ھوشاپ ءَ ایف ڈبلیو او ءِ مشینری ماندارگ ءِ زمّہ واری بی ایل ایف ءَ منّ اِتگ

دمگی ٹیکہ داراں مکن کنیں زورگیریں پوج ءِ سامراجی شوربندیانی بھر مہ بنت – میجر گوھرام

سربوتگیں ھالانی رد ءَ ناشناسیں سلاہ بندیں مردماں کیچ ءِ دمگ ھوشاپ ءَ پاکستانی پوج ءِ ایف ڈبلیو او ءِ بندساچی کمپنی ءِ مشین مانداشتگ اَنت –

ھالانی رِد ءَ ایف ڈبلیو او ءِ مشین گوستگیں شپ ءَ ھوشاپ سنگ بازار ءَ مراد بکش ہوٹل ءِ دیم ءَ ماندارگ بوتگ انت – اشانی ماندارگے زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں ھوشاپ سنگ بازار ءَ مراد بکش ھوٹل ءِ دیم ءَ پاکستانی پوج ءِ بند ساچی کمپنی ایف ڈبلیو او مشین مانداشتگ انت –

جارکش ءَ دیمتر ءَ وتی درشان ءِ تہ ءَ گوشتگ کہ سی پیک روٹ ءِ نام ءَ پوجی کمپنی بلوچستان ءِ مردماں اے پروجیکٹ روٹ نہ تھنا در پہ در کنگ ءَ لاچار کنگ ءَ اِنت بلکینہ ھمے وتساچیں سامراجی پروجیکٹ ءِ نام ءَ ایردستیں بلوچستان ءِ تہ ءَ وتی ایردستی ءَ مھکم کنگ لوٹیت ءُ بلوچ راج ءِ چکچینی ءَ کنگ ءَ انت –

جارکش میجر گوھرام بلوچ ءَ گوشتگ ما یکرندے پدا دمگی ٹیکہ داراں مکن کنیں کہ آ زورگیریں پوج ءِ سامراجی بند ساچی شوربندیانی بھر مہ بنت اگاں ناں وتی ھر وڑیں جانی ءُ مالی تاوان ءِ زمّہ وار وت انت –

جارکش ءَ گڈسر ءَ وتی درشان ءِ تہ ءَ گوشتگ کہ ریاستی پوج ءُ آئی ءِ کمک کارانی سر ءَ مئے اُرش مادریں بلوچستان ءِ آجوئی ءَ تاں برجاہ مان انت –