شہید شعیب جان ( گزّی ) نام ءَ
شائر: برانز بلوچ
دی بلوچستان پوسٹ
بچکندے روان دے یار
شال ءِ بدن برف اِنت
چلتن ءِ بالاد ابیتک اِنت
کشک گوانک جنان اَنت
دَمک گُشے ویران اَنت
سرجمیں ندارگ ہوادگاں
مدت پرِگوستگ اَنت
ودار ءِ آٹیگ پُرشاں اَنت
یار … !
ہما نیادیگ ءِ اوتاک ءِ کلنڑیں
دروازگ کُبل اِنت
مکتب ءِ درائیں تاکاں
تَند بستگ
زند ءَ نوکیں تب ءِ رودینتگ
کماشیں راجو انگت
دگے سرا نشتگ پا اُمیت ءِ
بلکن ءَ کسے بکنت سما ئے
مدامی بے گواہی ءِ کسّہ ءَ
نوکتر کنت … !
یار نو
اکسانی درائیں رنگ لگوشتگ آں
گیرانی گرنچ گباراں اندیم ءَ
اک برے واتر کن
زھیر ءِ کُرتگ
شال پُرسیگ اِنت
بچکندے روان دے یار