ھوشاپ وئیل ءِ بگیری ءَ سوبمندیں زھرشانی زامن اِنت کہ بلوچستان ءَ سیاست زندگ اِنت- این ڈی پی

نیشنل ڈیموکریٹک پارٹی ءِ بُنجاھی جارکش ءَ شِنگ کتگیں درشان ءِ تہ ءَ گْوشتگ کہ ھوشاپ وڑیں بازیں وئیلاں بلوچستان ءِ ھرّوچی ھست اَنت بلے تنی وھدے اسٹریم سیاست ءَ جاگہ جوڑ نہ کتگ – بلوچستان ءَ سیاسیت ھمے وڑ تُرسناک کتگ کہ سیاسی باسک زمین ءِ چیر ءَ سیاست کنگ ءَ لاچار اَنت-

جارکش ءَ گْوشتگ کہ ھوشاپ وئیل ءِ بگیری ءَ راج ءِ یکجاھی ، بلوچستان ءِ جتائیں شھراں زھرشانی یکشلہ برجاہ ءُ کھول ءِ وتی ھک ءِ ھاتر ءَ پُشت نہ کنزگ بلوچستان ءِ بُنجاھی اسٹریم سیاست ءِ سوبمندی اِنت-

جارکش ءَ دیمتر ءَ گْوشتگ کہ بلوچ میتگاں لڑ ءُ بار کنگ ءَ لاچار اَنت ، زوراور ءِ پالیسی گیشی تہ ءَ اَنت ، زورانسری آوار جنی ءُ کُشت ءُ کوش ھرروچی ھست اَنت ، بلوچ ءِ دود ربیدگ ءُ زبان ءُ راجی پجّار ھترہ ءِ تہ ءَ اَنت ، اے جاوراں ھم اگاں بلوچ سیاسیت ءَ چہ یک کر بوگ یہ بے تواریں زند گوازینگ گُڑا راجدپتر ءَ ٰآیانی کارپد ءُ کردگار ھما راجانی وڑ ءَ بنت کہ گوستانک بوتگ اَنت –

آھاں دیمتر ءَ گْوشتگ کہ بے شک تنی وھدے اسل کَتکاراں سزا نہ رستگ بلے اے سیاسی جُھد ءِ تھنا بنداتی نہ اِنت بلکیں اے پگر ھم ھلاسی اِنت کہ بلوچستان ءَ ایف سی ءَ ھوار سرجمیں ادارھانی بگیری ءَ ایف آئی آر نکش بوگ یک بے واریں گپے کہ بلوچ ڈیھ ءِ سر ءَ انسانی ھکّانی پادمالی ءَ ھوار اَنت –

آھاں گُڈی ءَ گْوشتگ کہ شھدائے ھوشاپ ءِ زھگاں سُھرچکیں دروت ندر کن ایں اے کسانیں زھگانی کھول ءِ کربانی ءُ جزبگ ءَ بلوچ راج ءِ ورناھانی ھاتر ءَ یک مسالے بوگی اِنت کہ آھاں گوں تُرندیں جاوراں ھم زوراوریں تاکتانی بگیری ءَ اوشتاتگ ءُ آ سرجھل کنگ ءَ لاچار کتگ اَنت-