بلوچی زبان ءَ کورس کنگ ءَ ھم کائنت۔
لائبریری ءِ گوستگیں کارمستر ءُ بلوچ کواس شھید اُستاد صبا دشتیاری جھد ءُ کوشستانی برورد اِنت کہ مروچی بلوچی ءَ یک مھکمیں گل ءِ ھست اِنت۔ چُشیں گلانی رکینگ بلوچ راجے زمہ واری ءُ ڈبہ جوڑ بیت۔